ನೀರಾ ಉದ್ಯಮ ಅಭಿವೃದ್ಧಿಗೆ ಕ್ರಮ: ಯೋಗೇಶ್ವರ್

ಚನ್ನಪಟ್ಟಣ: ನೀರಾ ನಿಸರ್ಗ ಕೊಡುವ ಅತ್ಯಂತ ಉತ್ಕೃಷ್ಟ ಪಾನೀಯ. ನೀರಾ ಉತ್ಪಾದನೆಯನ್ನು ವೈಜ್ಞಾನಿಕವಾಗಿ ಮಾಡಿದರೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಾರುಕಟ್ಟೆ ಸೃಷ್ಟಿಸಬಹುದು. ಈ ಉದ್ಯಮ ಕೈಹಿಡಿದರೆ ಆರ್ಥಿಕ ಸ್ವಾವಲಂಬನೆ ಸಾಧ್ಯವಾಗಲಿದೆ ಎಂದು ಶಾಸಕ ಸಿ.ಪಿ.ಯೋಗೇಶ್ವರ್ ತಿಳಿಸಿದರು.

ನೀರಾ ರೀತಿಯ ಉತ್ತಮ ಪಾನೀಯ ಮತ್ತೊಂದಿಲ್ಲ. ಬಹುತೇಕ ಪಾನೀಯಗಳು ಕೃತಕವಾಗಿರುತ್ತವೆ. ಆದರೆ, ನೀರಾ ನಿಸರ್ಗ ಸೃಷ್ಟಿಯಾಗಿದ್ದು, ಆರೋಗ್ಯ ದೃಷ್ಟಿಯಿಂದ ಉತ್ತಮವಾಗಿದೆ. ಈ ಹಿಂದೆ ನೀರಾ ಚಳವಳಿಗೆ ಚನ್ನಪಟ್ಟಣ ನಾಂದಿ ಹಾಡಿದ್ದು, ಇಲ್ಲಿಂದಲೇ ಈ ಉದ್ಯಮ ಬೆಳೆಸಲು ಪಣ ತೊಡೋಣ ಎಂದರು.

ಹಿರಿಯ ಪತ್ರಕರ್ತ ವೀರಭದ್ರಪ್ಪ ಬಿಸ್ನಳ್ಳಿ ಮಾತನಾಡಿ, ಮಹಾತ್ಮ ಗಾಂಧಿ ಹಾಗೂ ಪ್ರೊ.ಎಂಡಿಎನ್ ಇಬ್ಬರದು ಒಂದೇ ರೀತಿಯ ಬದುಕು. ದೇಶದ ಸ್ವಾತಂತ್ರ್ಯಕ್ಕೆ ಗಾಂಧಿ ಧುಮುಕಿದರೆ, ಪ್ರೊಫೆಸರ್ ರೈತರ ಸ್ವಾತಂತ್ರ್ಯಕ್ಕಾಗಿ ಧುಮುಕಿದರು. ರೈತ ಸಮುದಾಯಕ್ಕೆ ಕೇವಲ ಹೋರಾಟದ ಕಿಚ್ಚು ಕಲಿಸದೇ ಜ್ಞಾನ ತುಂಬಿಸಿದ ಕೀರ್ತಿ ಅವರಿಗೆ ಸಲ್ಲುತ್ತದೆ ಎಂದರು.

ರೈತ ಮುಖಂಡ ಸಿ.ಪುಟ್ಟಸ್ವಾಮಿ ಮಾತನಾಡಿ, ನೀರಾ ಚಳವಳಿ ನಡೆದು ಹಲವು ವರ್ಷಗಳೇ ಕಳೆದರೂ ಇದುವರೆಗೂ ನೀರಾ ಉದ್ಯಮವಾಗದಿರುವುದು ತೆಂಗು ಬೆಳೆಗಾರರ ಪಾಲಿನ ದುರ್ದೈವ. ರೈತನಾಯಕ ನಂಜುಂಡಸ್ವಾಮಿ ಜನುಮದಿನದಂದು ನೀರಾ ಉದ್ಯಮಕ್ಕೆ ಚೈತನ್ಯ ಕೊಡುವ ಸಲುವಾಗಿ ಈ ಕಾರ್ಯಕ್ರಮ ರೂಪಿಸಿದ್ದೇವೆ ಎಂದರು.

ಪೊಟೋ೧೪ಸಿಪಿಟಿ೧: ಚನ್ನಪಟ್ಟಣದಲ್ಲಿ ಹಮ್ಮಿಕೊಂಡಿದ್ದ ವಿಶ್ವ ರೈತ ಚೇತನ ಪ್ರೊ.ಎಂ.ಡಿ.ನಂಜುಂಡಸ್ವಾಮಿ ಜಯಂತಿ ಹಾಗೂ ನೀರಾ ಉದ್ಯಮ ಸಂವಾದ ಕಾರ್ಯಕ್ರಮವನ್ನು ನೀರಾ ಕುಡಿಯುವ ಮೂಲಕ ಶಾಸಕ ಸಿ.ಪಿ.ಯೋಗೇಶ್ವರ್ ಹಾಗೂ ಅತಿಥಿಗಳು ಚಾಲನೆ ನೀಡಿದರು.