ಬೇಲೆಕೇರಿ ಅದಿರು ನಾಪತ್ತೆ ಪ್ರಕರಣಕ್ಕೂ ಅಖಂಡ ಬಳ್ಳಾರಿ ಜಿಲ್ಲೆಗೂ ಬಿಡಿಸಲಾರದ ನಂಟು

ಕೃಷ್ಣ ಎನ್. ಲಮಾಣಿ

ಹೊಸಪೇಟೆ ಮೂಲದ ಸ್ವಸ್ತಿಕ್‌ ನಾಗರಾಜ್‌, ಕಾರದಪುಡಿ ಮಹೇಶ್, ಕೆ.ವಿ.ಗೋವಿಂದರಾಜ್‌ನಂಥವರು ಕಾರವಾರದ ಶಾಸಕ ಸತೀಶ್‌ ಸೈಲ್‌ ಅಂಥವರ ಜತೆಗೆ ನಂಟು ಬೆಳೆಸಿಕೊಂಡು ಈ ಕೃತ್ಯದಲ್ಲಿ ಭಾಗಿಯಾಗಿದ್ದರು. ಅಕ್ರಮ ಗಣಿಗಾರಿಕೆ ಎಂಬುದು ಬಳ್ಳಾರಿ ಜಿಲ್ಲೆಯಲ್ಲಿ ಭಾರೀ ಸದ್ದು ಮಾಡತೊಡಗಿತ್ತು. ಅಕ್ರಮ ಗಣಿಗಾರಿಕೆಯನ್ನು ಮಟ್ಟ ಹಾಕಲು ಲೋಕಾಯುಕ್ತ ನ್ಯಾ.ಸಂತೋಷ್‌ ಹೆಗ್ಡೆ ಅವರು ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಿದ್ದರು. ಈ ವರದಿಯಲ್ಲಿ ಬೇಲೆಕೇರಿ ಅದಿರು ನಾಪತ್ತೆ ಪ್ರಕರಣದ ಕುರಿತು ಉಲ್ಲೇಖಿಸಲಾಗಿತ್ತು.

ಗಣಿಗಳಿಗೆ ಕುತ್ತು ತಂದ ಝೀರೋ:

ರಿಸ್ಕ್‌ ಹಾಗೂ ಝೀರೋ ಹೆಸರಿನಲ್ಲಿ ನಡೆದ ಅಕ್ರಮ ಗಣಿಗಾರಿಕೆ ಅಖಂಡ ಜಿಲ್ಲೆಯ 100ಕ್ಕೂ ಅಧಿಕ ಗಣಿ ಕಂಪನಿಗಳಿಗೆ ಕುತ್ತು ತಂದಿತ್ತು. ಧಾರವಾಡದ ಎಸ್‌.ಆರ್‌. ಹಿರೇಮಠ ಅವರ ಎಸ್‌ಪಿಎಸ್‌ ಸಂಸ್ಥೆ ಸುಪ್ರೀಂ ಕೋರ್ಟ್‌ ತಟ್ಟಿದ ಹಿನ್ನೆಲೆಯಲ್ಲಿ ಸುಪ್ರೀಂ ಕೋರ್ಟ್‌ ಕೇಂದ್ರೀಯ ತನಿಖಾ (ಸಿಇಸಿ) ಸಂಸ್ಥೆಯನ್ನು ನೇಮಿಸಿತ್ತು. ಆಗ ಸಿಇಸಿ ಅಕ್ರಮ ಗಣಿಗಾರಿಕೆಯನ್ನು ಮಟ್ಟ ಹಾಕಲು ಎ, ಬಿ, ಸಿ ಎಂದು ಮೂರು ಕೆಟಗರಿಯಲ್ಲಿ ಗಣಿಗಳನ್ನು ವಿಂಗಡಿಸಿತು. ಇದರಿಂದ ಗಣಿ ಕಂಪನಿಗಳಿಗೂ ಹೊಡೆತ ಬಿದ್ದಿತ್ತು. ರಿಸ್ಕ್‌ ಹಾಗೂ ಝೀರೋ ಹೆಸರಿನಲ್ಲಿ ನಡೆದ ಅಕ್ರಮ ಗಣಿಗಾರಿಕೆ ಬಿಸಿ ಗಣಿ ಕಂಪನಿಗಳಿಗೂ ತಟ್ಟಿತು.

ಬಳ್ಳಾರಿ, ಸಂಡೂರು, ಹೊಸಪೇಟೆ ಭಾಗದಲ್ಲಿ ನೋಡುನೋಡುತ್ತಲೇ ಆಗ ಸಾವಿರ ನೋಟಿನ ಕಂತೆಗಳು ಹರಿದಾಡ ತೊಡಗಿದವು. ಅಕ್ರಮ ಗಣಿಗಾರಿಕೆಯಿಂದ ಅಖಂಡ ಬಳ್ಳಾರಿ ಜಿಲ್ಲೆ ಚಿತ್ರಣವೇ ಬದಲಾಗಿತ್ತು. ಈಗ ಬೇಲೆಕೇರಿ ಪ್ರಕರಣದಲ್ಲಿ ಆರೋಪಿಗಳಿಗೆ ಶಿಕ್ಷೆಯಾಗಿದ್ದು, ಅಕ್ರಮ ಗಣಿಗಾರಿಕೆಗೆ ಸಂಬಂಧಿಸಿದ ಇನ್ನಷ್ಟು ಪ್ರಕರಣಗಳಲ್ಲೂ ಪ್ರಭಾವಿಗಳಿಗೆ ಶಿಕ್ಷೆಯಾಗಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.