ಔರಾದ್‌ ತಾಲೂಕು ಆಡಳಿತ ಜನತೆಯಿಂದ ದೂರ

ಕನ್ನಡಪ್ರಭ ವಾರ್ತೆ ಔರಾದ್‌

ಅಧಿಕಾರಿಗಳು ಬೀದರ್‌ನಿಂದ ಔರಾದ್‌ಗೆ ವಾರಕ್ಕೆ ಒಂದೆರಡು ದಿನ ಹಾಗೇ ಬಂದು ಹೀಗೆ ಹೋಗೂ ಪ್ರವೃತ್ತಿ ಬೆಳೆಸಿಕೊಂಡಿರುವುದರಿಂದ ಕ್ಷೇತ್ರದ ಅಭಿವೃದ್ಧಿ ಸಾಮೂಹಿಕವಾಗಿ ಕುಂಠಿತಗೊಂಡಿದೆ ಎಂದರೆ ತಪ್ಪಾಗಲಿಕ್ಕಿಲ್ಲ.

ಸಿಪಿಐ, ಅಬಕಾರಿ ಇನ್ಸ್‌ಪೆಕ್ಟರ್‌, ನೋಂದಣಿ ಅಧಿಕಾರಿ, ಬಿಸಿಯೂಟ ಅಧಿಕಾರಿ, ಕೆಲ ವೈದ್ಯರು ಸೇರಿದಂತೆ ಬೆರಳೆಣಿಕೆಯಷ್ಟು ಅಧಿಕಾರಿಗಳ ಮನೆ ಮಾತ್ರ ಔರಾದ್‌ನಲ್ಲಿದೆ. ತಹಸೀಲ್ದಾರ್‌, ತಾಪಂ ಇಓ, ಕೃಷಿ ಇಲಾಖೆ ಅಧಿಕಾರಿಗಳು, ಪಶು ಸಂಗೋಪನೆ, ಜೆಸ್ಕಾಂ ಎಇಇ, ತೋಟಗಾರಿಕೆ ಅಧಿಕಾರಿ, ರೇಷ್ಮೆ ಅಧಿಕಾರಿ, ಗ್ರಾಮೀಣ ಕುಡಿಯುವ ನೀರು ಸರಬರಾಜು ಇಲಾಖೆ, ಜಿಪಂ ಉಪ ವಿಭಾಗದ ಅಧಿಕಾರಿಗಳು, ಪಿಡಬ್ಲೂಡಿ ಎಇಇ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಅಭಿವೃದ್ಧಿ ಅಧಿಕಾರಿ, ಕ್ಷೇತ್ರ ಶಿಕ್ಷಣಾಧಿಕಾರಿ, ಎಪಿಎಂಸಿ ಕಾರ್ಯದರ್ಶಿ ಇನ್ನೂ ಹಲವು ಇಲಾಖೆ ಅಧಿಕಾರಿಗಳು ಬೀದರ್‌ನಲ್ಲೆ ಮನೆ ಮಾಡಿಕೊಂಡು ಜಿಲ್ಲಾ ಕೇಂದ್ರದಿಂದ ಔರಾದ್‌ಗೆ ಸಂಚಾರ ಮಾಡಿಕೊಂಡಿದ್ದಾರೆ ಎಂಬ ಸಾರ್ವಜನಿಕರ ಆರೋಪವನ್ನು ಜಿಲ್ಲಾಡಳಿತ ಗಮನಿಸಬೇಕಿದೆ.

ಔರಾದ್‌ನ ಹೋರಾಟಗಾರ ಅಶೋಕ ಶೆಂಬೆಳ್ಳಿ ಮಾತನಾಡಿ, ಅಧಿಕಾರಿಗಳು ಕೇಂದ್ರಸ್ಥಾನದಲ್ಲಿ ಮನೆ ಮಾಡಿಕೊಂಡಿದ್ರೆ ಇಲ್ಲಿ ನಡೆಯುವ ಬೆಳವಣಿಗೆ ಗೊತ್ತಾಗುತ್ತೆ. ಸಾರ್ವಜನಿಕರ ಸಮಸ್ಯೆಗಳಿಗೆ ಶೀಘ್ರ ಸ್ಪಂದನೆ ಸಿಗಲಿದೆ. ಅಧಿಕಾರಿಗಳೇ ಇಲ್ಲದೆ ಔರಾದ್‌ ಆಡಳಿತ ನಡೆಯುವ ಅನಾಥ ಪ್ರಜ್ಞೆ ನಮ್ಮನ್ನು ಕಾಡ್ತಿದೆ. ಈ ದುರಾವಸ್ಥೆ ಸರಿಪಡಿಸಿ ಸುಭದ್ರ ಆಡಳಿತ ವ್ಯವಸ್ಥೆಯನ್ನು ಜಿಲ್ಲಾಧಿಕಾರಿಗಳು ನೀಡಬೇಕು ಎಂದು ಒತ್ಆಯಿಸಿದರು.