ಸಿಂಗಟಾಲೂರು ಬ್ಯಾರೇಜ್‌ ನೀರು ಡೆಡ್‌ ಸ್ಟೋರೇಜ್‌

ಚಂದ್ರು ಕೊಂಚಿಗೇರಿ

ನದಿ ತೀರ ಆಟದ ಮೈದಾನದಂತಾಗಿದೆ. ಇತ್ತ ಸಿಂಗಟಾಲೂರು ಏತ ನೀರಾವರಿ ಯೋಜನೆಯ ಬ್ಯಾರೇಜ್‌ನಲ್ಲಿ ನೀರು ಡೆಡ್‌ ಸ್ಟೋರೇಜ್‌ಗಿಂತ ಕಡಿಮೆ ಇದೆ. ಮೀನು ಸೇರಿದಂತೆ ಇತರೆ ಜಲಚರಗಳು ಸಾಯುತ್ತಿದ್ದು, ನದಿ ನೀರು ಹಸಿರು ಬಣ್ಣಕ್ಕೆ ತಿರುಗಿ ದುರ್ನಾತ ಬೀರುತ್ತಿದೆ.

ತಾಲೂಕಿನ ಹೊಸಹಳ್ಳಿ, ಮಾಗಳ, ಅಲ್ಲಿಪುರ ಗ್ರಾಮಗಳ ವ್ಯಾಪ್ತಿಯಲ್ಲಿನ ಬ್ಯಾರೇಜ್‌ನ ಹಿನ್ನೀರು ಇದೆ. ನಿತ್ಯ ಬಹು ಗ್ರಾಮ ಕುಡಿಯುವ ನೀರಿನ ಯೋಜನೆಗಳ ಜಾಕ್‌ವೆಲ್‌ಗಳಿಗೂ ನೀರು ಸಿಗದಂತಹ ಸ್ಥಿತಿ ಇದೆ. ಒಂದು ವಾರ ಕಳೆದರೆ ಸಣ್ಣ ಪುಟ್ಟ ಗುಂಡಿಯಲ್ಲಿನ ನೀರು ಕೂಡ ಖಾಲಿಯಾಗಲಿದೆ.

ನದಿ ತೀರದಲ್ಲಿರುವ ಬಹುತೇಕ ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಗಳು ನದಿಯಲ್ಲಿ ನೀರಿಲ್ಲದೇ ಬಂದ್‌ ಆಗಿವೆ. ಉಳಿದಂತೆ ಅಲ್ಲಲ್ಲಿ ಗುಂಡಿಯಲ್ಲಿರುವ ನೀರನ್ನು ಜಾಕ್‌ವೆಲ್‌ಗಳಿಗೆ ತಂದು ಪೂರೈಕೆ ಮಾಡಲಾಗುತ್ತಿದೆ. ನದಿಯಲ್ಲಿನ ನೀರು ಒಂದು ವಾರಕ್ಕೆ ಆಗುವಷ್ಟು ಮಾತ್ರ ಸಂಗ್ರಹವಿದೆ.

ಸಿಂಗಟಾಲೂರು ಬ್ಯಾರೇಜಿನಲ್ಲಿ ಪಟ್ಟಣದ 2ನೇ ಹಂತದ ಕುಡಿಯುವ ನೀರು ಪೂರೈಕೆ ಮಾಡುವ ಜಾಕ್‌ವೆಲ್‌ಗೂ ನೀರು ಸಿಗುತ್ತಿಲ್ಲ. ಮುಂದಿನ 10 ರಿಂದ 15 ದಿನಗಳು ಕಳೆದರೆ ಬ್ಯಾರೇಜಿನಲ್ಲಿರುವ ನೀರು ಸಂಪೂರ್ಣ ಬತ್ತಿ ಹೋಗುವ ಸಂಭವವಿದೆ. ಇದರಿಂದ ತಾಲೂಕಿನ ನದಿ ತೀರದ ಹಳ್ಳಿಗಳು ಸೇರಿದಂತೆ ಪಟ್ಟಣದ ಜನತೆಗೂ ಕುಡಿಯುವ ನೀರಿನ ಸಮಸ್ಯೆ ಎದುರಾಗಲಿದೆ.

ಸಿಂಗಟಾಲೂರು ಏತ ನೀರಾವರಿ ಯೋಜನೆಯ ಬ್ಯಾರೇಜಿನಲ್ಲಿ ನೀರು ಡೆಡ್‌ ಸ್ಟೋರೇಜಿಗಿಂತ ಕೆಳಕ್ಕೆ ಹೋಗಿದೆ. ಬಳಕೆಗೆ ಯೋಗ್ಯವಾಗಿಲ್ಲ. ಈಗಾಗಲೇ ಹೂವಿನಹಡಗಲಿ, ಗದಗ ಮತ್ತು ಇತರೆ ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಯ ಜಾಕ್‌ವೆಲ್‌ಗಳಿಗೂ ನೀರು ಸಿಗುತ್ತಿಲ್ಲ. ಸದ್ಯದ ನೀರು ಮುಂದಿನ ಒಂದು ವಾರಕ್ಕೆ ಮಾತ್ರ ಸಾಕಾಗಲಿದೆ ಎನ್ನುತ್ತಾರೆ ಸಿಂಗಟಾಲೂರು ಏತ ನೀರಾವರಿ ಯೋಜನೆ ವಿಭಾಗ-2 ಎಇಇ ರಾಘವೇಂದ್ರ.