ಕ್ರೀಡೆಯಲ್ಲಿ ಸೋಲು ಗೆಲುವನ್ನು ಸಮನಾಗಿ ಸ್ವೀಕರಿಸಿ

ಲಕ್ಷ್ಮೇಶ್ವರ: ಕ್ರೀಡೆಯಲ್ಲಿ ಸೋಲು ಗೆಲುವು ಸಾಮಾನ್ಯ, ಇಂದಿನ ಸೋಲು ನಾಳಿನ ಗೆಲುವಿಗೆ ಮೆಟ್ಟಿಲಾಗುತ್ತದೆ ಎಂಬುದನ್ನು ಮರೆಯಬಾರದು ಎಂದು ಗದಗ ಜಿಲ್ಲಾ ಚೆಸ್ ಅಸೋಸಿಯೇಷನ್ ಅಧ್ಯಕ್ಷ ಗಿರೀಶ ಅಗಡಿ ಹೇಳಿದರು.

ಚೆಸ್ ಭಾರತೀಯರು ಜಗತ್ತಿಗೆ ನೀಡಿದ ಕೊಡುಗೆಯಾಗಿದೆ, ನಮ್ಮ ಹಿರಿಯರು ದೈಹಿಕ, ಮಾನಸಿಕ ಹಾಗೂ ಬೌದ್ಧಿಕ ಕ್ರೀಡೆಗಳಿಗೆ ಹೆಚ್ಚು ಒತ್ತು ನೀಡುವ ಮೂಲಕ ಮಾನವನ ಸರ್ವಾಂಗೀಣ ಅಭಿವೃದ್ಧಿಗೆ ಗಮನ ಹರಿಸುತ್ತಿದ್ದರು. ಕ್ರೀಡೆಯಲ್ಲಿ ಸೋಲು ಗೆಲುವು ಸಾಮಾನ್ಯ ಸೋಲು ಬಂದಾಗ ಕುಗ್ಗದೆ,ಗೆಲುವಿನ ಸಂಭ್ರಮದಲ್ಲಿ ಮೈಮರೆಯಬಾರದು ಎಂಬುದನ್ನು ಕ್ರೀಡೆಗಳು ನಮಗೆ ಜೀವನದ ಪಾಠ ಕಲಿಸುತ್ತವೆ ಎಂಬುದನ್ನು ಮರೆಬಾರದು ಎಂದು ಹೇಳಿದರು.

ಚೆಸ್ ಕ್ರೀಡಾ ಸಂಯೋಜಕರಾಗಿದ್ದ ದೈಹಿಕ ಶಿಕ್ಷಕ ಎಂ.ಐ.ಕಣಕೆ ಮಾತನಾಡಿ, ಮಾನಸಿಕವಾಗಿ ನಾವು ಹೇಗೆ ತಯಾರಿ ಮಾಡಿಕೊಳ್ಳಬೇಕು, ಗಟ್ಟಿಗೊಳ್ಳಬೇಕು ಹಾಗೂ ವೈರಿಗಳ ನಡೆಯನ್ನು ಮೊದಲೆ ಕಂಡು ಹಿಡಿದು ಅದಕ್ಕೆ ಪ್ರತಿತಂತ್ರ ಹೆಣೆಯುವ ಚಾಣಾಕ್ಷ ಬುದ್ಧಿ ಚೆಸ್ ಕ್ರೀಡೆಯು ನಮಗೆ ತಿಳಿಸಿಕೊಡುತ್ತದೆ. ಭಾರತೀಯರು ಚೆಸ್ ಕ್ರೀಡೆಯಲ್ಲಿ ಪ್ರಾವೀಣ್ಯ ಹೊಂದಿರುವುದು ಹೆಮ್ಮೆಯ ಸಂಗತಿಯಾಗಿದೆ ಎಂದು ಹೇಳಿದರು.

ಪಂದ್ಯಾವಳಿಯನ್ನು ಎಸ್‌ಐ ಮೌಲ್ವಿ ಸೀಟಿ ಊದುವ ಮೂಲಕ ಚಾಲನೆ ನೀಡಿದರು. ಈ ವೇಳೆ ಗದಗ ಜಿಲ್ಲಾ ಚೆಸ್ ಅಸೋಸಿಯೇಷನ್ ಆದೇಶ ಹುಲಗೂರ, ಶ್ರೀಕಾಂತ ಪೂಜಾರ, ಶಿವಯ್ಯ ಕುಲಕರ್ಣಿ, ಆರ್.ಎ. ಮುಲ್ಲಾ, ಎ.ಜೆ.ಬೂದಿಹಾಳ, ಮಂಜುನಾಥ ಅಂಗಡಿ, ಪಿ.ಎಂ.ವಾಲಿ ಸೇರಿದಂತೆ ಅನೇಕರು ಇದ್ದರು.