೨ಕೋಟಿ ರಸ್ತೆ ಕಾಮಗಾರಿಗೆ ಗ್ರಹಣ

ಶಿವಾನಂದ ಪಿ.ಮಹಾಬಲಶೆಟ್ಟಿ

ರಬಕವಿಯಿಂದ ರಾಮಪುರ ಮಾರ್ಗವಾಗಿ ಬನಹಟ್ಟಿಗೆ ತೆರಳುವ ರಾಜ್ಯ ಹೆದ್ದಾರಿಗೆ ಸೇರಿದ ಸುಮಾರು ೧.೪ ಕಿಮೀ ಉದ್ದದ ರಸ್ತೆ ಕಾಮಗಾರಿಗೆ ಕಳೆದ ೨೨ತಿಂಗಳ ಹಿಂದೆ ಭೂಮಿಪೂಜೆ ನೆರವೇರಿತ್ತು. ಕಾಮಗಾರಿ ಆದೇಶಪತ್ರ ಪಡೆದು ಎರಡು ಬಾರಿ ನೀತಿಸಂಹಿತೆ ಬಳಿಕ ಬಂದ ನೂತನ ರಾಜ್ಯ ಸರ್ಕಾರದಿಂದ ಮಂಜೂರಾಗಿದ್ದ ₹೨ಕೋಟಿ ಮೊತ್ತ ಸ್ಥಗಿತಗೊಂಡ ಕಾರಣ ಕಾಮಗಾರಿ ಚಾಲನೆಗೊಂಡಿರಲಿಲ್ಲ. ಬಳಿಕ ಶಾಸಕ ಸಿದ್ದು ಸವದಿ ಹೋರಾಟದ ಫಲವಾಗಿ ಹಿಂದಿನ ಸರ್ಕಾರದಲ್ಲಿ ಮಂಜೂರಾತಿ ಪಡೆದು ಅನುದಾನ ಬಿಡುಗಡೆಯಾಗಿದ್ದರೂ ಹೊಸ ಸರ್ಕಾರ ನಿಲ್ಲಿಸಿದ್ದ ಕಾಮಗಾರಿ ನಡೆಸಲೇಬೇಕೆಂದು ಬಿಗಿಪಟ್ಟು ಹಿಡಿದಾಗ ಮೊದಲಿನ ಅನುದಾನ ದೊರೆಯಿತಾದರೂ ಮತ್ತೆ ಲೋಕಸಭೆ ಚುನಾವಣೆ ನೀತಿ ಸಂಹಿತೆ ಕಾರಣ ಕೆಲಸಕ್ಕೆ ವಕ್ರದೃಷ್ಟಿ ಬಿತ್ತು.

ಭರಪೂರ ಮಳೆಯಾದರೆ ಭತ್ತದ ಗದ್ದೆಯಂತೆ, ಕೊಂಚ ಮಳೆಯಾದರೆ ಜಾರುಬಂಡೆಯಾಗಿ ಮತ್ತು ಬಿಸಿಲಲ್ಲಿ ಧೂಳು ಹಿಡಿಯುತ್ತದೆ. ಈ ರಸ್ತೆಯ ಎರಡೂ ಬದಿಯ ಅಂಗಡಿ, ಮನೆ ಮತ್ತು ವಾಹನ ಸಂಚಾರರಿಗೆ ಈ ರಸ್ತೆಯಿಂದಾಗಿ ನೆಮ್ಮೆದಿಯೇ ಇಲ್ಲದಂತಾಗಿದೆ. ಬೇಸಿಗೆ ಮತ್ತು ಚಳಿಗಾಲದಲ್ಲಿ ಧೂಳು ಮನೆಯನ್ನೇ ಆವರಿಸಿಕೊಂಡಿರುತ್ತದೆ. ಜೂನ್-೨೧ ಹಾಗೂ ಜು.೧೨ರಂದು ಸಚಿತ್ರ ವರದಿ ಪ್ರಕಟಿಸಿದ್ದ ಕನ್ನಡಪ್ರಭ ವರದಿ ಬಳಿಕ ಕಾಮಗಾರಿ ಚುರುಕಾಗಿ ಸಾಗಿ ಮೆಟ್ಲಿಂಗ್, ಚರಂಡಿ ಕಾಮಗಾರಿ ಪೂರ್ಣಗೊಂಡ ಬಳಿಕ ರಸ್ತೆಯುದ್ದಕ್ಕೂ ದಪ್ಪ ಖಡಿ ಹಾಕಿ ಒಂದೆರಡು ದಿನ ರೋಲರ್ ಆಡಿಸಿ ಗುತ್ತಿಗೆದಾರ ಮತ್ತೆ ಕಾಮಗಾರಿ ಸ್ಥಗಿತಗೊಳಿಸಿದ್ದಾರೆ. ಕರೆ ಮಾಡಿದರೆ ಕರೆ ಸ್ವೀಕರಿಸುತ್ತಿಲ್ಲ.

ಲೋಕಕಂಟಕವಾಗಿ ಪರಿಣಮಿಸಿದ ಲೋಕೋಪಯೋಗಿ ಇಲಾಖೆಯಲ್ಲಿ ದಕ್ಷ ಅಧಿಕಾರಿಗಳು ಇದ್ದಲ್ಲಿ, ಇಲ್ಲವೇ ಜಿಲ್ಲಾಧಿಕಾರಿಗಳು ಸ್ವತಃ ಸ್ಥಳಕ್ಕೆ ಬಂದು ಪರಿಶೀಲಿಸಿ ಪೂರ್ಣಗೊಳಿಸದೇ ಬಿಟ್ಟ ಕಾರಣ ರಸ್ತೆ ಅವ್ಯವಸ್ಥೆಯ ಆಗರವಾಗುತ್ತಿದೆ. ಮೆಟ್ಲಿಂಗ್ ಕಾಮಗಾರಿಯೂ ಕಿತ್ತು ಬರುತ್ತಿದೆ. ಸಕಾಲದಲ್ಲಿ ಕಾಮಗಾರಿ ಪೂರ್ಣಗೊಳಿಸದೇ ನಾಗರಿಕರ ತೆರಿಗೆ ಹಣವನ್ನು ಪೋಲು ಮಾಡುತ್ತಿರುವವರ ವಿರುದ್ಧ ಕ್ರಮ ಜರುಗಿಸಿ ಕಾಮಗಾರಿ ಗುಣಮಟ್ಟದಿಂದ ನಡೆಸುವಂತೆ ಮತ್ತು ಅವಧಿ ಮುಗಿದರೂ ಕಾಮಗಾರಿ ಮುಗಿಯದ ಬಗ್ಗೆ ಎಡಬ್ಲ್ಯೂಇ ಮತ್ತು ಗುತ್ತಿಗೆದಾರರಿಗೆ ಎಚ್ಚರಿಕೆ ನೀಡಿ, ಸತತ ಕಾಮಗಾರಿ ನಡೆಸಿ ಪೂರ್ಣಗೊಳಿಸಲು ಆದೇಶಿಸಬೇಕೆಂದು ಬೇಸತ್ತಿರುವ ನಾಗರಿಕರು ಆಗ್ರಹಿಸಿದ್ದಾರೆ.