ಹೋರಿ ತಿವಿತಕ್ಕೆ ಹಾವೇರಿ ಜಿಲ್ಲೆಯಲ್ಲಿ ಮತ್ತೊಂದು ಬಲಿ

ಹಾವೇರಿ: ಕೊಬ್ಬರಿ ಹೋರಿ ತಿವಿತಕ್ಕೆ ಮತ್ತೊಬ್ಬ ವ್ಯಕ್ತಿ ಪ್ರಾಣ ಕಳೆದುಕೊಂಡ ಘಟನೆ ಹಾನಗಲ್ಲ ತಾಲೂಕಿನ ಯಳವಟ್ಟಿ ಗ್ರಾಮದಲ್ಲಿ ನಡೆದಿದೆ.

ದೀಪಾವಳಿಯ ಪಾಡ್ಯ ದಿನದಂದೇ ಹಾವೇರಿ ನಗರದಲ್ಲಿ ಹಾಗೂ ದೇವಿಹೊಸೂರಿನಲ್ಲಿ ತಲಾ ಓರ್ವ ವೃದ್ಧರು ಹೋರಿ ತಿವಿತದಿಂದ ಮೃತಪಟ್ಟಿದ್ದರೇ, ಹಾನಗಲ್ಲಿನಲ್ಲಿ ಕೂಡ ಓರ್ವ ಯುವಕ ಮೃತಪಟ್ಟಿದ್ದರು. ಈ ವರೆಗೆ ಜಿಲ್ಲೆಯಲ್ಲಿ ಹೋರಿ ತಿವಿತಕ್ಕೆ ನಾಲ್ವರು ಬಲಿಯಾದಂತಾಗಿದೆ.

ಹಿರೇಕೆರೂರ: ಹಿಡಿ ಹೊರಿ. ಹೊಡಿ ಹಲಗಿ. ಹರಿ ಕೊಬ್ಬರಿ. ಕೈ ಹಾಕ್ರೋ... ಅಬ್ಬಾ ಅಬ್ಬಬ್ಬಾ ಹೋರಿ ಬಂತು ದಾರಿಬಿಡ್ರೋ ಎಂಬ ಕೂಗು ಎಲ್ಲೆಡೆ ಕೇಳಿಬರುತಿತ್ತು.ಇದು ತಾಲೂಕಿನದ್ಯಾಂತ ವಿವಿಧ ಗ್ರಾಮಗಳಲ್ಲಿ ದೀಪಾವಳಿ ಹಬ್ಬದ ನಿಮಿತ್ತ ಆಯೋಜಿಸಿದ್ದ ಭಾರಿ ಹೋರಿ ಬೆದರಿಸುವ ಕಾರ್ಯಕ್ರಮದಲ್ಲಿ ಕೇಳಿ ಬಂದ ಕೂಗು.ಬೆಳಗ್ಗೆಯಿಂದ ಆರಂಭಗೊಂಡ ಹೋರಿ ಬೆದರಿಸುವ ಕಾರ್ಯಕ್ರಮದಲ್ಲಿ ಬುರಡಿಕಟ್ಟಿ, ಬಾಳಂಬೀಡ, ಹೊಲಬಿಕೊಂಡ, ಹಿರೇಕೆರೂರು, ಹೊಸೂರು, ಮುಚಡಿ, ಮಳವಳ್ಳಿ, ಡಮ್ಮಳ್ಳಿ, ಚಿಕ್ಕೇರೂರು, ಹಂಸಭಾವಿ, ಕಲ್ವಿಹಳ್ಳಿ ಗ್ರಾಮ ಸೇರಿದಂತೆ ತಾಲೂಕಿನಾದ್ಯಂತ ಗ್ರಾಮಗಳಲ್ಲಿ ಹೋರಿ ಬೆದರಿಸುವ ಸ್ಪರ್ಧೆ ನಡೆಯಿತು.