ಸ್ವಾರ್ಥರಹಿತ ಸಮಾಜದಿಂದ ಒಳಿತು ಕಾಣಲು ಸಾಧ್ಯ: ಸಂಸದ ಪಿ.ಸಿ.ಮೋಹನ್

ಕನ್ನಡಪ್ರಭ ವಾರ್ತೆ ಚಳ್ಳಕೆರೆ

ಶನಿವಾರ ಸಾಯಿಬಾಬಾ ಮಂದಿರದಲ್ಲಿ ಶ್ರೀವೆಂಕಟಸಾಯಿ ಸೇವಾಟ್ರಸ್ಟ್, ಸಾಯಿಬಾಬಾ ಸದ್ಭಕ್ತವೃಂದ ಹಮ್ಮಿಕೊಂಡಿದ್ದ ಗುರುಪೂರ್ಣಿಮೆ ಹಾಗೂ ಸಾಯಿಸತ್ಯ ನಾರಾಯಣಸ್ವಾಮಿ ಪೂಜಾ ಕಾರ್ಯಕ್ರಮವನ್ನು ಜ್ಯೋತಿ ಬೆಳಗುವ ಮೂಲಕ ಉದ್ಘಾಟಿಸಿ ಮಾತನಾಡಿ, ಭಗವಾನ್ ಸಾಯಿಬಾಬಾ ಬರದ ಈ ನಾಡಿನಲ್ಲಿ ನೆಲೆಸುವ ಮೂಲಕ ಇಲ್ಲಿನ ಜನತೆಗೆ ನೆಮ್ಮದಿ ಬದುಕು ನೀಡುವಲ್ಲಿ ಯಶಸ್ವಿಯಾಗಿದ್ದಾನೆ. ಇತ್ತೀಚಿನ ದಿನಗಳಲ್ಲಿ ಚಳ್ಳಕೆರೆ ತಾಲೂಕಿನಲ್ಲೂ ಸಹ ಉತ್ತಮ ಮಳೆ, ಬೆಳೆಯಾಗಿದ್ದು, ಇದು ಭಗವಾನ್ ಸಾಯಿಬಾಬಾ ಕೃಪೆಯಿಂದ ಎಂದರು.

ಪ್ರಾಸ್ತಾವಿಕವಾಗಿ ಮಾತನಾಡಿ, ಎಲ್ಲರನ್ನೂ ಸ್ವಾಗತಿಸಿದ ಟ್ರಸ್ಟ್ ಅಧ್ಯಕ್ಷ ಬಿ.ಸಿ.ಸಂಜೀವಮೂರ್ತಿ, ಪ್ರಸ್ತುತ ೧೧ನೇ ವರ್ಷದ ಗುರುಪೂರ್ಣಿಮೆ ಉತ್ಸವ ಆಚರಿಸಿತ್ತಿದ್ದೇವೆ. ಚಳ್ಳಕೆರೆ ನಗರದಲ್ಲಿ ಭಗವಾನ್ ಶ್ರೀ ಸಾಯಿಬಾಬಾ ಮಂದಿರ ನಿರ್ಮಿಸುವ ಬಗ್ಗೆ ಚರ್ಚೆ ನಡೆದಾಗ ಎಲ್ಲರಿಂದಲೂ ಉತ್ತಮ ಸಹಕಾರ ದೊರೆಯಿತು. ೨೦೧೨ರಲ್ಲಿ ಆರಂಭವಾದ ಕಟ್ಟಡ ನಿರ್ಮಾಣ ಕಾರ್ಯ ಕೇವಲ ೬ ತಿಂಗಳ ಅವಧಿಯಲ್ಲಿ ಸುಮಾರು ₹೧೨ ಕೋಟಿ ವೆಚ್ಚದಲ್ಲಿ ಪೂರ್ಣಗೊಂಡಿತು. ವೆಂಕಟಸಾಯಿ ಸೇವಾಟ್ರಸ್ಟ್ ಕಾರ್ಯಕ್ಕೆ ಜನತೆ ಆರ್ಥಿಕ ನೆರವಿನೊಂದಿಗೆ ತುಂಬು ಸಹಕಾರ ನೀಡಿ ಮಂದಿರ ನಿರ್ಮಾಣಕ್ಕೆ ನೆರವಾಗಿದ್ದಾರೆ. ಮುಂದಿನ ದಿನಗಳಲ್ಲೂ ಸಹ ಸಾಯಿಭಕ್ತರಿಗೆ ಮಂದಿರದಲ್ಲಿ ಪೂಜಾ ಕಾರ್ಯಕ್ರಮಗಳು ಎಂದಿನಂತೆ ನಡೆಯಲಿವೆ. ಭಕ್ತರ ಸಹಕಾರದಿಂದ ಮಾತ್ರ ಧಾರ್ಮಿಕ ಕಾರ್ಯಕ್ರಮಗಳು ನಡೆಸಲು ಸಾಧ್ಯ ಎಂದರು.

ದಿವ್ಯಸಾನ್ನಿಧ್ಯ ವಹಿಸಿದ್ದ ಸಿದ್ದಯ್ಯನಕೋಟೆ ವಿಜಯ ಮಹಂತೇಶ್ವರ ಸಂಸ್ಥಾನ ಶಾಖಾಮಠದ ಬಸವಲಿಂಗಮಹಾಸ್ವಾಮೀಜಿ ಮಾತನಾಡಿ, ದೇವಸ್ಥಾನ ಮಂದಿರಗಳಿಗೆ ಹೆಚ್ಚು ಜನ ಆಗಮಿಸುವ ಉದ್ದೇಶ ದೇವರಲ್ಲಿ ತಮ್ಮ ಸಮಸ್ಯೆ ನಿವೇದಿಸಿ, ಪರಿಹಾರ ಪಡೆಯುವುದಾಗಿದೆ. ದೇವರ ಮೇಲಿರುವ ಅಪಾರವಾದ ಭಕ್ತಿ ಶ್ರದ್ಧೆಗೆ ಎಂದೂ ಕೊರತೆ ಉಂಟಾಗಿಲ್ಲ. ನಮಗೆ ಸುಲಭವಾಗಿ ಗುರುಗಳ ಅನುಗ್ರಹವಾಗಲು ಭಕ್ತಿ, ಶ್ರದ್ಧೆ ಮೂಲಕ ಪ್ರಾರ್ಥಿಸಬೇಕು ಎಂದರು.