ಶಿಶುಗಳಿಗೆ ವರವಾದ ಅಮೃತ ಮಿಲ್ಕ್‌ ಬ್ಯಾಂಕ್‌!

ಬಸವರಾಜ ಹಿರೇಮಠ

ಅವಧಿಗಿಂತ ಮುನ್ನ ಜನಿಸಿದ ಶಿಶುಗಳು, ತಾಯಿ ಕಳೆದುಕೊಂಡ ಹಾಗೂ ಎದೆ ಹಾಲಿನ ಕೊರತೆ ಎದುರಿಸುತ್ತಿರುವ ತಾಯಂದಿರ ಶಿಶುಗಳ ದೈಹಿಕ, ಮಾನಸಿಕ ಬೆಳವಣಿಗೆಗೆ ತಾಯಿ ಎದೆ ಹಾಲು ಪ್ರಮುಖ ಪಾತ್ರ ವಹಿಸುತ್ತದೆ. ಈ ಹಿನ್ನೆಲೆಯಲ್ಲಿ ಧಾರವಾಡ ರೋಟರಿ ಸಂಸ್ಥೆ ಆಶ್ರಯದಲ್ಲಿ ಎಸ್‌ಡಿಎಂ ಆಸ್ಪತ್ರೆಯಲ್ಲಿ 2022ರ ಅಕ್ಟೋಬರ್‌ ತಿಂಗಳಲ್ಲಿ ಶುರು ಮಾಡಿದ ಅಮೃತ ಮಿಲ್ಕ್‌ ಬ್ಯಾಂಕ್‌ ಎದೆ ಹಾಲು ಅಂತಹ ಶಿಶುಗಳಿಗೆ ವರದಾನವಾಗಿದೆ.

ನವಜಾತ ಶಿಶುಗಳ ಹಾಗೂ ಬಾಣಂತಿಯರ ಆರೋಗ್ಯ ಪೋಷಣೆ ಹಾಗೂ ಪಾಲನೆಯ ದೃಷ್ಟಿಯಿಂದ ಸಾರ್ವಜನಿಕ ವಲಯದಲ್ಲಿ ಶುಲ್ಕ ರಹಿತವಾಗಿ ಈ ಬ್ಯಾಂಕ್‌ ಕಾರ್ಯ ನಿರ್ವಹಿಸುತ್ತಿದ್ದು, ಪ್ರತಿ ತಿಂಗಳು ಸ್ವಯಂಪ್ರೇರಣೆಯಿಂದ ತಮ್ಮ ಎದೆ ಹಾಲು ದಾನ ಮಾಡಲು ಬರುವ ತಾಯಂದಿರನ್ನು ಎಸ್‌ಡಿಎಂ ಆಸ್ಪತ್ರೆಯು ಗುರುತಿಸಿ ಇತರರಿಗೂ ಮಾದರಿಯಾಗುವಂತೆ ಮಿಲ್ಕ್ ಡೋನರ್ ಚಾಂಪಿಯನ್ ಎಂಬ ಪ್ರಮಾಣ ಪತ್ರ ನೀಡಿ ಗೌರವಿಸುತ್ತಿದೆ.

2022ರ ಅಕ್ಟೋಬರ್‌ ತಿಂಗಳಿಂದ 2024ರ ಜೂನ್‌ ತಿಂಗಳ ವರೆಗೆ 1672 ತಾಯಂದಿರು, 196,420 ಮಿ.ಲೀ, ಹಾಲು ದಾನ ಮಾಡಿದ್ದು, 960 ಶಿಶುಗಳು ಈ ಹಾಲಿನ ಪ್ರಯೋಜನ ಪಡೆದಿವೆ. ದಾನ ಮಾಡಿದ ಹಾಲಿನ ಪೈಕಿ 1,89,550 ಮಿಲಿ ಲೀಟರ್‌ ಹಾಲನ್ನು ಪ್ಯಾಶ್ಚೀಕರಿಸಲಾಗಿದೆ ಹಾಗೂ ಈ ವರೆಗೆ 1,33,900 ಮಿಲೀ ಎದೆ ಹಾಲನ್ನು ಶಿಶುಗಳಿಗೆ ಬಳಸಲಾಗಿದೆ. ಸದ್ಯ 12,480 ಮಿ.ಲೀ ಹಾಲು ವಿತರಣೆಗೆ ಸೂಕ್ತವಾಗಿದೆ ಎಂದು ಎಸ್‌ಡಿಎಂ ವಿಶ್ವವಿದ್ಯಾಲಯದ ಆಡಳಿತ ವಿಭಾಗದ ಉಪ ಪ್ರಾಚಾರ್ಯರು ಹಾಗೂ ಮಕ್ಕಳ ತಜ್ಞ ಡಾ. ವಿಜಯ ಕುಲಕರ್ಣಿ ಕನ್ನಡಪ್ರಭಕ್ಕೆ ಮಾಹಿತಿ ನೀಡಿದರು.

1992ರಲ್ಲಿ ವಿಶ್ವ ಆರೋಗ್ಯ ಸಂಸ್ಥೆಯು ಶಿಶುಗಳ ಆರೋಗ್ಯದ ಪೋಷಣೆ ಹಾಗೂ ಸಂರಕ್ಷಣೆಗಾಗಿ ವಿಶಿಷ್ಟ ಧ್ಯೇಯದೊಂದಿಗೆ ವಿಶ್ವ ಸ್ತನ್ಯಪಾನ ಸಪ್ತಾಹವನ್ನು ಪ್ರತಿ ವರ್ಷ ಆ. 1ರಿಂದ 7ರ ವರೆಗೆ ಆಚರಿಸುತ್ತಿದ್ದು, ಎಸ್‌ಡಿಎಂ ವಿವಿಯಲ್ಲೂ ಸಹ ಈ ಸಪ್ತಾಹ ನಡೆಯುತ್ತಿದೆ. ಇದರಂಗವಾಗಿ ಅಮೃತ್‌ ಮಿಲ್ಕ್‌ ಬ್ಯಾಂಕ್‌ನ 2ನೇ ವರ್ಷಾಚರಣೆ ಆಯೋಜಿಸುವ ಮೂಲಕ ನಾಡಿನ ಮತ್ತಷ್ಟು ತಾಯಂದರಿಗೆ ತಮ್ಮ ಎದೆ ಹಾಲನ್ನು ದಾನ ಮಾಡುವ ಜಾಗೃತಿ ಕಾರ್ಯಕ್ರಮ ನಡೆಸಲಾಯಿತು ಎಂದು ಎಸ್‌ಡಿಎಂ ವಿವಿ ಕುಲಪತಿ ಡಾ. ನಿರಂಜನಕುಮಾರ ಹೇಳಿದ್ದಾರೆ.