ಬ್ಯಾಂ ಕಿನಲ್ಲಿ ಅವ್ಯವಹಾರ ಆರೋಪ ನಿರಾಧಾರ

ಬ್ಯಾಂಕಿನ ಹಿರಿಯ ನಿರ್ದೇಶಕ ಲೋಕಪ್ಪಗೌಡ ಮಾಹಿತಿ

ಚಿಕ್ಕಮಗಳೂರು ಜಿಲ್ಲಾ ಪದವೀಧರರ ಪತ್ತಿನ ಸಹಕಾರ ಸಂಘದಲ್ಲಿ ಅವ್ಯವಹಾರ ನಡೆದಿದೆ ಎಂದು ಬ್ಯಾಂಕ್ ನಿರ್ದೇಶಕ ಗೋಪಾಲಗೌಡ ಮಾಡಿರುವ ಆರೋಪಗಳು ನಿರಾಧಾರ ಎಂದು ಬ್ಯಾಂಕಿನ ಹಿರಿಯ ನಿರ್ದೇಶಕ ಲೋಕಪ್ಪಗೌಡ ತಿಳಿಸಿದರು.

101 ಸದಸ್ಯರಿಂದ ಷೇರು ಹಣ ₹50,500 ಸ್ವೀಕರಿಸಿ ಆರಂಭಗೊಂಡ ಸಂಘ ಇಂದು ₹40 ಕೋಟಿ ವ್ಯವಹಾರ ನಡೆಸುತ್ತಿದೆ. ₹ 1.22 ಕೋಟಿ ರೂ. ವೆಚ್ಚದಲ್ಲಿ ಸಂಘಕ್ಕೆ ಸ್ವಂತ ಆಡಳಿತ ಕಚೇರಿ ನಿರ್ಮಿಸಲಾಗಿದೆ. ಕಟ್ಟಡದ ಅಂದಾಜು ವೆಚ್ಚದ ಪ್ರಕಾರ ₹92 ಲಕ್ಷ ಅನುಮತಿ ಪಡೆದು, ₹30 ಲಕ್ಷ ಹೆಚ್ಚು ಖರ್ಚು ಮಾಡಲಾಗಿದೆ. ಲಿಫ್ಟ್, ಪ್ಯಾನಲ್ ಬೋರ್ಡ್, ಬೋರ್ ವೆಲ್, ಇಂಟೀರಿಯರ್ಸ್, ಫರ್ನೀಚರ್ಸ್, ಇಂಜಿನಿಯರ್ಸ್ ವೆಚ್ಚ, ಕಾಂಪೌಂಡ್ ನಿರ್ಮಾಣ, ಎಸಿ ಹೀಗೆ ಇತರೆ ₹30 ಲಕ್ಷ ಖರ್ಚು ಮಾಡಲಾಗಿದೆ. ಇದೆಲ್ಲದಕ್ಕೂ ಲೆಕ್ಕ ನೀಡಲಾಗಿದೆ ಎಂದು ಮಾಹಿತಿ ನೀಡಿದರು.

ಸಂಘದ ಸದಸ್ಯರಿಂದ ಸಾಲ ವಸೂಲಾತಿಯನ್ನು ಪ್ರತಿ ತಿಂಗಳು ಸಾಲಗಾರರಿಗೆ ನೋಟಿಸ್ ನೀಡುವ ಮೂಲಕ ಮತ್ತು ಸಂಘದ ವ್ಯವಸ್ಥಾಪಕರು ಸಾಲಗಾರರನ್ನು ಭೇಟಿ ಮಾಡುವ ಮೂಲಕ ವಸೂಲಾತಿ ಮಾಡಲಾಗುತ್ತಿದೆ. ಈ ಕಾರಣದಿಂದಲೇ ಸಂಘ ಆರಂಭದಿಂದ ಇದುವರೆಗೂ ಲಾಭದಲ್ಲಿಯೇ ನಡೆಯುತ್ತಿದೆ. ಜೊತೆಗೆ 2022ನೇ ಸಾಲಿನಲ್ಲಿ ಜಿಲ್ಲೆಯ ಉತ್ತಮ ಸಹಕಾರ ಸಂಘ ಎಂಬ ಪ್ರಶಸ್ತಿಯನ್ನು ಪಡೆದಿದೆ ಎಂದು ಹೇಳಿದರು.