ಬೀದಿನಾಯಿಗಳಿಗೆ ಮಹಾನಗರದಲ್ಲಿ ಬಿರಿಯಾನಿ, ಕಬಾಬ್‌!

ಶಿವಾನಂದ ಗೊಂಬಿ

ಇದೇನಿದು? ಬೀದಿನಾಯಿಗಳಿಗೆ ಸ್ಥಳೀಯ ಸಂಸ್ಥೆ ಮಾಂಸಾಹಾರ ನೀಡುತ್ತದೆಯೇ ಎಂಬ ಪ್ರಶ್ನೆ ಹುಟ್ಟಿಕೊಂಡಿತೇ? ಇಲ್ಲ, ಹಾಗೇನೂ ಇಲ್ಲ. ಹುಬ್ಬಳ್ಳಿ- ಧಾರವಾಡ ಮಹಾನಗರ ಪಾಲಿಕೆಯೇನೂ ಮಾಂಸಾಹಾರ ನೀಡುತ್ತಿಲ್ಲ. ಆದರೆ, ತನ್ನ ನಿರ್ಲಕ್ಷ್ಯದಿಂದಾಗಿ ಬೀದಿನಾಯಿಗಳು ಮಾಂಸಾಹಾರ ಸೇವಿಸುವಂತಾಗಿದೆ.

ಹೀಗೆ ಎಸೆದ ಆಹಾರದ ಸುತ್ತಲೂ ಬೀದಿನಾಯಿಗಳ ದಂಡು ರಾಜಾರೋಷವಾಗಿ ನೆರೆಯುತ್ತದೆ. ಸೇವಿಸುವಾಗ ಪರಸ್ಪರ ಕಚ್ಚಾಡುತ್ತವೆ. ಯಾರಾದರೂ ಓಡಿಸಲು ಮುಂದಾದರೆ ಅವರ ಮೇಲೆ ದಾಳಿ ನಡೆಸುತ್ತವೆ. ಪ್ರತಿನಿತ್ಯ ಮಾಂಸ ಸೇವಿಸಿ ರೂಢಿಯಾಗಿರುವ ನಾಯಿಗಳು ಮಕ್ಕಳು, ವೃದ್ಧರು ಒಂಟಿಯಾಗಿ ಸಿಕ್ಕರೆ ಅವರ ಮೇಲೆಯೇ ದಾಳಿ ಮಾಡುತ್ತವೆ.

ಹಾಗಂತ ಇಲ್ಲಿನ ಮಹಾನಗರ ಪಾಲಿಕೆ ಏನೂ ಮಾಡುತ್ತಲೇ ಇಲ್ಲ ಅಂತೇನೂ ಇಲ್ಲ. ಸಂತಾನಶಕ್ತಿ ಹರಣ ಶಸ್ತ್ರಚಿಕಿತ್ಸೆಗಾಗಿ ಶಿವಳ್ಳಿಯಲ್ಲಿ ಶೆಡ್‌ ನಿರ್ಮಿಸಿದೆ. ಆದರೆ, ಈ ವರೆಗೂ ಅಲ್ಲಿ ಶಸ್ತ್ರಚಿಕಿತ್ಸೆ ಮಾಡಿಲ್ಲ. ಇನ್ನು ರಸ್ತೆ ಮೇಲೆ ಮಾಂಸಾಹಾರ, ಅದರ ತ್ಯಾಜ್ಯ ಎಸೆಯಬಾರದಂತೆ ನೋಡಿಕೊಳ್ಳುವ ಜವಾಬ್ದಾರಿ ಪಾಲಿಕೆಯದ್ದು. ಆ ಕೆಲಸವನ್ನೂ ಮಾಡುತ್ತಿಲ್ಲ. ಬರೀ ಸಾಮಾನ್ಯ ಸಭೆಗಳಲ್ಲಿ ಈ ಬಗ್ಗೆ ಚರ್ಚೆಗಷ್ಟೇ ಸೀಮಿತವಾಗಿದೆ. ಇನ್ನು ಆಡಳಿತ ಮಂಡಳಿ ಕೂಡ ಮೇಯರ್‌- ಉಪಮೇಯರ್‌ ಬದಲಾದಾಗೊಮ್ಮೆ ಈ ಬಗ್ಗೆ ಚರ್ಚೆ ನಡೆಸುತ್ತಾರೆ. ಬಣ್ಣ ಬಣ್ಣದ ಮಾತುಗಳನ್ನು ಆಡುತ್ತಾರೆ. ಮತ್ತೆ ಯಥಾಪ್ರಕಾರ ಬೀದಿನಾಯಿಗಳ ಹಾವಳಿ ನಿಲ್ಲುವುದಿಲ್ಲ; ಅವುಗಳಿಗೆ ಕಡಿವಾಣ ಹಾಕುವ ಯೋಚನೆಯನ್ನೂ ಪಾಲಿಕೆ ಮಾಡುವುದಿಲ್ಲ. ಇನ್ನಾದರೂ ಈ ನಿಟ್ಟಿನಲ್ಲಿ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು ಎಂಬುದು ಪ್ರಜ್ಞಾವಂತರ ಒಕ್ಕೊರಲಿನ ಆಗ್ರಹ.

ಬೀದಿನಾಯಿಗಳಿಗೆ ನಗರದಲ್ಲಿ ಮಾಂಸಾಹಾರ ಹೋಟೆಲ್‌, ಖಾನಾವಳಿಗಳೆಲ್ಲ ತ್ಯಾಜ್ಯ, ಉಳಿದ ಆಹಾರವನ್ನೆಲ್ಲ ಹಾಕುತ್ತವೆ. ತಿಂದು ತಿಂದು ಕೊಬ್ಬಿ ಬಿಟ್ಟಿವೆ. ಮನುಷ್ಯರು, ಮಕ್ಕಳ ಮೇಲೆಲ್ಲ ದಾಳಿ ಮಾಡುತ್ತವೆ. ಉಳಿದ ಆಹಾರ ಎಸೆಯುವ ಎಲ್ಲ ಮಾಂಸಾಹಾರಗಳ ಮೇಲೆ ಪಾಲಿಕೆ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಪ್ರಜ್ಞಾವಂತ ರಮೇಶ ಪಾಟೀಲ ಹೇಳಿದರು.