ಮಂತ್ರಾಲಯಕ್ಕೆ 24ನೇ ವರ್ಷದ ಪಾದಯಾತ್ರೆ

ಕನಕಗಿರಿ: ಪಟ್ಟಣದ ಪ್ರತಾಪರಾಯ, ಕನಕಾಚಲಪತಿ ಹಾಗೂ ಶ್ರೀ ರಾಘವೇಂದ್ರಸ್ವಾಮಿ ಭಜನಾ ಸಂಘದ ಸಹಯೋಗದಲ್ಲಿ ಮಕರ ಸಂಕ್ರಾಂತಿ ಅಂಗವಾಗಿ ಭಕ್ತರು ಶ್ರೀ ಕ್ಷೇತ್ರ ಮಂತ್ರಾಲಯಕ್ಕೆ ೨೪ನೇ ವರ್ಷದ ಪಾದಯಾತ್ರೆ ಆರಂಭಿಸಿದರು.

ಸಂಘದ ಅಧ್ಯಕ್ಷ ರಾಮಣ್ಣ ಗುಂಜಳ್ಳಿ ಮಾತನಾಡಿ, ರಾಜ್ಯಕ್ಕೆ ಕರ್ನಾಟಕವೆಂದು ನಾಮಕರಣವಾಗಿ ೫೦ ವರ್ಷ ಪೂರೈಸಿದ ಹಿನ್ನೆಲೆ ಕನ್ನಡಾಂಬೆಯ ಭಾವಚಿತ್ರ ಹಾಗೂ ಸರ್ಕಾರ ಬಿಡುಗಡೆಗೊಳಿಸಿದ ೫೦ನೇ ಸಂಭ್ರಮದ ಲಾಂಛನವನ್ನು ವಾಹನಗಳಿಗೆ ಕಟ್ಟಿಕೊಂಡು ಕನ್ನಡ ಉಳಿಸಿ, ಬೆಳೆಸುವ ನಮ್ಮ ಸಂಘದ ವಿನೂತನ ಪ್ರಯತ್ನಕ್ಕೆ ಕನ್ನಡಾಭಿಮಾನಿಗಳು ಪ್ರಶಂಶೆ ವ್ಯಕ್ತಪಡಿಸಿದ್ದಾರೆ. ಈ ನಿಟ್ಟಿನಲ್ಲಿ ಆಂಧ್ರ ಪ್ರದೇಶದ ಕೋಸಿಗಿ, ಡಿ. ಬೆಳಗಲ್, ಉರುಕುಂದ ಗ್ರಾಮಗಳಲ್ಲಿಯೂ ಕನ್ನಡ ಜಾಗೃತಿ ಮೂಡಿಸಲಾಗುವುದು ಎಂದರು.

ಪಪಂ ಸದಸ್ಯ ಶರಣೇಗೌಡ, ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘದ ನಿರ್ದೇಶಕ ಸಿಂಧು ಬಲ್ಲಾಳ್, ಪ್ರಮುಖರಾದ ಭೀಮರೆಡ್ಡಿ ಓಣಿಮನಿ, ಸುರೇಶಪ್ಪ ಬೊಂದಾಡೆ, ಶ್ರೀನಿವಾಸರೆಡ್ಡಿ ಓಣಿಮನಿ, ವಿನಯ ಪತ್ತಾರ, ರಾಮಣ್ಣ ಪೂಜಾರ, ಶಿವಪ್ಪ ಅಂಕಸದೊಡ್ಡಿ, ವೀರೇಶ ವಸ್ತ್ರದ, ನಾಗರೆಡ್ಡಿ ಮಾದಿನಾಳ, ಶರಣಪ್ಪ ಕೊರೆಡ್ಡಿ, ಶರಣಪ್ಪ ಭಾವಿಕಟ್ಟಿ, ರವಿ ಪಾಟೀಲ್ ಇತರರು ಇದ್ದರು.