ಚಿತ್ರದುರ್ಗ ನಗರಸಭೆ ಸದಸ್ಯರಿಂದ ಅಧಿವೇಶನ ಬಹಿಷ್ಕಾರ

ಕನ್ನಡಪ್ರಭ ವಾರ್ತೆ ಚಿತ್ರದುರ್ಗ

ಸಭೆಗೆ ತಡವಾಗಿ ಆಗಮಿಸಿದುದಕ್ಕೆ ಪೌರಾಯುಕ್ತೆ ರೇಣುಕಾ ಕ್ಷಮೆಯಾಚಿಸಿದರೂ ಕೂಡ ಸದಸ್ಯರು ಕಿವಿಗೊಡದೆ ಸಭೆಯಿಂದ ಎದ್ದು ಹೊರ ನಡೆದು, ಮತ್ತೊಂದು ದಿನ ನಿಗಧಿ ಮಾಡುವಂತೆ ಆಗ್ರಹಿಸಿದರು.

ಸಭೆಯ ಆರಂಭದಲ್ಲಿ ನಾಡಗೀತೆಗೂ ಅವಕಾಶ ಕೊಡದೆ ಏರು ದನಿಯಲ್ಲಿ ವಿಷಯ ಪ್ರಸ್ತಾಪಿಸಿದ ಮಾಜಿ ಅಧ್ಯಕ್ಷ ಹಾಗೂ ಸದಸ್ಯ ಗೊಪ್ಪೆ ಮಂಜುನಾಥ್, ನಗರಸಭೆ ಸಾಮಾನ್ಯ ಅಧಿವೇಶನವೆಂದರೆ ಸ್ಥಳೀಯ ಅಸೆಂಬ್ಲಿ ಇದ್ದಂತೆ. ಸಭೆ ಆರಂಭವಾಗುವ ಹದಿನೈದು ನಿಮಿಷ ಮುಂಚೆ ಎಲ್ಲ ಅಧಿಕಾರಿಗಳು ಸಭಾಂಗಣದಲ್ಲಿ ಇರಬೇಕು. ಆದರೆ ಅಧ್ಯಕ್ಷ, ಉಪಾಧ್ಯಕ್ಷರು, ಸದಸ್ಯರು ಬಂದರೂ ಸಹಿತ ಪೌರಾಯುಕ್ತರು ತಡವಾಗಿ ಬರುತ್ತಾರೆ ಎಂದರೆ ಏನರ್ಥ. ಪೌರಾಯುಕ್ತರಿಗಾಗಿ ಅಧ್ಯಕ್ಷರು ಕಾದು ಕುಳಿತುಕೊಳ್ಳಬೇಕೇ. ಅಧಿವೇಶನ ನಡೆಸಲು ಮುಖ್ಯಮಂತ್ರಿಗಳು ಎಂದಾದರೂ ಅಧಿಕಾರಿಗಳಿಗಾಗಿ ಕಾದು ಕುಳಿತಿದ್ದದ್ದು ನೋಡಿದಿರಾ ಎಂದು ಪ್ರಶ್ನಿಸಿದರು.

ಈ ವೇಳೆ ಮಧ್ಯ ಪ್ರವೇಶಿಸಿ ಮಾತನಾಡಿದ ಪೌರಾಯುಕ್ತೆ ರೇಣುಕಾ, ಮೊದಲು ನಾಡಗೀತೆ ಹಾಗೂ ಅಸು ನೀಗಿದ ಸದಸ್ಯರಿಗೆ ಗೌರವ ಸಲ್ಲಿಸಿದ ನಂತರ ಚರ್ಚಿಸೋಣ ಎಂದಾಗ ಸಭೆಗೆ ಸಮ್ಮತಿಸಿತಾದರೂ ನಾಡಗೀತೆ ನಂತರ ಸದಸ್ಯರು ಸಭೆ ನಡೆಸದೇ ಇರುವ ತೀರ್ಮಾನಕ್ಕೆ ಬಂದಂತೆ ಕಂಡಿತು.

ಈ ಮಾತಿಗೆ ದನಿ ಗೂಡಿಸಿದ ಸರ್ದಾರ್ ಅಹಮದ್ ಪಾಷಾ, ಸಭೆಯಲ್ಲಿ ಸಿಬ್ಬಂದಿ ಹಾಜರಿರುವಂತೆ ನೋಡಿಕೊಳ್ಳುವುದು ಪೌರಾಯುಕ್ತರ ಕರ್ತವ್ಯ. ಇದು ನೀವು ಬಿಗಿಯಾಗಿಲ್ಲವೆಂಬುದನ್ನು ತೋರಿಸುತ್ತದೆ ಎಂದರು.

ಅಧಿಕಾರಿಗಳ ಬೇಜವಾಬ್ದಾರಿ ಸಹಿಸಿಕೊಳ್ಳಲು ಆಗುವುದಿಲ್ಲ ಎಂದು ಹಳೇ ನಿಲುವಿಗೆ ಬದ್ಧರಾದ ಸದಸ್ಯ ಗೊಪ್ಪೆ ಮಂಜುನಾಥ್ ಸಭೆ ಬಹಿಷ್ಕರಿಸಿ ಹೋಗೋಣ. ಮತ್ತೊಂದು ದಿನ ಸಭೆ ಕರೆಯಲಿ ಎಂದಾಗ ಅಧ್ಯಕ್ಷೆ ಸುಮಿತಾ, ಉಪಾಧ್ಯಕ್ಷೆ ಶ್ರೀದೇವಿ ಆಸನದಿಂದ ಮೇಲೆದ್ದು ಹೊರ ನಡೆದರು.