ಗಣೇಶನ ಭಕ್ತರಿಗೆ ಮುಸ್ಲಿಂರಿಂದ ತಡರಾತ್ರಿ ಉಪಾಹಾರ ವ್ಯವಸ್ಥೆ

ಪಲ್ಟನ್ ಓಣಿ ಪಂಚಕಮಿಟಿ, ನಮಾಜ ಸಮಿತಿ ಹಾಗೂ ಜಾಮೀಯಾ ಮಸೀದಿ ಸಮಿತಿಯಿಂದ ವ್ಯವಸ್ಥೆ

ಈದ್ ಮೀಲಾದ್ ಮೆರವಣಿಗೆಯಲ್ಲಿ ಭಾಗವಹಿಸಿದವರಿಗೆ ಗಜಾನನ ಸಮಿತಿಯವರಿಂದ ಶರಬತ್‌ ವಿತರಣೆ

ಕನ್ನಡಪ್ರಭ ವಾರ್ತೆ ಕೊಪ್ಪಳ

ಹೌದು, ಈದ್ ಮೀಲಾದ್ ಮೆರವಣಿಗೆಯ ವೇಳೆ, ಅಪ್ಪು ಸರ್ಕಲ್ ನಲ್ಲಿ ಕೊಪ್ಪಳ ಕಾ ರಾಜಾ ಗಜಾನನ ಸಮಿತಿಯವರು ಕೇಸರಿ ಶಾಲು ಹಾಕಿಕೊಂಡು, ಮೆರವಣಿಗೆಯಲ್ಲಿ ಭಾಗಿಯಾದವರಿಗೆ ಶರಬತ್‌ ವಿತರಣೆ ಮಾಡುವ ಮೂಲಕ ಗಮನ ಸೆಳೆದಿದ್ದರು. ಈಗ ಗಣೇಶ ಮೂರ್ತಿಯ ವಿಸರ್ಜನಾ ಮೆರವಣಿಗೆಯಲ್ಲಿ ಮಂಗಳವಾರ ತಡರಾತ್ರಿ ಮುಸ್ಲಿಂ ಸಮಾಜದವರು ಉಪಾಹಾರ ಏರ್ಪಡಿಸಿದ್ದರು.

ಕೊಪ್ಪಳ ನಗರದ ಸಾಲರಜಂಗ್ ರಸ್ತೆಯ ಪಲ್ಟನ್ ಓಣಿ ಮುಸ್ಲಿಂ ಸಮಾಜದವರು, ಜಾಮೀಯಾ ಮಸೀದಿ ಸಮಿತಿಯವರು, ನಮಾಜ್ ಸಮಿತಿಯವರು ಹಾಗೂ ಪಲ್ಟನ್ ಓಣಿಯ ಪಂಚಕಮಿಟಿಯ ಪದಾಧಿಕಾರಿಗಳು ಹಾಗೂ ಮುಖಂಡರು ಸೇರಿಕೊಂಡು ಸ್ವಯಂ ಪ್ರೇರಿತವಾಗಿ ತಡರಾತ್ರಿಯ ವೇಳೆಯಲ್ಲಿ ಉಪ್ಪಿಟ್ಟು, ಉಪ್ಪಿನಕಾಯಿ ಹಾಗೂ ಪುಡಿಚಟ್ನಿಯೊಂದಿಗೆ ಉಪಾಹಾರ ವಿತರಣೆ ಮಾಡಿದ್ದಾರೆ.

ಕೋಟೆ ಏರಿಯಾ ಗಣೇಶ, ಕೊಪ್ಪಳ ಕಾ ರಾಜಾ ಗಣೇಶ ಮೂರ್ತಿ ಸೇರಿದಂತೆ ಹತ್ತಾರು ಗಣೇಶ ಮೂರ್ತಿಗಳ ಮೆರವಣಿಗೆ ಸಾಲರಜಂಗ್ ರಸ್ತೆಯ ಮಾರ್ಗವಾಗಿಯೇ ಸಾಗಿದ್ದು, ರಾತ್ರಿ 11 ಗಂಟೆಯಿಂದ ಬೆಳಗಿನ ಜಾವ 3 ಗಂಟೆಯವರೆಗೂ ಉಪಾಹಾರ ವಿತರಿಸಿ ಗಮನ ಸೆಳೆದಿದ್ದಾರೆ.