ಪಾಳು ಭೂಮಿಯಲ್ಲಿ ಈರುಳ್ಳಿ ಬಿತ್ತಿದ ಕೃಷಿ ಅಧಿಕಾರಿಗಳು

ಸೋಮರಡ್ಡಿ ಅಳವಂಡಿ

ಪ್ರಧಾನಮಂತ್ರಿ ಫಸಲ್ ಬಿಮಾ ಯೋಜನೆಯಲ್ಲಿ ಅಕ್ರಮ ಬಗೆದಷ್ಟು ಬಯಲಿಗೆ ಬರುತ್ತಿವೆ. ಬೆಳೆ ವಿಮೆ ಪಾವತಿಸಿದ ರೈತನೇ ಆಕ್ಷೇಪ ಸಲ್ಲಿಸದೇ ಇದ್ದರೂ ಸಹ ಕೃಷಿ ಇಲಾಖೆಯ ಅಧಿಕಾರಿಗಳೇ ತಾವೇ ಬೆಳೆ ತಿದ್ದುಪಡಿ ಮಾಡಿ ಈರುಳ್ಳಿ ಬೆಳೆ ಬಿತ್ತಿದ್ದಾರೆ.

ಈ ರೀತಿ ರಂಗಾಪುರ, ಎಂ. ಕುರ್ಬನಾಳ, ಬಿಳೇಕಲ್ ಗ್ರಾಮಗಳ ಸರ್ವೇ ನಂಬರ್‌ನಲ್ಲಿ ಒಂದೇ ಅರ್ಜಿಯಡಿ ಬೆಳೆ ವಿಮೆ ಪಾವತಿಸಲಾಗಿದೆ ಮತ್ತು ಬೆಳೆ ವಿಮಾ ಪರಿಹಾರ ಪಡೆಯಲಾಗಿದೆ. ಇದು ಈಗ ತನಿಖೆಯ ವೇಳೆಯಲ್ಲಿ ಬಯಲಾಗಿದೆ. ಇದರಲ್ಲಿ ರೈತರು ತಪ್ಪಾಗಿ ನಮೂದಿಸಿಲ್ಲ. ಬದಲಾಗಿ ಕೃಷಿ ಇಲಾಖೆಯ ಅಧಿಕಾರಿಗಳೇ ಯಾವುದೇ ಆಕ್ಷೇಪ ಇಲ್ಲದಿದ್ದರೂ ಪಾಳು ಬಿದ್ದ ಭೂಮಿಯಲ್ಲಿ ಈರುಳ್ಳಿ ಬೆಳೆ ತುಂಬಿದ್ದಾರೆ. ಈ ಮೂಲಕ ಹತ್ತಾರು ಲಕ್ಷ ರುಪಾಯಿ ಬೆಳೆ ವಿಮಾ ಪರಿಹಾರ ಪಡೆದಿದ್ದಾರೆ. ಇದು ಕೇವಲ ಉದಾಹರಣೆ ಅಷ್ಟೇ. ಇಂಥ ಸಾಲು ಸಾಲು ಅಕ್ರಮಗಳು ನಡೆದಿರುವುದು ಈಗ ಒಂದೊಂದಾಗಿಯೇ ಬೆಳಕಿಗೆ ಬರಲಾರಂಭಿಸಿವೆ.

ಕೇವಲ ಇದ್ದ ರೈತರ ಹೆಸರಿನಲ್ಲಿ ಮಾತ್ರವಲ್ಲ ಸತ್ತವರ ಹೆಸರಿನಲ್ಲೂ ಬೆಳೆ ವಿಮೆ ಪಾವತಿಸಿ ಪರಿಹಾರ ಪಡೆದುಕೊಂಡಿರುವ ಉದಾಹರಣೆಗಳು ಇವೆ ಎನ್ನುವುದು ಗಮನಾರ್ಹ ಸಂಗತಿ.ಪಾಳು ಬಿದ್ದ ಭೂಮಿಯ ಹೆಸರಿನಲ್ಲಿ ಈರುಳ್ಳಿ ಬಿತ್ತನೆ ಮಾಡಿರುವ ಪ್ರಕರಣ ಬೆಳಕಿಗೆ ಬಂದಿದೆ. ರೈತರು ಆಕ್ಷೇಪ ಸಲ್ಲಿಸದೆ ಇರದ್ದೂ ಕೃಷಿ ಇಲಾಖೆ ಅಧಿಕಾರಿಗಳು ಬೆಳೆ ಬದಲಾಯಿಸಿರುವುದು ದಾಖಲೆಯಲ್ಲಿ ಪತ್ತೆಯಾಗಿದೆ.