ಪಾಂಡವಪುರ ತಾಲೂಕಿನಲ್ಲಿ ಸಂಭ್ರಮದಿಂದ ನಡೆದ ‘ಮಕರ ಸಂಕ್ರಾಂತಿ’

ಕನ್ನಡಪ್ರಭ ವಾರ್ತೆ ಪಾಂಡವಪುರ

ಹೆಣ್ಣು ಮಕ್ಕಳು ತಮ್ಮ ಮನೆಗಳ ಮುಂದೆ ಸಂಕ್ರಾಂತಿ ಹಬ್ಬದ ಶುಭಾಶಯ ಕೋರುವ ವಿವಿಧ ಬಗೆಯ ಚಿತ್ತಾರದ ರಂಗೋಲಿ ಬಿಡಿಸಿದರು. ಮನೆ ಮುಂದೆ ತಳಿರುತೋರಣ ಹಾಕಲಾಯಿತು.

ಪುರುಷರು ತಮ್ಮ ಮನೆಯಲ್ಲಿದ್ದ ದನ, ಕರು ಸೇರಿದಂತೆ ಇನ್ನಿತರ ಜಾನುವಾರುಗಳ ಮೈತೊಳೆದು, ಎತ್ತುಗಳ ಕೊಂಬಿಗೆ ಬಣ್ಣ ಹಚ್ಚಿ, ಬಣ್ಣಬಣ್ಣದ ಟೇಪ್ ಕಟ್ಟಿ ಸಿಂಗರಿಸಿದರು. ಕುರಿ, ಮೇಕೆಗಳ ಮೈ ಮೇಲೆ ಬಣ್ಣ ಚಲ್ಲಿದರು. ಟಗರು ಕೊಂಬಿಗೂ ಬಣ್ಣ ಬಳಿದರು.

ಸಂಜೆ ತಮ್ಮೂರಿನ ದೇವಸ್ಥಾನದ ಬಳಿ ಎತ್ತುಗಳಿಗೆ ಕಿಚ್ಚು ಹಾಯಿಸಲು ಹೊಸ ಬೆಳೆಯ ಭತ್ತದ ಹುಲ್ಲು, ಕಬ್ಬಿನ ತರಗು ಹಾಕಿ ಸಿದ್ದಗೊಳಿಸಿದ್ದರು. ಎತ್ತುಗಳು ಸೇರಿದಂತೆ ಹಲವು ಜಾನುವಾರುಗಳನ್ನು ಹಿಡಿದು ಬಂದ ರೈತರು ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸಿದರು. ಸೂರ್ಯ ಮುಳುಗುತ್ತಿದ್ದಂತೆ ಹುಲ್ಲಿಗೆ ಬೆಂಕಿ ಹೊತ್ತಿಸಲಾಯಿತು. ಹರಹರ ಮಹಾದೇವ ಎಂದು ಕೂಗುತ್ತಾ ರೈತರು ಎತ್ತುಗಳನ್ನು ಹುರಿದುಂಬಿಸಿ ಕಿಚ್ಚು ಹಾಯಿಸಿದರು.

ಕಿಚ್ಚು ಹಾಯಿಸಿ ಮನೆಗೆ ಬಂದ ಎತ್ತುಗಳಿಗೆ ರೈತ ಮಹಿಳೆಯರು ಪಾದ ತೊಳೆದು ನಮಸ್ಕಾರ ಮಾಡಿ, ಪೂಜೆ ಮಾಡಿದರು. ಬಳಿಕ ಎತ್ತುಗಳಿಗೆ ಪೊಂಗಲ್ ತಿನ್ನಿಸಿದರು. ಸಂಕ್ರಾಂತಿ ಹಬ್ಬದ ಪ್ರಯುಕ್ತ ಸಿಹಿ ಮತ್ತು ಖಾರ ಪೊಂಗಲ್, ಇಡ್ಲಿ, ವಡೆ, ಪಾಯಸ ಸೇರಿದಂತೆ ಇನ್ನಿತರ ಹಲವು ವಿಶೇಷ ಭೋಜನ ಸವಿದರು.