ಬಿಸಿಲು ಸೋಲಲಿ- ಮತದಾನ ಗೆಲ್ಲಲ್ಲಿ

ಶೇಷಮೂರ್ತಿ ಅವಧಾನಿ

ಕಳೆದೊಂದು ತಿಂಗಳಿಂದ ಕಲಬುರಗಿ ಜಿಲ್ಲಾದ್ಯಂತ ಉಷ್ಣ ಮಾರುತಗಳ ಹಾವಳಿ, ಪಾದರಸ 47 ಡಿಗ್ರಿ ಸೆಲ್ಸಿಯಸ್‌ ತಲುಪಿದ್ದರಿಂದ ಜಿಲ್ಲೆ ಕಾದ ಕಾವಲಿಯಂತಗಿದೆ. ಜನ ಬೆಳಗಿನ 7ಕ್ಕೆ ಮನೆ ಬಿಟ್ಟು ಹೊರಬಾರದಂತಹ ಪರಿಸ್ಥಿತಿ ಇಲ್ಲಿ ಎದುರಾಗಿದೆ.

ಏತನ್ಮಧ್ಯೆ ಇಲ್ಲಿನ ಜಿಲ್ಲಾಡಳಿತ, ಜಿಲ್ಲಾ ಸ್ವೀಪ್‌ ಸಮೀತಿ, ಶಾಲೆ, ಕಾಲೇಜುಗಳ ಮಕ್ಕಳೊಂದಿಗೆ ಕೂಡಿಕೊಂಡು ಮತದಾನ ಯಾವ ಕಾರಣಕ್ಕು ತಗ್ಗದಂತೆ ಮಾಡಲು ಹರಸಾಹಸಕ್ಕೆ ಮುಂದಾಗಿದ್ದಾರೆ. ಚುನಾವಣೆ ಘೋಷಣೆ ದಿನದಿಂಲೇ ನಿರಂತರ ಮತದಾನ ಜಾಗೃತಿ, ಅದರ ಮಹತ್ವ ಸಾರುವುದು, ಯುವ ಮತದಾರರನ್ನು ಮತಗಟ್ಟೆಗಳಿಗೆ ಸೆಳೆಯುವ ಎಲ್ಲ ಕಸರತ್ತುಗಳನ್ನು ನಡೆಸಲಾಗಿದೆ.

2019ರಲ್ಲಿ ಬಿಸಿಲಲ್ಲೇ ಲೋಕ ಸಮರ ನಡೆದಿತ್ತು, ಆಗ ಜಿಲ್ಲಾದ್ಯಂತ ಶೇ.60.89ರಷ್ಟು ಮತದಾನವಾಗಿತ್ತು. ಈ ಬಾರಿ ಸ್ವೀಪ್‌ ಸಮಿತಿ ಶೇ.80ಕ್ಕೆ ಮತದಾನ ಹೆಚ್ಚಿಸುವ ಗುರಿಯೊಂದಿಗೆ ಜಾಗೃತಿ ಮೂಡಿಸುವ ಪ್ರಯತ್ನ ಮಾಡಿದೆ. ಈ ಬಾರಿ ಜಿಲ್ಲೆಯ ಮತದಾನ ಅದೆಲ್ಲಿಗೆ ತಲುಪುವುದೋ ಎಂದು ಕಾದು ನೋಡಬೇಕಾಗಿದೆ.

ಈ ಮತಗಟ್ಟೆಗಳಿಗೆ ಸುಣ್ಣ-ಬಣ್ಣ ಬಳಿಯಲಾಗಿದೆ. ಅನೇಕ ಕಡೆ ಜಾಗೃತಿ ಘೋಷವಾಕ್ಯಗಳನ್ನು ಬರೆಯಲಾಗಿದೆ. ಮೇ 7ರ ಮತದಾನಕ್ಕಾಗಿ ಇಂತಹ ನೂರಾರು ಮತಗಟ್ಟೆಗಳು ಕಾದು ಕೆಂಡವಾಗಿರುವ ಕಲಬುರಗಿ ಜಿಲ್ಲಾದ್ಯಂತ ಮಧುವಣಗಿತ್ತಿಯಂತೆ ಸಿಂಗಾರಗೊಂಡು ಮತದಾರರನ್ನು ಆಕರ್ಷಿಸಲು ಸಜ್ಜಾಗಿವೆ.

ಒಟ್ಟಾರೆ 45 ಸಖಿ ಪಿಂಕ್ ಬೂತ್, ತಲಾ 9 ಯುವ, ಥೀಮ್ ಹಾಗೂ ಪಿ.ಡಬ್ಲ್ಯೂ.ಡಿ. ಸೇರಿ ಒಟ್ಟಾರೆ 72 ಬೂತ್ ಮತದಾರರ ಸ್ನೇಹಿಯಾಗಿ ಸಿದ್ಧಗೊಳಿಸಲಾಗುತ್ತಿದೆ. ಮತಗಟ್ಟೆಗೆ ಬಂದು ಮತ ಚಲಾಯಿಸಲೆಂದು ಪ್ರೇರೇಪಿಸುವುದು ಇದರ ಉದ್ದೇಶವೆಂದು ಜಿಲ್ಲಾಧಿಕಾರಿ ಬಿ.ಫೌಜಿಯಾ ತರನ್ನುಮ್ ಹೇಳಿದ್ದಾರೆ.

ಯುವ ಬೂತ್: ವಿಶೇಷವಾಗಿ ಮೊದಲನೇ ಬಾರಿಗೆ ಮತದ ಹಕ್ಕು ಚಲಾಯಿಸುವ ಯುವ ಮತದಾರರನ್ನು ಗುರಿಯಾಗಿಸಿ ಕ್ಷೇತ್ರಕ್ಕೊಂದು “ಯುವ ಬೂತ್” ಸ್ಥಾಪಿಸಲಾಗುತ್ತಿದ್ದು, ದೇಶದ ಪ್ರಜಾತಂತ್ರ ವ್ಯವಸ್ಥೆಗೆ ಚುನಾವಣೆ ಮತ್ತು ಮತದ ಮಹತ್ವ ಅದರ ಪ್ರಕ್ರಿಯೆ ಬಗ್ಗೆ ಯುವ ಸಮುದಾಯದಲ್ಲಿ ಜಾಗೃತಿ ಮೂಡಿಸುವುದೇ ಮತಗಟ್ಟೆಯ ಮುಖ್ಯ ಉದ್ದೇಶವಾಗಿದೆ.

ಮಾದರಿ (ಥೀಮ್) ಮತಗಟ್ಟೆ: ಆಯಾ ವಿಧಾನಸಭಾ ಕ್ಷೇತ್ರದಲ್ಲಿ ಕ್ಷೇತ್ರದ ಐತಿಹಾಸಿಕ ಹಿನ್ನೆಲೆ ಬಗ್ಗೆ ಪರಿಚಯ ನೀಡುವುದೇ ಈ ಮಾದರಿ (ಥೀಮ್) ಮತಗಟ್ಟೆ ಮುಖ್ಯ ಉದ್ದೇಶ. ಮತಕ್ಷೇತ್ರದ ವಿಶೇಷತೆ ಆ ಮತಗಟ್ಟೆಯ ಗೋಡೆ ಬರಹದಲ್ಲಿ ಪ್ರತಿಬಿಂಬವಾಗಲಿದೆ. ಈ ಮೂಲಕ ಸ್ಥಳೀಯ ವಿಶೇಷತೆಯನ್ನು ಜನರಲ್ಲಿ ಅರಿವು ಮೂಡಿಸುವುದರ ಜೊತೆಗೆ ಮತ ಚಲಾಯಿಸುವಂತೆ ಪ್ರೇರೇಪಿಸುವುದಾಗಿದೆ.

ಕಲಬುರಗಿ ದಕ್ಷಿಣ ಕ್ಷೇತ್ರದ ಜಿಲಾನಾಬಾದ ಪ್ರದೇಶದ ಶಾ ಜೀಲಾನಿ ನರ್ಸರಿ ಮತ್ತು ಪ್ರಾಥಮಿಕ ಶಾಲೆ ಮತಗಟ್ಟೆ ಸಂ.107ರಲ್ಲಿ ಪರಿಸರ ಉಳಿಸಿ ಜಾಗೃತಿ ಮುಡಿಸಲಾಗುತ್ತಿದೆ. ಉತ್ತರಕ್ಕೆ ಸೇರಿದ ಶಹಾಬಜಾರ ಪ್ರದೇಶದ ವಿವೇಕಾನಂದ ನಗರದಲ್ಲಿನ ಮಿಲೇನಿಯಂ ಆಂಗ್ಲ ಮಾಧ್ಯಮ ಶಾಲೆ ಮತಗಟ್ಟೆ ಸಂ.45 ರಲ್ಲಿ ಕಡಿಮೆ ಬಳಕೆ ಜೊತೆಗೆ ಮರು ಬಳಕೆ ಪರಿಕಲ್ಪನೆ ಸೃಷ್ಠಿಸಲಾಗಿದೆ.