ಪಟ್ಟಲದಮ್ಮ ದೇವರ ಜಾತ್ರಾ ಮಹೋತ್ಸವಕ್ಕೆ ಸಕಲ ಸಿದ್ಧತೆ

ಎಚ್.ಎನ್.ಪ್ರಸಾದ್

ಹಲಗೂರು ಮತ್ತು ವಳಗೆರೆದೊಡ್ಡಿ ಎರಡು ಗ್ರಾಮಗಳ ಆರಾಧ್ಯ ದೇವತೆ ಶ್ರೀಪಟ್ಟಲದಮ್ಮನ ಜಾತ್ರಾ ಮಹೋತ್ಸವ ಏ.16 ರಿಂದ 20ರವರೆಗೆ ನಡೆಯಲಿದೆ.

ಏ.16ರಂದು ಮೊದಲ ಪೂಜೆಯಿಂದ ಹಬ್ಬ ಪ್ರಾರಂಭಗೊಂಡು ಏ.18 ರಂದು ಹಲಗೂರು ಕರಿಬೀದಿಯ ದೇವರ ಕರಗದ ಮನೆಯಿಂದ ಪೂಜೆ ಸಲ್ಲಿಸಿಕೊಂಡು ಎಳವಾರ ಓಲೆ ಬಂಡಿ ಮತ್ತು ಹರಕೆ ಹೊತ್ತವರು ಪಾನಕ, ಮಜ್ಜಿಗೆ ಮಾಡಿಕೊಂಡು ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಸಲಾಗುತ್ತದೆ. ನಂತರ ಗ್ರಾಮದ ಹೊರಭಾಗದಲ್ಲಿರುವ ಪಟ್ಟಲದಮ್ಮನ ದೇವಸ್ಥಾನಕ್ಕೆ ಹೋಗಿ ಕೊಂಡದ ಬಾಯಿಗೆ ಸೌದೆಗಳನ್ನು ಹಾಕಲಾಗುತ್ತದೆ. ಈ ವೇಳೆ ಭಕ್ತರಿಗೆ ಪಾನಕ, ಮಜ್ಜಿಗೆ ವಿತರಣೆ ನಡೆಯಲಿದೆ.

ಶುಕ್ರವಾರ ರಾತ್ರಿ ದೇವರ ಕರಗವನ್ನು ತೆಗೆದುಕೊಂಡು ಶ್ರೀ ವೀರಭದ್ರದೇವಸ್ಥಾನಕ್ಕೆ ತರಲಾಗುತ್ತದೆ. ವೀರಭದ್ರೇಶ್ವರ ಸ್ವಾಮಿಗೆ ಪ್ರಳಯ ರುದ್ರ ಅಲಂಕಾರವನ್ನು ಮಾಡಿ ದೇವರ ಕರಗಕ್ಕೆ ಮಲ್ಲಿಗೆ, ಕನಕಾಂಬರ ಹೂಗಳಿಂದ ಶೃಂಗರಿಸಿ ಕರಗವನ್ನು ಹೊತ್ತು ಕೊಂಡ ಹಾಯುವ ಅರ್ಚಕರು ಮಡಿವಾಳ ಹಾಸುವ ಮಡಿಯ ಮೇಲೆ ಹೊರಟಾಗ ಜೊತೆಯಲ್ಲಿ ಬಸವ ಹಾಗೂ ತಂಬಿಟ್ಟಿನ ಆರತಿ ಹೊತ್ತ ಮುತ್ತೈದೆಯರು ಮೆರವಣಿ ಮುಖಾಂತರ ದೇವಸ್ಥಾನಕ್ಕೆ ತೆರಳಲಿದ್ದಾರೆ.

ಸಂಪ್ರದಾಯದಂತೆ ಯುಗಾದಿ ನಂತರ 15 ದಿನಗಳ ಅವಧಿಯಲ್ಲಿ ಪಟ್ಟಲದಮ್ಮ ದೇವಿ ಹಬ್ಬವನ್ನು ಆಚರಿಸಲಾಗುತ್ತದೆ. ಹಬ್ಬ ಆಚರಿಸಲು ಹೆಬ್ಬಟ್ಟದ ಬಸವೇಶ್ವರಸ್ವಾಮಿ ಅನುಮತಿ ಪಡೆದು ನಂತರ ನಡುಕೇರಿ ವೀರಭದ್ರ ಸ್ವಾಮಿ ಆಶೀರ್ವಾದದೊಂದಿಗೆ ಹಬ್ಬವನ್ನು ಎಲ್ಲರೂ ಸೇರಿ ಆಚರಿಸುವುದು ವಾಡಿಕೆಯಾಗಿದೆ.