ಬಿಜೆಪಿಗರು ಪಾಕಿಸ್ತಾನದ ರಾಯಭಾರಿಗಳಂತೆ ವರ್ತಿಸ್ತಿದ್ದಾರೆ: ಸಚಿವ ಆರ್‌.ಬಿ. ತಿಮ್ಮಾಪುರ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ನಗರದಲ್ಲಿ ಸೋಮವಾರ ಸುದ್ದಿಗಾರರೊಂದಿಗೆ ಮಾತನಾಡಿದರು. ಪಾಕಿಸ್ತಾನ ಜಿಂದಾಬಾದ್ ಆರೋಪದಲ್ಲಿ ಕಾಂಗ್ರೆಸ್ಸಿಗರೇ ಬಿಜೆಪಿಗರಿಗೆ ಆಹಾರ ಆಗುತ್ತಿದ್ದಾರೆಂಬ ಎಂಬ ಪ್ರಶ್ನೆಗೆ ಖಾರವಾಗಿ ಉತ್ತರಿಸಿದ ಅವರು, ಎಲ್ಲವನ್ನು ಇವರೇ ಕ್ರಿಯೇಟ್‌ ಮಾಡಿ ಹೇಳುತ್ತಾರೆ ಎಂದರು.

ಮಂಡ್ಯದಲ್ಲಿ ಪಾಕಿಸ್ತಾನ ಜಿಂದಾಬಾದ್‌ ಅಂದವರ್‍ಯಾರು? ಯಾರು ಏನೇ ಮಾಡಿದರೂ ಪಾಕಿಸ್ತಾನದವರು ಮಾಡಿದರು ಎನ್ನುತ್ತಾರೆ. ಅವರ ಆಡಳಿತಾವಧಿಯಲ್ಲಿ ಸಂಸತ್‌ ಮೇಲೆ ದಾಳಿ ಮಾಡಿದಾಗ ನಾವು ರಾಜಕೀಯಕ್ಕೆ ಉಪಯೋಗಿಸಿಕೊಳ್ಳಲಿಲ್ಲ. ದೇಶಕ್ಕೆ ಅವಮಾನ ಆಗಿದೆ ಎಂದು ನೊಂದುಕೊಂಡೆವು. ಬಿಜೆಪಿಗರ ರೀತಿಯಲ್ಲಿ ನಾವು ರಾಜಕಾರಣ ಮಾಡಲಿಲ್ಲ. ಕಾರ್ಗಿಲ್ ಯುದ್ಧ ಮಾಡಿದಾಗಲೂ ರಾಜಕಾರಣ ಮಾಡಲಿಲ್ಲ. ಆದರೆ ಬಿಜೆಪಿಗರು ಛೋಟಾ, ಮೋಟಾ ಹಿಡಿದು ಎಲ್ಲದಕ್ಕೂ ರಾಜಕಾರಣ ಮಾಡುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಬಾಂಬ್‌ ಸ್ಫೋಟ ನೋಡಿದ್ದಾರಾ ?

ಪಾಕಿಸ್ತಾನ ಜಿಂದಾಬಾದ್ ಎಂದು ಯಾರು ಅಂದಿದ್ದಾರೆ, ಅದು ಕ್ರಿಯೇಟೆಡ್. ಬಿಜೆಪಿ ಪಾರ್ಟಿಯವರು ಈ ಕೆಲಸ ಮಾಡಿದ್ದಾರೆ. ಇದೆಲ್ಲ ಯಾರು ಮಾಡುತ್ತಿದ್ದಾರೆ, ಏತಕ್ಕೆ ಮಾಡುತ್ತಿದ್ದಾರೆ, ಎಫ್ಎಸ್ಎಲ್ ವರದಿ ಬರುತ್ತೆ. ಸಿಂದಗಿಯಲ್ಲಿ ಪಾಕ್ ಧ್ವಜ ಪ್ರಕರಣ, ಮಂಗಳೂರು ಘಟನಾವಳಿಯಂತೆ, ಎಲ್ಲೋ ಒಂದು ಕಡೆ ಇವರ ಕೈವಾಡ ಇದೆ ಎಂಬ ಭಾವನೆ ಜನರಲ್ಲಿ ಬರುತ್ತಿದೆ ಎಂದರು.

ಬಿಜೆಪಿಗರು ಎಂತಹ ದೇಶದ್ರೋಹಿಗಳು ಎಂದರೆ ಇವರಿಗೆ ದೇಶ, ಧರ್ಮ ಬೇಕಾಗಿಲ್ಲ. ಇವರಿಗೆ ಬೇಕಾಗಿರೋದು ಅಧಿಕಾರ ಮಾತ್ರ. ಪವರ್‌ ಹಿಡಿದು ಏನೆಲ್ಲ ನಾಟಕ ಮಾಡುತ್ತಿದ್ದಾರೆ. ಇದು ಈ ದೇಶದ ದುರ್ದೈವ ಎಂದ ಅವರು, ಅಧಿಕಾರಕ್ಕಾಗಿ ಎಂತಹ ಅಡ್ಡದಾರಿಯನ್ನಾದರೂ ಹಿಡಿಯಲು ಸಿದ್ಧರಿದ್ದಾರೆ ಎಂದು ಆರೋಪಿಸಿದರು.

ಬಿಜೆಪಿ ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆ ಆಗಿದೆ. ಕಾಂಗ್ರೆಸ್‌ ಪಟ್ಟಿ ಯಾವಾಗ ಎಂಬ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ಕರ್ನಾಟಕದಲ್ಲಿ ಬಿಜೆಪಿ ಪಟ್ಟಿ ಬಿಡುಗಡೆ ಆಗಿದೆಯಾ? ಕರ್ನಾಟಕದ್ದು ಯಾಕೆ ಮಾಡಲಿಲ್ಲ? ನಮ್ಮ ಅಭ್ಯರ್ಥಿಗಳ ಪಟ್ಟಿಯನ್ನೂ ರಿಲೀಸ್‌ ಮಾಡುತ್ತೇವೆ. ಅದಕ್ಕಾಗಿ ಮೀಟಿಂಗ್‌ಗಳು ನಡೆಯುತ್ತಿವೆ. ನಾವು ಚುನಾವಣೆಗೆ ತಯಾರಿದ್ದೇವೆ ಎಂದರು. ಕಾಂಗ್ರೆಸ್ ಸೇನಾನಿ ಯಾರು ಎಂಬ ಪ್ರಶ್ನೆಗೆ ಮಲ್ಲಿಕಾರ್ಜನ ಖರ್ಗೆಜಿ ನಮ್ಮ ಸೇನಾನಿ. ಹಿ ಈಸ್ ಎಐಸಿಸಿ ಪ್ರೆಸಿಡೆಂಟ್. ಮತ್ಯಾಕ ಬೇಕು ನಮಗೆ ಸೇನಾನಿ ಎಂದು ಮರುಪ್ರಶ್ನೆ ಹಾಕಿದರು.