ಉತ್ತರ ಕನ್ನಡಕ್ಕೆ ಕಹಿ ಘಟನೆಗಳ ನೆನಪನ್ನು ಬಿಟ್ಟುಹೋಗುತ್ತಿರುವ 2024

ಕಾರವಾರ: ಅಂಕೋಲಾ ತಾಲೂಕಿನ ಶಿರೂರಿನಲ್ಲಿ ಗುಡ್ಡಕುಸಿದು ೧೧ ಜನ ಕಣ್ಮರೆಯಾದ ಭಾರೀ ದುರಂತಕ್ಕೆ ೨೦೨೪ ಸಾಕ್ಷಿಯಾಗಿದೆ. ಉತ್ತರ ಕನ್ನಡ ಜಿಲ್ಲೆಯಲ್ಲಿ ೨೦೨೪ನೇ ಸಾಲಿನಲ್ಲಿ ಪ್ರಾಕೃತಿಕವಾಗಿ ಸಾಕಷ್ಟು ಅಹಿತಕರ ಘಟನಾವಳಿಗಳು ನಡೆದುಹೋಗಿದೆ. ವಿವಿಧ ಕ್ಷೇತ್ರದಲ್ಲಿ ಸಾಧನೆಗೈದವರನ್ನು ಕಳೆದುಕೊಂಡಿದೆ.

ಆ. ೭ರಂದು ಮಧ್ಯರಾತ್ರಿ ಕಾರವಾರದಲ್ಲಿ ಹರಿಯುವ ಕಾಳಿ ನದಿಗೆ ಅಡ್ಡಲಾಗಿ ಕಟ್ಟಲಾದ ಸೇತುವೆ ಕುಸಿದು ಬಿದ್ದು, ಸೇತುವೆ ಮೇಲೆ ಸಾಗುತ್ತಿದ್ದ ಒಂದು ಲಾರಿ, ಅದರ ಚಾಲಕ ನದಿಯಲ್ಲಿ ಬಿದ್ದಿದ್ದರು. ಅಂದಾಜು ೪೦ ವರ್ಷಗಳ ಹಿಂದೆ ಈ ಸೇತುವೆಯನ್ನು ನಿರ್ಮಿಸಲಾಗಿತ್ತು.

ಜನವರಿ ತಿಂಗಳ ಅಂತ್ಯದಲ್ಲಿ ಶಿರಸಿಯ ಟಿಎಸ್‌ಎಸ್ ರೂವಾರಿ, ಹಿರಿಯ ಸಹಕಾರಿ ಶಾಂತಾರಾಮ ಹೆಗಡೆ ಶೀಗೇಹಳ್ಳಿ ನಿಧನರಾದರು. ಶಿರಸಿ ತಾಲೂಕಿನ ಮುಂಡಗನಮನೆ ಸೇವಾ ಸಹಕಾರಿ ಸಂಘಕ್ಕೆ ೧೯೭೬ರಲ್ಲಿ ಅಧ್ಯಕ್ಷರಾಗಿ, ೧೯೯೫ರಿಂದ ಟಿಎಸ್‌ಎಸ್ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಿದ್ದರು. ಇದಲ್ಲದೇ ಕೆಡಿಸಿಸಿ ಬ್ಯಾಂಕ್, ಜಿಲ್ಲಾ ಕಾಂಗ್ರೆಸ್, ಶಿರಸಿಯ ಮಾಡನ್ ಎಜ್ಯುಕೇಶನ್ ಸೊಸೈಟಿ (ಎಂಇಎಸ್) ಅಧ್ಯಕ್ಷರಾಗಿ ಕೂಡಾ ಸೇವೆ ಸಲ್ಲಿಸಿದ್ದರು. ಫೆಬ್ರವರಿಯಲ್ಲಿ ಹಿರಿಯ ಸಾಹಿತಿ, ಪ್ರಕಾಶಕ ವಿಷ್ಣು ನಾಯ್ಕ ನಿಧನರಾದರು. ಅಂಕೋಲಾ ತಾಲೂಕಿನ ಅಂಬಾರಕೊಡ್ಲು ಊರಿನವರಾದ ವಿಷ್ಣು ನಾಯ್ಕ ಸಾಹಿತ್ಯ ಕ್ಷೇತ್ರದಲ್ಲಿ ತಮ್ಮದೇ ಆದ ಛಾಪು ಮೂಡಿದ್ದಾರೆ. ರಾಘವೇಂದ್ರ ಪ್ರಕಾಶನ ಸ್ಥಾಪನೆ ಕೂಡಾ ಮಾಡಿ ಸಾಕಷ್ಟು ಪುಸ್ತಕಗಳನ್ನು ಪ್ರಕಟಿಸಿದ್ದಾರೆ. ಸಹಕಾರಿ ಹಾಗೂ ಸಾಹಿತ್ಯಕ್ಷೇತ್ರದ ಸಾಧಕರನ್ನು ಜಿಲ್ಲೆ ಕಳೆದುಕೊಂಡಂತಾಗಿದೆ.

ಫೆಬ್ರವರಿ ಮೊದಲ ವಾರಲ್ಲಿ ಭಟ್ಕಳದಿಂದ ಕುಮಟಾ ವರೆಗೆ ಹೋರಾಟಗಾರ ಅನಂತಮೂರ್ತಿ ಹೆಗಡೆ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಗಾಗಿ ಪಾದಯಾತ್ರೆ ನಡೆಸಿದರು.

ಏ. ೨೯ರಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಬಿಜೆಪಿಯಿಂದ ಉತ್ತರ ಕನ್ನಡ ಲೋಕಸಭಾ ಕ್ಷೇತ್ರಕ್ಕೆ ಸ್ಪರ್ಧಿಸಿದ್ದ ವಿಶ್ವೇಶ್ವರ ಹೆಗಡೆ ಕಾಗೇರಿ ಪರ ಪ್ರಚಾರ ನಡೆಸಿದರು.

ಮೇ ತಿಂಗಳಲ್ಲಿ ಭಟ್ಕಳದ ಕಡವಿನಕಟ್ಟೆ ಹೊಳೆಯಲ್ಲಿ ಮುಳುಗಿ ಇಬ್ಬರು ಮೃತಪಟ್ಟಿದ್ದರು. ಹೊಳೆಯಲ್ಲಿ ಆಕಸ್ಮಿಕವಾಗಿ ಯುವಕ ಬಿದ್ದಿದ್ದು, ಅದನ್ನು ನೋಡಿದ ಮಹಿಳೆ ಆತನ ರಕ್ಷಣೆಗೆ ಹೋಗಿ ಅವರೂ ಮುಳುಗಿ ಮೃತಪಟ್ಟ ಘಟನೆ ನಡೆದಿದೆ. ಇದೇ ತಿಂಗಳಲ್ಲಿ ಹೊನ್ನಾವರ ತಾಲೂಕಿನ ಗುಳದಕೇರಿಯಲ್ಲಿ ಜ್ಯುವೆಲರಿ ಅಂಗಡಿಯೊಂದರಲ್ಲಿ ₹೧೪.೫೫ ಲಕ್ಷದ ಚಿನ್ನ, ₹೧೧ ಲಕ್ಷದ ಬೆಳ್ಳಿ ಕಳ್ಳತನ ನಡೆಸಿದ್ದ ೭ ಜನರ ಆರೋಪಿತರನ್ನು ಪೊಲೀಸರು ಹೆಡೆಮುರಿಕಟ್ಟಿದ್ದರು. ಕಾರವಾರ ಅರ್ಬನ್ ಬ್ಯಾಂಕಿನಲ್ಲಿ ₹೫೦ ಕೋಟಿಗೂ ಅಧಿಕ ಮೊತ್ತದ ಹಗರಣ ಆಗಿರುವುದು ಬೆಳಕಿಗೆ ಬಂದಿತ್ತು. ೧೦ ವರ್ಷದಿಂದ ಅವ್ಯವಹಾರ ನಡೆದರೂ ಆಡಳಿತ ಮಂಡಳಿ ಗಮನಕ್ಕಿಲ್ಲ.