ಮೃತ ಮಗನ ನೆನಪಿಗಾಗಿ ಗೋಶಾಲೆ ತೆರೆದ ತಾಯಿ

ಕನ್ನಡಪ್ರಭ ವಾರ್ತೆ ಹಾವೇರಿ

ಹುಬ್ಬಳ್ಳಿಯ ಬಿವಿಬಿ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಓದುತ್ತಿದ್ದ ಪುತ್ರ ಸಂದೇಶ ಮೂರ್ನಾಲ್ಕು ತಿಂಗಳ ಹಿಂದೆ ಬೆಳಗಾವಿಯ ಕಿತ್ತೂರು ಬಳಿ ನಡೆದ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾನೆ. ಮಗನನ್ನು ಕಳೆದುಕೊಂಡ ತಾಯಿ ಸಂಗೀತಾ ಮಮ್ಮಲ ಮರುಗಿದರು. ಆ ನೋವು ಮರೆಯಲು ಈಗ ಅವರು ತಾಲೂಕಿನ ಗಾಂಧಿಪುರ ಬಳಿ ಮಗನ ನೆನಪಿಗಾಗಿ ಗೋಶಾಲೆ ತೆರೆದಿದ್ದಾರೆ.

ಮಗನ ಜನ್ಮದಿನದಂದು ಸೋಮವಾರ ಹುಕ್ಕೇರಿಮಠದ ಸದಾಶಿವ ಸ್ವಾಮೀಜಿ ಗೋಶಾಲೆಗೆ ಚಾಲನೆ ನೀಡಿ ಮಾತನಾಡಿ, ೩೩ ಕೋಟಿ ದೇವತೆಗಳಿರುವ ಗೋವಿಗೆ ಭಾರತೀಯ ಸಂಸ್ಕೃತಿಯಲ್ಲಿ ಶ್ರೇಷ್ಠ ಸ್ಥಾನವಿದೆ. ಈ ದಂಪತಿಯ ಸಾಮಾಜಿಕ ಸೇವೆ ಅನುಕರಣೀಯವಾಗಿದೆ. ಅನಾಥ ಗೋವುಗಳಿಗೆ ಇದು ಆಶ್ರಯ ತಾಣವಾಗಲಿ. ಗೋರಕ್ಷಣೆಗೆ ಸಂಕಲ್ಪ ತೊಟ್ಟಿರುವ ಇವರಿಗೆ ಶುಭವಾಗಲಿ ಎಂದು ಕೋರಿದರು.

ಈಗಾಗಲೇ ೧೦ಕ್ಕೂ ಅಧಿಕ ಜಾನುವಾರುಗಳು ಈ ಗೋಶಾಲೆಯಲ್ಲಿ ಆಶ್ರಯ ಪಡೆದಿವೆ.