ತರಕಾರಿ ಬೆಳೆದು ಮಾದರಿಯಾದ ರೈತ

- ಎಚ್.ಕೆ.ಬಿ. ಸ್ವಾಮಿಕನ್ನಡಪ್ರಭ ವಾರ್ತೆ ಸೊರಬ

ಪ್ರತಿ ವರ್ಷ ಮಳೆಗಾಲದಲ್ಲಿ ನೆರೆ ತಾಲೂಕು ಹಿರೆಕೆರೂರು ಹೋಬಳಿ ಚಿಕ್ಕೆರೂರು ಕೆರೆ ತುಂಬಿ ಕೋಡಿ ಬೀಳುತ್ತದೆ. ಇದರಿಂದ ಸೊರಬ ತಾಲೂಕಿನ ಗಡಿಭಾಗದ ಎಲಿವಾಳ ಗ್ರಾಮದ ಕೃಷಿ ಜಮೀನು ಜೌಗಿನಿಂದ ಕೃಷಿಗೆ ತೊಡಕುಂಟಾಗುತ್ತವೆ. ಬೆಳೆ ಬರುವ ಜಾಗವೆಲ್ಲ ಜವುಳು, ಬೆಳೆ ಮೇಲೇಳಲು ಅವಕಾಶವೇ ಇಲ್ಲ. ಇಂತಹ ಸಂದರ್ಭದಲ್ಲಿ ಗ್ರಾಮದ ಸೋಮಶೇಖರಯ್ಯ ಸುತ್ತೂರು ಮಠ ಎಂಬ ರೈತ ಜವುಳು ಜಾಗದಲ್ಲಿ ಮಲ್ಚಿಂಗ್ ಶೀಟ್, ಕುರಿಗೊಬ್ಬರ, ಕುರಿ ಮೂತ್ರ ಬಳಸಿ ಸುಮಾರು ಮೂವತ್ತಕ್ಕೂ ಅಧಿಕ ತಳಿ ತರಕಾರಿ ಬೆಳೆಯುವ ಮೂಲಕ ಜವುಳು ಭೂಮಿ ಎಂದು ಕೃಷಿ ಚಟುವಟಿಕೆಯನ್ನೇ ನಿಲ್ಲಿಸಿ ಕೈಕಟ್ಟಿ ಕೂತ ಗ್ರಾಮದ ಇತರೆ ರೈತರಿಗೆ ಮಾದರಿಯಾಗಿದ್ದಾರೆ.

ತಾಲೂಕಿನಾದ್ಯಂತ ಬಹುತೇಕ ಎಲ್ಲೆಡೆ ವಾಡಿಕೆಗಿಂತಲೂ ಅಧಿಕ ಮಳೆಯ ಪರಿಣಾಮ ತಾಲೂಕು ಮಲೆನಾಡು ಪ್ರದೇಶದಲ್ಲಿ ಜೌಗಿನಿಂದ ಬೆಳೆಗಳಿಗೆ ಹಾನಿ ಸಂಭವಿಸುತ್ತವೆ. ರೈತಾಪಿ ಬದುಕು ಸಾಕಪ್ಪೋ ಸಾಕು ಎಂದು ನಿತ್ರಾಣರಾಗಿರುವ ಸಂದರ್ಭದಲ್ಲಿ ಸೋಮಶೇಖರಯ್ಯ ಸುತ್ತೂರುಮಠ ಎಂಬ ಕೃಷಿಕ ಎಲಿವಾಳ ಗ್ರಾಮದ ರೈತ ಸಮೂಹಕ್ಕೆ ಹೊಸ ಚೈತನ್ಯ ತುಂಬಿದ್ದಾರೆ.

ಕೆರೆ ಕೋಡಿಯಿಂದ ಜವುಳಿನಿಂದ ಕೂಡಿದ ಜಮೀನಿನಲ್ಲಿ ಭೂಮಿ ಹದ ಮಾಡುವ ಮೊದಲು ೧ ಎಕರೆಗೆ ಒಂದೂವರೆ ಟ್ರಾಕ್ಟರ್ ಕುರಿಗೊಬ್ಬರ ಹಾಕಿ, ೧೮ ಲೀ. ನೀರಿಗೆ ೫೦ ಎಂ.ಎಲ್. ಕುರಿ ಮೂತ್ರ ಮತ್ತು ೧ ಕೋಳಿ ಮೊಟ್ಟೆ ಬೆರೆಸಿ ಸಿಂಪಡಿಸಬೇಕು. ಆಗ ಭೂಮಿಯ ಉಷ್ಣತೆ ಹೆಚ್ಚಾಗಿ ಜೌಗು ನೀರು ಭೂಮಿಯ ಮೇಲ್ಪದರಕ್ಕೆ ಬರದೇ ಇಂಗುತ್ತದೆ. ಈ ಕಾರಣದಿಂದ ಬೆಳೆಗೆ ಯಾವುದೇ ರೋಗ ತಾಕುವುದಿಲ್ಲ. ಇಳುವರಿಯೂ ಹೆಚ್ಚಾಗುತ್ತದೆ. ತಾವು ವಾರಕ್ಕೆ ೩ ಬಾರಿ ಕೋಯ್ಲ ಮಾಡಿದಾಗ ೬೦ ಕೆ.ಜಿ. ಬೀನ್ಸ್, ೧೨ ಬಾಕ್ಸ್ ಟಮೊಟೋ, ೫೦ ಕೆ.ಜಿ. ಸೌತೆ ಮತ್ತು ೫೦ ಕೆ.ಜಿ. ಹಿರೇಕಾಯಿ ಇಳುವರಿ ಬರುತ್ತದೆ.

ಇತ್ತೀಚಿನ ದಿನಗಳಲ್ಲಿ ಹವಾಮಾನ ವೈಪರೀತ್ಯತೆ ಹೆಚ್ಚುತ್ತಿದ್ದು, ಬಿತ್ತನೆಗೆ ಆದ ಖರ್ಚು ಕೂಡ ಸಿಗದಂತಾಗಿದೆ. ಇಂತಹ ಪರಿಸ್ಥಿತಿಯಲ್ಲಿ ಸೋಮಶೇಖರಯ್ಯ ಸುತ್ತೂರುಮಠ ಎಂಬ ಕೃಷಿಕ ಹೊಂದಿರುವ ಅಲ್ಪ ಭೂಮಿಯಲ್ಲಿ ವಿವಿಧ ಕೃಷಿ ಪದ್ಧತಿಗಳನ್ನು ಅಳವಡಿಸಿಕೊಂಡು ಉತ್ತಮ ಆದಾಯ ಪಡೆಯುತ್ತಿರುವುದು ಉಳಿದ ರೈತರಿಗೆ ಅನುಕರಣೀಯ.

– ಬಿ.ಎಲ್. ನವೀನ್, ಸಹಾಯಕ ತೋಟಗಾರಿಕಾ ಅಧಿಕಾರಿ, ಆನವಟ್ಟಿ ಹೋಬಳಿ