ಮಾನವೀಯ ಮೌಲ್ಯ ತುಂಬುವ ಕಥಾ ಸಂಕಲನ ಹೊರತನ್ನಿ

ಕುಷ್ಟಗಿ: ಸಾಹಿತಿಗಳು ಕೇವಲ ಕವಿ ಹೃದಯಿಯಾಗಿರದೇ ಮಾನವೀಯತೆಯ ಹೃದಯ ಹೊಂದಬೇಕು, ಜನಸಾಮಾನ್ಯರಲ್ಲಿ ಮಾನವೀಯ ಮೌಲ್ಯ ತುಂಬುವಂತಹ ಕಥಾ ಸಂಕಲನ ಹೊರಗಡೆ ತರಬೇಕು ಎಂದು ಶಾಸಕ ದೊಡ್ಡನಗೌಡ ಪಾಟೀಲ ಹೇಳಿದರು.

ಸಾಹಿತಿಗಳ ಪುಸ್ತಕಗಳು ಕೇವಲ ಬಿಡುಗಡೆಗೆ ಮಾತ್ರ ಸೀಮಿತಗೊಳ್ಳದೆ ಅವುಗಳನ್ನು ಓದುವ ಆಸಕ್ತಿ ಬೆಳೆಸಿಕೊಳ್ಳಬೇಕಿದೆ, ಇಂದಿನ ಆಧುನಿಕ ದಿನಗಳಲ್ಲಿ ಮೊಬೈಲ್ ಬಳಕೆ ಅತಿಯಾಗುತ್ತಿದ್ದು ಪುಸ್ತಕ ಓದುವ ಹವ್ಯಾಸ ಕಡಿಮೆಯಾಗುತ್ತಿದೆ ಎಂದರು.

ಹಿರಿಯ ಸಾಹಿತಿ ನಾಗರಾಜ ನಾಡಗೌಡರ ಮಾತನಾಡಿ, ಇತ್ತೀಚಿನ ದಿನಗಳಲ್ಲಿ ಸಾಹಿತ್ಯಗಳು ಬಹಳಷ್ಟು ಜನ ಹೊರ ತರುತ್ತಿರುವುದು ಸಂತಸವಾದರೆ ಕನ್ನಡ ಶಾಲೆಗಳು ಮುಚ್ಚುತ್ತಿರುವುದು ದುರಂತದ ಸಂಗತಿಯಾಗಿದೆ. ಲಕ್ಷಾಂತರ ಸಾಲ ಸೋಲ ಮಾಡುವ ಮೂಲಕ ಮಕ್ಕಳನ್ನು ಖಾಸಗಿ ಶಾಲೆಗಳಿಗೆ ದಾಖಲಾತಿ ಮಾಡುತ್ತಿರುವುದು ವಿಪರ್ಯಾಸವಾಗಿದೆ. ನಾವು ಕನ್ನಡಿಗರಾಗಿ ಮಾತೃ ಮಕ್ಕಳಿಗೆ ಮಾತೃಭಾಷೆಯಲ್ಲಿ ಶಿಕ್ಷಣ ಕಲಿಸಬೇಕು ನಮ್ಮ ಸುತ್ತಮುತ್ತಲಿನ ಸರ್ಕಾರಿ ಶಾಲೆಗಳಿಗೆ ಜೀವ ಕಳೆ ತುಂಬಬೇಕಿದೆ ಎಂದರು.