ಬೀಚ್‌ ರಸ್ತೆ ನಿರ್ಮಾಣದ ಪ್ರಸ್ತಾವನೆ ಸರ್ಕಾರಕ್ಕೆ ಸಲ್ಲಿಕೆ: ಸದಾಶಿವ ಉಳ್ಳಾಲ್

ಕನ್ನಡಪ್ರಭ ವಾರ್ತೆ ಉಳ್ಳಾಲಮುಡಾ ಅಭಿವೃದ್ಧಿ ಕಾಮಗಾರಿಗಳಲ್ಲಿ ಮೂಲ್ಕಿಯಿಂದ ತಲಪಾಡಿ ವರೆಗೆ ಬೀಚ್‌ ರಸ್ತೆ ನಿರ್ಮಿಸುವ ದೊಡ್ಡ ಯೋಜನೆಯ ರೂಪುರೇಷೆಯನ್ನು ಸಿದ್ಧಪಡಿಸಲಾಗಿದ್ದು, ಈ ಕುರಿತು ಪ್ರಸ್ತಾವನೆಯನ್ನು ಸರ್ಕಾರಕ್ಕೆ ಸಲ್ಲಿಸಲಾಗಿದೆ ಎಂದು ಮುಡಾ ಅಧ್ಯಕ್ಷ ಸದಾಶಿವ ಉಳ್ಳಾಲ್‌ ಹೇಳಿದರು.ಅವರು ತೊಕ್ಕೊಟ್ಟು ಸೇವಾಸೌಧದಲ್ಲಿರುವ ಪ್ರೆಸ್‌ ಕ್ಲಬ್‌ ಉಳ್ಳಾಲ ಆಯೋಜಿಸಿದ್ದ ತಿಂಗಳ ಬೆಳಕು ಗೌರವ ಅತಿಥಿ ಹಾಗೂ ಪತ್ರಿಕಾ ದಿನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದರು.ಮುಡಾದಲ್ಲಿ ಭಯದ ವಾತಾವರಣವಿಲ್ಲ. ಮೈಸೂರಿನಲ್ಲಿ ಆಗಿರುವುದಕ್ಕೆ ಮಂಗಳೂರಿನ ಮುಡಾ ನಂಟು ಮಾಡುವುದು ಸಮಂಜಸವಲ್ಲ. ಅಧಿಕಾರಿಯೊಬ್ಬರು ಲಂಚ ಪಡೆದು ಲೋಕಾಯುಕ್ತ ಬಲೆಗೆ ಬಿದ್ದಿರುವುದರ ಬಗ್ಗೆ ವಿಷಾದವಿದೆ. ಮಾಡಿದ ತಪ್ಪಿಗೆ ಅಧಿಕಾರಿ ಮನೆಯಲ್ಲಿದ್ದಾರೆ ಎಂದರು.೨೯ ಕೆರೆಗಳ ಅಭಿವೃದ್ಧಿಗೆ ಮುಂದಾಗಿದ್ದೇವೆ. ಸೋಮೇಶ್ವರ ಕೆರೆಗೆ ಫೌಂಟೇನ್‌ ಅಳವಡಿಸುವ ಕುರಿತು ಸರ್ವೆ ಕಾರ್ಯ ಪೂರ್ಣಗೊಂಡಿದ್ದು, ಶೀಘ್ರವೇ ಕಾಮಗಾರಿ ಆರಂಭವಾಗಲಿದೆ. ಉಳ್ಳಾಲ ಬೀಚ್‌ ಅಬ್ಬಕ್ಕ ವೃತ್ತದ ಎದುರು ಭಾಗದಲ್ಲಿ ಪಾರ್ಕ್‌ ನಿರ್ಮಾಣಕ್ಕೂ ವಿಧಾನಸಭಾ ಅಧ್ಯಕ್ಷ ಯು.ಟಿ .ಖಾದರ್‌ ಆದೇಶಿಸಿದ್ದಾರೆ ಎಂದರು.

ಉದ್ಯಮಿ ಹಾಗೂ ಮಹೇಶ್‌ ಬಸ್‌ ಸ್ಥಾಪಕ ಜಯರಾಮ್‌ ಶೇಖ ಮಾತನಾಡಿ, ಇಡೀ ಭಾರತದಲ್ಲಿ ಪ್ರಥಮ ಖಾಸಗಿ ಬಸ್‌ ಹಾಕಿದವರು ಮಂಗಳೂರಿಗರು. ಇಂದಿಗೆ ಮಂಗಳೂರಿನ ಖಾಸಗಿ ಬಸ್‌ ಕ್ಷೇತ್ರಕ್ಕೆ ೧೧೦ ವರ್ಷಗಳು ಸಂದುತ್ತವೆ. ಇದು ಚರಿತ್ರೆ ಎಂದರು.