ಯುದ್ಧದ ನಡುವೆ ಅಮೆರಿಕ ಡೂಮ್ಸ್‌ಡೇ ಕ್ಷಿಪಣಿ ಪರೀಕ್ಷೆ

- ಭಾರೀ ಅಣ್ವಸ್ತ್ರ ಹೊತ್ತು ವಿಶ್ವದ ಯಾವುದೇ ಮೂಲೆಗೆ ತಲುಪಬಲ್ಲ ಶಕ್ತಿ

ನವದೆಹಲಿ: ಇರಾನ್ ಜತೆಗಿನ ಸಂಘರ್ಷ ತೀವ್ರಗೊಳ್ಳುತ್ತಿರುವ ನಡುವೆಯೇ ವಿಶ್ವದ ಯಾವುದೇ ಮೂಲೆ ತಲುಪಬಲ್ಲ ಸಾಮರ್ಥ್ಯದ ಡೂಮ್ಸ್‌ಡೇ ಮಿಸೈಲ್‌ (ವಿನಾಶದ ಕ್ಷಿಪಣಿ)ನ ಪರೀಕ್ಷೆಯನ್ನು ಅಮೆರಿಕ ನಡೆಸಿದೆ. ಮಿಂಟೆಮನ್‌-3 ಹೆಸರಿನ ಈ ಖಂಡಾಂತರ ಬ್ಯಾಲಿಸ್ಟಿಕ್‌ ಕ್ಷಿಪಣಿ ಪರೀಕ್ಷೆ, ಅಣ್ವಸ್ತ್ರ ಹೊಂದಲು ಬಯಸುತ್ತಿರುವ ಇರಾನ್‌ಗೆ ನೀಡಿದ ನೇರ ಸಂದೇಶ ಎಂದು ವಿಶ್ಲೇಷಿಸಲಾಗಿದೆ.

ಹಲವು ವರ್ಷಗಳ ಹಿಂದೆಯೇ ಈ ಪ್ರಯೋಗ ನಡೆಯಬೇಕಿತ್ತು. ಆದರೆ, ಸಮಯ-ಸಂದರ್ಭ ಕೂಡಿಬಂದಿರಲಿಲ್ಲ. ಇರಾನ್‌ ಯುದ್ಧಕ್ಕೂ ಈ ಕ್ಷಿಪಣಿ ಪರೀಕ್ಷೆಗೂ ಯಾವುದೇ ಸಂಬಂಧ ಇಲ್ಲ ಎಂದು ಅಮೆರಿಕ ಹೇಳಿಕೊಂಡಿದೆ.

ಎಲ್‌ಜಿಎಂ-30ಜಿ ಮಿಂಟೆಮನ್‌-3 ಅಣ್ವಸ್ತ್ರ ಹೊತ್ತೊಯ್ಯಬಲ್ಲ ಖಂಡಾಂತರ ಬ್ಯಾಲಿಸ್ಟಿಕ್‌ ಕ್ಷಿಪಣಿಯಾಗಿದೆ. ಹಿರೋಶಿಮಾಗೆ ಹಾಕಲಾದ ಅಣುಬಾಂಬ್‌ಗಿಂತ 20 ಪಟ್ಟು ಹೆಚ್ಚು ಶಕ್ತಿಶಾಲಿ ಅಣ್ವಸ್ತ್ರಗಳನ್ನು ಹೊತ್ತೊಯ್ಯಬಲ್ಲ ಸಾಮರ್ಥ್ಯ ಈ ಕ್ಷಿಪಣಿಗಿದೆ. ಇದು ನೆಲದಿಂದ ಹಾರಿಸಬಹುದಾದ ಕ್ಷಿಪಣಿ. ಇದನ್ನು ಬೋಯಿಂಗ್‌ ಕಂಪನಿ 1950ರಲ್ಲಿ ಮೊದಲ ಬಾರಿಗೆ ಅಭಿವೃದ್ಧಿಪಡಿಸಿತ್ತು. ಮ್ಯಾಕ್‌ 23 ಅಂದರೆ ಗಂಟೆಗೆ 28,400 ಕಿ.ಮೀ. ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಹೊಂದಿರುವ ಈ ಕ್ಷಿಪಣಿ 9,600 ಕಿ.ಮೀ.ಗೂ ದೂರ ಕ್ರಮಿಸಬಲ್ಲದು. ಶೇಷವೆಂದರೆ ಈ ಕ್ಷಿಪಣಿ ಈವರೆಗೆ ನೈಜ ಯುದ್ಧದ ಸನ್ನಿವೇಶದಲ್ಲಿ ಬಳಕೆಯೇ ಆಗಿಲ್ಲ.

ಡೂಮ್ಸ್‌ಡೇ ಕ್ಷಿಪಣಿ ಅನ್ನೋದ್ಯಾಕೆ?

==

ರಾಕೆಟ್‌ ಮಾದರಿಯ ಈ ಕ್ಷಿಪಣಿ ಹಾರಿಬಿಟ್ಟ ಕೆಲವೇ ಕ್ಷಣಗಳಲ್ಲಿ ಭೂಮಿ ಮೇಲ್ಮೈ ವಾತಾವರಣ ದಾಟಿ ಸಾಗುತ್ತದೆ. ಆ ಬಳಿಕ ವಿವಿಧ ಹಂತಗಳಲ್ಲಿ ಇಂಧನ ದಹಿಸಿಕೊಂಡು ಮುಂದೆ ಸಾಗುತ್ತದೆ. ರಾಕೆಟ್‌ ಹೇಗೆ ತನ್ನ ಇಂಧನ ಖಾಲಿಯಾದ ಬಳಿಕ ಒಂದೊಂದೇ ಟ್ಯಾಂಕ್‌ ಅನ್ನು ಕಳಚಿ ಮುಂದೆ ಸಾಗುತ್ತದೆಯೋ ಅದೇ ರೀತಿ ಈ ಕ್ಷಿಪಣಿಯೂ ಸಾಗುತ್ತದೆ. ಆ ಬಳಿಕ ಭೂ ವಾತಾವರಣವನ್ನು ಮರುಪ್ರವೇಶಿಸಿ ಮ್ಯಾಕ್‌ 23 ವೇಗದಲ್ಲಿ ಗುರಿಯತ್ತ ಮುನ್ನುಗ್ಗುತ್ತದೆ. ಈ ಕ್ಷಿಪಣಿಗೆ ಗುರಿ ತಲುಪಲು ಕೇವಲ ಅರ್ಧಗಂಟೆ ಸಾಕು. ಹೀಗಾಗಿ ಈ ಕ್ಷಿಪಣಿ ಹೊಡೆದುರುಳಿಸುವುದು ಕಷ್ಟ.