ಹಳಿಯಾಳ ಅಭಿವೃದ್ಧಿ ಕಾಮಗಾರಿಗೆ ₹29 ಕೋಟಿ ಮಂಜೂರು: ಶಾಸಕ ಆರ್.ವಿ. ದೇಶಪಾಂಡೆ

ಹಳಿಯಾಳ; ಬಾಂದಾರು ನಿರ್ಮಾಣ, ಕಾಲುವೆ ಕಾಮಗಾರಿ, ಏತ ನೀರಾವರಿ, ರಸ್ತೆ ಕಾಮಗಾರಿ, ಶಾಲಾ ಕೊಠಡಿಗಳ ನಿರ್ಮಾಣ ಹಾಗೂ ಗೋಶಾಲಾ ಅಭಿವೃದ್ಧಿ ಸೇರಿದಂತೆ ವಿವಿಧ ಕಾಮಗಾರಿಗಳಿಗೆ ₹29.35 ಕೋಟಿ ಅನುದಾನ ಮಂಜೂರಾಗಿದೆ ಎಂದು ಶಾಸಕ ಆರ್.ವಿ. ದೇಶಪಾಂಡೆ ಹೇಳಿದರು.

ಚಿಕ್ಕ ನೀರಾವರಿ ಇಲಾಖೆಯ ವಿವಿಧ 10 ಅಭಿವೃದ್ಧಿ ಕಾಮಗಾರಿಗಳಿಗೆ ₹17 ಕೋಟಿ ಅನುದಾನ ಮಂಜೂರಾಗಿದೆ ಎಂದು ತಿಳಿಸಿದರು. ಜನಗಾ ಕ್ರಾಸ್ ಮೇಲ್ಭಾಗದಲ್ಲಿ ಬಾಂದಾರ್ ನಿರ್ಮಾಣಕ್ಕೆ ₹1 ಕೋಟಿ, ವಾಟ್ನಾಳ್ ಕ್ರಾಸ್ ಕೆಳಭಾಗದ ಮಿರಾಶಿ ಹೊಲದ ಹತ್ತಿರ ಬಾಂದಾರ ನಿರ್ಮಾಣಕ್ಕೆ ₹2 ಕೋಟಿ, ಸಂಕನಕೊಪ್ಪ ಹತ್ತಿರ ಮಂಗಳಿ ಹಳ್ಳಕ್ಕೆ ಬಾಂದಾರ್ ನಿರ್ಮಾಣಕ್ಕೆ ₹1 ಕೋಟಿ, ಜೋಯಿಡಾ ತಾಲೂಕಿನ ಮಾರಸಂಗಳ ಹತ್ತಿರ ಬಿಸಿಬಿ ನಿರ್ಮಾಣಕ್ಕೆ ₹2 ಕೋಟಿ, ಹಳಿಯಾಳದ ಬಾಮನಿಕೊಪ್ಪ ಹತ್ತಿರದ ಏತ ನೀರಾವರಿ ಯೋಜನೆ ಪುನುರುಜ್ಜೀವನ ಕಾಮಗಾರಿಗೆ ₹6 ಕೋಟಿ, ದುರ್ಗದಹಳ್ಳ ಕೆರೆಯ ಕಾಲುವೆಗೆ ತಡೆಗೊಡೆ ನಿರ್ಮಾಣಕ್ಕೆ ₹1 ಕೋಟಿ, ಹಾರವಳ್ಳಿ ಕೆರೆಯ ಕಾಲುವೆಗೆ ₹1 ಕೋಟಿ, ಕಾವಲವಾಡ ಕೆರೆ ಕಾಲುವೆಗೆ ತಡೆಗೋಡೆ ಸಹಿತ ಕಾಲುವೆ ನಿರ್ಮಾಣ ಕಾಮಗಾರಿಗೆ ₹1 ಕೋಟಿ, ಅಂಬಡಗಾ ಕೆರೆ ಸುಧಾರಣೆಗೆ ₹2 ಕೋಟಿ ಅನುದಾನ ಮಂಜೂರಾಗಿದೆ ಎಂದರು.

ದಾಂಡೇಲಿಯಲ್ಲಿರುವ ಎಪಿಜೆ ಅಬ್ದುಲ್ ಕಲಾಂ ಅಲ್ಪಸಂಖ್ಯಾತರ ಶಾಲೆಯ ಸಿಬ್ಬಂದಿ ವಸತಿ ಗೃಹ ನಿರ್ಮಾಣಕ್ಕಾಗಿ ₹6.75 ಕೋಟಿ ಮಂಜೂರಾಗಿದೆ ಎಂದರು.

ಮುಖ್ಯಮಂತ್ರಿ ಪರಿಹಾರ ನಿಧಿಯಲ್ಲಿ 6 ಫಲಾನುಭವಿಗಳಿಗೆ ಪರಿಹಾರ ಮಂಜೂರಾಗಿದೆ. ಇತ್ತೀಚೆಗಷ್ಟೇ ಕೆರೆಯಲ್ಲಿ ಮುಳಗಿ ಮೃತಪಟ್ಟ ಬಾಲಕ ಬೇಪಾರಿ ಕುಟುಂಬಕ್ಕೆ ವಿಶೇಷ ಪ್ರಕರಣದಡಿ ₹2 ಲಕ್ಷ ಮಂಜೂರಾಗಿದೆ ಎಂದು ದೇಶಪಾಂಡೆ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಕೆಪಿಸಿಸಿ ಸದಸ್ಯ ಸುಭಾಸ್ ಕೊರ್ವೆಕರ, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಕೃಷ್ಣ ಪಾಟೀಲ, ಪ್ರಮುಖರಾದ ಉಮೇಶ ಬೊಳಶೆಟ್ಟಿ, ಎಚ್.ಬಿ. ಪರಶುರಾಮ, ಎಸ್.ಜಿ.ಮಾನಗೆ ಇದ್ದರು.