ಸಾವಿರಾರು ಮೈಲುಗಳ ದೂರದಲ್ಲಿದ್ದರೂ ಕನ್ನಡದ ನಂಟು ಕಿಂಚಿತ್ತೂ ಸಡಿಲವಾಗಿಲ್ಲ ಎಂಬುದನ್ನು ಜಗತ್ತಿಗೆ ಸಾರಿದ ಅಕ್ಕ ವಿಶ್ವ ಕನ್ನಡ ಸಮ್ಮೇಳನದ ರಜತ ಮಹೋತ್ಸವಕ್ಕೆ ಭಾನುವಾರ ಅದ್ದೂರಿ ತೆರೆ ಬಿದ್ದಿತು
ಕನ್ನಡಪ್ರಭ ವಾರ್ತೆ, ಫಿಲಡೆಲ್ಫಿಯಾ:
ಸಾವಿರಾರು ಮೈಲುಗಳ ದೂರದಲ್ಲಿದ್ದರೂ ಕನ್ನಡದ ನಂಟು ಕಿಂಚಿತ್ತೂ ಸಡಿಲವಾಗಿಲ್ಲ ಎಂಬುದನ್ನು ಜಗತ್ತಿಗೆ ಸಾರಿದ ಅಕ್ಕ ವಿಶ್ವ ಕನ್ನಡ ಸಮ್ಮೇಳನದ ರಜತ ಮಹೋತ್ಸವಕ್ಕೆ ಭಾನುವಾರ ಅದ್ದೂರಿ ತೆರೆ ಬಿದ್ದಿತು. ಮೂರು ದಿನಗಳ ಕಾಲ ಅಮೆರಿಕದ ನೆಲದಲ್ಲಿ ಕನ್ನಡದ ಕಂಪು, ಸಂಸ್ಕೃತಿಯ ಸೊಗಡು ಮತ್ತು ಕಲೆಯ ವೈಭವವನ್ನು ಅನಾವರಣಗೊಳಿಸಿದ ಸಮ್ಮೇಳನ, ವಿಶ್ವ ಕನ್ನಡಿಗರ ಪಾಲಿಗೆ ಅವಿಸ್ಮರಣೀಯ ಕ್ಷಣಗಳನ್ನು ಕಟ್ಟಿಕೊಟ್ಟಿತು.ಕರ್ನಾಟಕದ ಗಡಿ ದಾಟಿ ವಿಶ್ವದ ಮೂಲೆಮೂಲೆಗಳಲ್ಲಿ ನೆಲೆಸಿರುವ ಕನ್ನಡಿಗರನ್ನು ಒಂದೇ ವೇದಿಕೆಯಡಿ ತಂದ ಅಕ್ಕ ಸಮ್ಮೇಳನದ 25ನೇ ವರ್ಷದ ಸಂಭ್ರಮಕ್ಕೆ ಈ ಬಾರಿಯ ರಜತ ಮಹೋತ್ಸವ ವಿಶೇಷ ಮೆರುಗು ನೀಡಿತು. ಅಮೆರಿಕದ ವಿವಿಧ ರಾಜ್ಯಗಳು ಮಾತ್ರವಲ್ಲದೆ, ಹಲವು ದೇಶಗಳಿಂದ ಆಗಮಿಸಿದ್ದ ಕನ್ನಡಿಗರು ಕನ್ನಡದ ಹಬ್ಬದಲ್ಲಿ ಸಂಭ್ರಮದಿಂದ ಪಾಲ್ಗೊಂಡರು.
ಕನ್ನಡಕ್ಕೆ ಭೌಗೋಳಿಕ ಗಡಿ ಇಲ್ಲ; ಕನ್ನಡಿಗನ ಹೃದಯವೇ ಅದರ ನಿಜವಾದ ಗಡಿ ಎಂಬ ಸಂದೇಶ ಸಮ್ಮೇಳನದ ಉದ್ದಕ್ಕೂ ಪ್ರತಿಧ್ವನಿಸಿತು. ನಾಡು-ನುಡಿ, ಸಾಹಿತ್ಯ, ಸಂಗೀತ, ನೃತ್ಯ, ರಂಗಭೂಮಿ, ಚಲನಚಿತ್ರ, ಜನಪದ ಕಲೆ ಸೇರಿದಂತೆ ಕನ್ನಡದ ವೈವಿಧ್ಯಮಯ ಸಾಂಸ್ಕೃತಿಕ ಲೋಕ ಮೂರು ದಿನಗಳ ಕಾಲ ಫಿಲಡೆಲ್ಫಿಯಾದಲ್ಲಿ ಅನಾವರಣಗೊಂಡಿತು.ಕನ್ನಡದ ಕಲೆ-ಸಾಹಿತ್ಯದ ವೈಭವ
ಸಮ್ಮೇಳನದ ಅಂಗವಾಗಿ ನಡೆದ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ಪ್ರೇಕ್ಷಕರ ಗಮನ ಸೆಳೆದವು. ಕನ್ನಡದ ಶಾಸ್ತ್ರೀಯ ಹಾಗೂ ಜನಪದ ಪರಂಪರೆಯೊಂದಿಗೆ ಸಮಕಾಲೀನ ಸೃಜನಶೀಲತೆಯೂ ವೇದಿಕೆಯಲ್ಲಿ ಮೇಳೈಸಿತು. ಸಾಹಿತ್ಯಿಕ ಚರ್ಚೆಗಳು, ವಿಚಾರಗೋಷ್ಠಿಗಳು, ಪುಸ್ತಕ ಬಿಡುಗಡೆ, ಸಂಗೀತ ಮತ್ತು ನೃತ್ಯ ಕಾರ್ಯಕ್ರಮಗಳು ಕನ್ನಡದ ಸಾಂಸ್ಕೃತಿಕ ಶ್ರೀಮಂತಿಕೆಯನ್ನು ಪರಿಚಯಿಸಿದವು.ಕನ್ನಡ ಚಿತ್ರರಂಗಕ್ಕೂ ಸಮ್ಮೇಳನದಲ್ಲಿ ವಿಶೇಷ ಸ್ಥಾನ ದೊರೆಯಿತು. ಕನ್ನಡ ಸಿನಿಮಾಗಳ ಪ್ರದರ್ಶನದ ಮೂಲಕ ವಿದೇಶಿ ನೆಲದಲ್ಲಿರುವ ಕನ್ನಡಿಗರಿಗೆ ತಮ್ಮ ನೆಲದ ಕಥೆ, ಭಾಷೆ ಮತ್ತು ಬದುಕಿನೊಂದಿಗೆ ಮತ್ತೊಮ್ಮೆ ಬೆಸೆದುಕೊಳ್ಳುವ ಅವಕಾಶ ದೊರೆಯಿತು.
ಅನ್ನದಾಸೋಹವೂ ಸವಾಲಿನ ವ್ಯವಸ್ಥೆಸಮ್ಮೇಳನಕ್ಕೆ ಆಗಮಿಸಿದ ಸಾವಿರಾರು ಕನ್ನಡಿಗರಿಗೆ ಮೂರು ದಿನಗಳ ಕಾಲ ಊಟೋಪಚಾರದ ವ್ಯವಸ್ಥೆಯನ್ನೂ ಅಚ್ಚುಕಟ್ಟಾಗಿ ನಿರ್ವಹಿಸಲಾಯಿತು. ಪ್ರತಿದಿನ ಬೆಳಗಿನ ಉಪಾಹಾರ, ಮಧ್ಯಾಹ್ನದ ಊಟ ಮತ್ತು ರಾತ್ರಿ ಭೋಜನ ಸೇರಿದಂತೆ ದೊಡ್ಡ ಪ್ರಮಾಣದಲ್ಲಿ ಆಹಾರ ಸಿದ್ಧಪಡಿಸಿ ವಿತರಿಸಲಾಯಿತು. ಈ ಬೃಹತ್ ವ್ಯವಸ್ಥೆಯ ಹಿಂದೆ ನೂರಾರು ಸ್ವಯಂಸೇವಕರ ಶ್ರಮವಿತ್ತು.
ಕಾರ್ಯಕ್ರಮದ ಯಶಸ್ಸಿನ ಹಿಂದೆ ವೇದಿಕೆಯ ಮೇಲೆ ಕಾಣಿಸಿಕೊಂಡ ಗಣ್ಯರಷ್ಟೇ ಅಲ್ಲದೆ, ತೆರೆಮರೆಯಲ್ಲಿ ದುಡಿದ ಸಂಘಟಕರು, ಸ್ವಯಂಸೇವಕರು ಮತ್ತು ವಿವಿಧ ಸಮಿತಿಗಳ ಸದಸ್ಯರ ಕೊಡುಗೆ ಮಹತ್ವದ್ದಾಗಿತ್ತು.ಮುಂದಿನ ಪೀಳಿಗೆಗೆ ಕನ್ನಡದ ಕೊಂಡಿ
ರಜತ ಮಹೋತ್ಸವದ ಸಮಾರೋಪದಲ್ಲಿ ಕನ್ನಡದ ಮುಂದಿನ ಪೀಳಿಗೆಯನ್ನು ರೂಪಿಸುವ ಹೊಣೆಗಾರಿಕೆಯ ಬಗ್ಗೆಯೂ ವಿಶೇಷವಾಗಿ ಚರ್ಚೆ ನಡೆಯಿತು. ಅಮೆರಿಕದಲ್ಲಿ ಹುಟ್ಟಿ ಬೆಳೆದ ಕನ್ನಡ ಮಕ್ಕಳಿಗೆ ಭಾಷೆ, ಸಾಹಿತ್ಯ ಮತ್ತು ಸಂಸ್ಕೃತಿಯ ಪರಿಚಯ ಮಾಡಿಸುವುದು, ಕನ್ನಡ ಶಾಲೆಗಳನ್ನು ಬಲಪಡಿಸುವುದು ಹಾಗೂ ಜಾಗತಿಕ ಮಟ್ಟದಲ್ಲಿ ಕನ್ನಡದ ವ್ಯಾಪ್ತಿಯನ್ನು ವಿಸ್ತರಿಸುವ ಸಂಕಲ್ಪಗಳು ಸಮ್ಮೇಳನದ ಪ್ರಮುಖ ಆಶಯಗಳಾಗಿ ಹೊರಹೊಮ್ಮಿದವು.ಮೂರು ದಿನಗಳ ಕಾಲ ನಡೆದ ಕನ್ನಡದ ಈ ಮಹಾ ಜಾತ್ರೆ ಮುಗಿದರೂ, ಅದರ ನೆನಪುಗಳು ವಿಶ್ವ ಕನ್ನಡಿಗರ ಮನಸ್ಸಿನಲ್ಲಿ ಉಳಿಯಲಿವೆ. ಅಮೆರಿಕದ ನೆಲದಲ್ಲಿ ಮೊಳಗಿದ ಕನ್ನಡದ ಧ್ವನಿ, ಕರ್ನಾಟಕದ ಗಡಿಯನ್ನು ದಾಟಿ ವಿಶ್ವದ ಎಲ್ಲೆಡೆ ಕನ್ನಡದ ಅಸ್ತಿತ್ವವನ್ನು ಸಾರುವ ಹೊಸ ಅಧ್ಯಾಯಕ್ಕೆ ನಾಂದಿ ಹಾಡಿತು.
ರಜತ ಮಹೋತ್ಸವಕ್ಕೆ ತೆರೆ ಬಿದ್ದರೂ, ಕನ್ನಡದ ಪಯಣ ನಿರಂತರ ಎಂಬ ಆಶಯದೊಂದಿಗೆ ಉತ್ಸವ ಕೊನೆಗೊಂಡಿತು.ಅಕ್ಕ ಸಿನಿಗನ್ನಡ ಫಿಲ್ಮ್ ಫೆಸ್ಟಿವಲ್ ಯಶಸ್ವಿಕನ್ನಡಪ್ರಭವಾರ್ತೆ ಫಿಲಡೆಲ್ಫಿಯಾಅಕ್ಕ ಸಮ್ಮೇಳನದ ಅಂಗವಾಗಿ ಸಿನಿಗನ್ನಡ ಫಿಲ್ಮ್ ಫೆಸ್ಟಿವಲ್ ಅದ್ದೂರಿಯಾಗಿ ನಡೆಯಿತು. ಈ ಚಿತ್ರೋತ್ಸವದ ಭಾಗವಾಗಿ ಫಿಲಡೆಲ್ಫಿಯಾ ಕನ್ವೆನ್ಷನ್ ಸೆಂಟರ್ನ ಶಂಕರನಾಗ್ ಸಭಾಂಗಣದಲ್ಲಿ ಹತ್ತು ಸಿನೆಮಾಗಳನ್ನು ಪ್ರದರ್ಶಿಸಲಾಯಿತು. ಇದರೊಂದಿಗೆ ಯಮುನಾ ನಾಗರಾಜ್ ಅವರ ನೇತೃತ್ವದಲ್ಲಿ ನಡೆದ ಕಿರುಚಿತ್ರೋತ್ಸವಕ್ಕೆ ಆಯ್ಕೆಯಾಗಿದ್ದ 23 ಕಿರುಚಿತ್ರಗಳನ್ನೂ ಪ್ರದರ್ಶಿಸಲಾಯಿತು.ಅದ್ದೂರಿ ಸಮಾರೋಪ ಸಮಾರಂಭದಲ್ಲಿ ಅಕ್ಕ ಸಿನಿಗನ್ನಡ ಫಿಲ್ಮ್ ಫೆಸ್ಟಿವಲ್ ಸಂಘಟಕರಾದ ಗೌರೀಶ್ ಅಕ್ಕಿ ಮತ್ತು ದೇವೇಂದ್ರ ಬಡಿಗೇರ್ ಅವರು ಚಿತ್ರೋತ್ಸವದ ಉದ್ದೇಶ, ಆಯೋಜನೆ ಹಾಗೂ ಪ್ರದರ್ಶನಗೊಂಡ ಚಿತ್ರಗಳ ಕುರಿತು ಮಾಹಿತಿ ನೀಡಿದರು.ಈ ಸಂದರ್ಭದಲ್ಲಿ ‘ಮಹಿಮಾ’ ಚಿತ್ರದ ನಿರ್ಮಾಪಕ ನವೀನ್ ಕುಮಾರ್ ಅವರಿಗೆ ವಿಶೇಷ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಯಿತು. ಅಕ್ಕ ಸಮ್ಮೇಳನದ ಅಧ್ಯಕ್ಷ ಮಧು ರಂಗಯ್ಯ ಪ್ರಶಸ್ತಿ ವಿತರಿಸಿದರು.
