ಕೃಷ್ಣನ ರೂಪದಲ್ಲಿ ಕೆವೈಎಂ ಕಾ ರಾಜಾನ ದರ್ಶನ

ಹುಬ್ಬಳ್ಳಿ: ಇಲ್ಲಿನ ಹಳೆಹುಬ್ಬಳ್ಳಿಯ ಚೆನ್ನಪೇಟೆಯ ನಾರಾಯಣಪೇಟೆಯಲ್ಲಿ ಕೊತ್ಲಮ್ಮಾದೇವಿ ಯುವಕ ಮಂಡಳ (ಕೆವೈಎಂ) ದಿಂದ ಪ್ರತಿಷ್ಠಾಪಿಸಲಾಗಿರುವ "ಕೆವೈಎಂ ಕಾ ರಾಜಾ " ಈ ಬಾರಿ ಕೊಳಲನೂದುತ್ತಿರುವ ಕೃಷ್ಣನ ರೂಪದಲ್ಲಿ ಕಂಗೊಳಿಸುತ್ತಿದ್ದಾನೆ.

ಕೃಷ್ಣನ ರೂಪದಲ್ಲಿ ವಿಘ್ನೇಶ್ವರ: ಪ್ರತಿ ವರ್ಷವೂ ಒಂದೊಂದು ಅವತಾರದಲ್ಲಿ ಇಲ್ಲಿನ ವಿಘ್ನೇಶ್ವರ ಭಕ್ತರಿಗೆ ಆಶೀರ್ವದಿಸುತ್ತಾನೆ. 25 ವರ್ಷಗಳಲ್ಲಿ ಈಶ್ವರನ ರೂಪ, ಮಹಾರಾಜಾ, ಕಾಳಿಕಾ ರೂಪಿ ವಿನಾಯಕ, ಮೂಷಿಕನ ಮೇಲೆ ಸಂಚಾರಿ ಗಣೇಶ, ಗರುಡ ಸಂಚಾರಿ ಗಣಪ, ಪ್ರಧಾನಿ ನರೇಂದ್ರ ಮೋದಿ ರೂಪಿ ವಿಘ್ನೇಶ್ವರ ಹೀಗೆ ಹಲವು ಅವತಾರಗಳಲ್ಲಿ ಭಕ್ತರಿಗೆ ದರ್ಶನ ನೀಡಿದ್ದಾನೆ. ಈ ಬಾರಿ ಸುಮಾರು 11 ಅಡಿ ಎತ್ತರದಲ್ಲಿ ಕೊಳಲು ಊದುತ್ತಿರುವ ಶ್ರೀಕೃಷ್ಣ ರೂಪಿ ಗಣೇಶನನ್ನು ಪ್ರತಿಷ್ಠಾಪಿಸಲಾಗಿದೆ.

ಓಣಿಯ ಎಲ್ಲ ಹಿರಿಯರ ಸಹಕಾರದಲ್ಲಿ ಪ್ರತಿವರ್ಷ ಅದ್ಧೂರಿಯಾಗಿ 9 ದಿನಗಳ ಕಾಲ ಗಣೇಶ ಪ್ರತಿಷ್ಠಾಪಿಸಲಾಗುತ್ತಿದೆ. 8ನೇ ದಿನಕ್ಕೆ ಗಣಹೋಮ, ಸತ್ಯನಾರಾಯಣ ಪೂಜೆ, ಅನ್ನಸಂತರ್ಪಣೆ ಮಾಡಲಾಗುತ್ತಿದೆ. 9ನೇ ದಿನಕ್ಕೆ ಮೂರ್ತಿಯ ವಿಸರ್ಜನೆ ಮಾಡಲಾಗುವುದು ಎಂದು ಕೊತ್ಲಮ್ಮಾದೇವಿ ಯುವಕ ಮಂಡಳದ ಅಧ್ಯಕ್ಷ ವಿಶಾಲ್ ಹಬೀಬ ಹೇಳಿದರು.