ನಗರಸಭೆ ಮಳಿಗೆ ಟೆಂಡರ್‌ ಕರೆದು ಹಂಚಿಕೆ ಮಾಡಿ: ಸಂಜೀವಕುಮಾರ ನೀರಲಗಿ

ಹಾವೇರಿ: ನಗರಸಭೆ ವ್ಯಾಪ್ತಿಯಲ್ಲಿರುವ ಮಳಿಗೆಗಳನ್ನು ಬಹಳ ವರ್ಷಗಳಿಂದ ಹರಾಜು ನೀಡಿಲ್ಲ. ಅಧಿಕಾರಿಗಳ ನಿರ್ಲಕ್ಷ್ಯದಿಂದ ನಗರಸಭೆಗೆ ಬರಬೇಕಿದ್ದ ಆದಾಯ ಬರುತ್ತಿಲ್ಲ. ಶೀಘ್ರದಲ್ಲಿ ಟೆಂಡರ್‌ ಕರೆದು ಮಳಿಗೆ ಹರಾಜು ಮಾಡಬೇಕು ಎಂದು ನಗರಸಭೆ ಸದಸ್ಯ, ಮಾಜಿ ಅಧ್ಯಕ್ಷ ಸಂಜೀವಕುಮಾರ ನೀರಲಗಿ ಕಿಡಿಕಾರಿದರು.

ನಗರಸಭೆ ವ್ಯಾಪ್ತಿಯಲ್ಲಿ 243 ಮಳಿಗೆಗಳಿವೆ. 2017ರಲ್ಲಿ ಸಿಂಗಲ್ ಟೆಂಡರ್ ಆಗಿರುವ 93 ಮಳಿಗೆಗಳು ಇವತ್ತಿಗೂ ಹಳೆ ಬಾಡಿಗೆಯನ್ನು ಪಾವತಿಸುತ್ತಿದ್ದಾರೆ. ಗೂಗಿಕಟ್ಟಿಯ ವಿ ಕಾಂಪ್ಲೆಕ್ಸ್‌ನಲ್ಲಿ 40 ಮಳಿಗೆ ಇವೆ. ಈ ಪೈಕಿ 24 ಮಳಿಗೆಗಳು ಕೇವಲ ₹250 ಪಾವತಿಸುತ್ತಿದ್ದಾರೆ. 14 ಮಳಿಗೆಯವರು ₹4 ಸಾವಿರ ಕಟ್ಟುತ್ತಿದ್ದಾರೆ. ಕೆಲವರು ₹17 ಸಾವಿರದಿಂದ ₹18 ಸಾವಿರ ಬಾಡಿಗೆ ಕಟ್ಟಲು ಸಿದ್ಧರಿದ್ದಾರೆ ಎಂದರು.

ನಗರಸಭೆ ಐಡಿಎಸ್‌ಎಂಟಿ ಮಳಿಗೆಗಳ ಅನುದಾನದಲ್ಲಿ ₹3.40 ಕೋಟಿ ಅನುದಾನವಿದ್ದು, ನಗರದ ವಾಲ್ಮೀಕಿ ವೃತ್ತದ ಬಳಿಯ ಸಿಎ ಸೈಟ್‌ನಲ್ಲಿ ಸುಸಜ್ಜಿತ ಮಾಲ್ ನಿರ್ಮಿಸುವಂತೆ ಅಧ್ಯಕ್ಷರ ಗಮನಕ್ಕೆ ತಂದರು.

ಪೈಪಲೈನ್ ದುರಸ್ತಿ ಮಾಡಿ: ಅಂಬೇಡ್ಕರ್ ಸರ್ಕಲ್, ಸುಭಾಸ ಸರ್ಕಲ್ ಸೇರಿ ಹಲವು ಕಡೆ ನೀರಿನ ಪೈಪ್ ಒಡೆದು ನೀರು ಪೋಲಾಗುತ್ತಿದೆ. ರಿಪೇರಿ ಮಾಡಿಸುವಂತೆ ಸದಸ್ಯ ಪೀರಸಾಬ್ ಚೋಪದಾರ ಸಭೆಯ ಗಮನಕ್ಕೆ ತಂದರು. ಈ ವೇಳೆ ಮಾತನಾಡಿದ ಅಧ್ಯಕ್ಷೆ ಶಶಿಕಲಾ ಮಾಳಗಿ ನಗರದಲ್ಲಿ ಆಗಾಗ ಒಡೆದು ಹಾಳಾಗುವ ಕುಡಿಯುವ ನೀರಿನ ಪೈಪಲೈನ್ ದುರಸ್ತಿಗೆ ವಾರ್ಷಿಕ ₹10 ಲಕ್ಷ ಮೀಸಲಿಡುವ ಬಗ್ಗೆ ಅನುಮತಿ ಕೋರಿದರು.

ಪೈಪ್‌ಲೈನ್ ಪೂರ್ತಿ ಒಡೆದು ಹಾಳಾಗಿದ್ದರೆ ನವೀಕರಣ ಪೈಪ್ ಕನೆಕ್ಷನ್ ಕೊಡಿ, ಸಣ್ಣಪುಟ್ಟ ಕೆಲಸಗಳಿದ್ದರೆ ವಾಲ್‌ಮನ್‌ಗಳಿಂದಲೇ ಕೆಲಸ ಮಾಡಿಸಿ ಎಂದು ಆಗ್ರಹಿಸಿದರು.ಧರಣಿ ನಡೆಸುವ ಎಚ್ಚರಿಕೆ: ಕುಡಿಯುವ ನೀರಿಗೆ ಸಂಬಂಧಿಸಿದಂತೆ ₹108 ಲಕ್ಷ ಅನುದಾನ ಬಂದಿದ್ದು, ಜಲ ಶುದ್ಧಿಕರಣಕ್ಕೆ ₹40 ಲಕ್ಷ, ಕರ್ಜಗಿ ಜಾಕವೆಲ್ ಬಳಿ ದುರಸ್ತಿಗೆ ₹40 ಲಕ್ಷ, ನಗರಕ್ಕೆ ನೀರು ಸರಬರಾಜು ಮಾಡಲು ₹28 ಲಕ್ಷ ರು. ಹಂಚಿಕೆ ಮಾಡಿ ಮೂರು ತಿಂಗಳೇ ಕಳೆದಿವೆ. ಆದರೆ ಇಲ್ಲಿಯವರೆಗೂ ನಗರಸಭೆ ಟೆಂಡರ್ ಕರೆದಿಲ್ಲವೆಂದರೆ ಏನರ್ಥ ಎಂದು ಸದಸ್ಯ ಸಂಜೀವಕುಮಾರ ನೀರಲಗಿ ಪ್ರಶ್ನಿಸಿದರು. ಡಿಸಿಯವರು, ನಗರ ಯೋಜನಾ ನಿರ್ದೇಶಕರಿಗೆ ಪ್ರಸ್ತಾವನೆ ಕೊಟ್ಟಿದ್ದೇವೆ, ಸಹಿ ಬಾಕಿ ಇದೆ ಎಂದು ಅಧಿಕಾರಿಗಳು ಸಮಜಾಯಿಷಿ ನೀಡಲು ಮುಂದಾದರು. ಇದಕ್ಕೆ ಆಕ್ಷೇಪಿಸಿದ ಸಂಜೀವಕುಮಾರ ಅಧಿಕಾರಿಗಳನ್ನು ಫಾಲೋ ಅಪ್ ಮಾಡಿ, ಕುಳಿತುಕೊಂಡು ಆದೇಶ ಮಾಡಿಸಿಕೊಂಡು ಬರಬೇಕು. ಇಲ್ಲವಾದರೆ ನಗರಸಭೆಯಲ್ಲಿ ಧರಣಿ ನಡೆಸುವುದಾಗಿ ಎಚ್ಚರಿಕೆ ನೀಡಿದರು.ಹಣ ಲೂಟಿ, ಆರೋಪ: 2021- 25ರ ವರೆಗೆ ಅಧ್ಯಕ್ಷರ ಅಪ್ಪಣೆ ಮೇರೆಗೆ ಬೇರೆ ಬೇರೆ ಅಭಿವೃದ್ಧಿ ಕೆಲಸ ಮಾಡಿ ಹಣ ಖರ್ಚು ಮಾಡಿದ್ದೀರಿ. ಬಳಿಕ ಮುಂದಿನ ಸಾಮಾನ್ಯ ಸಭೆಯಲ್ಲಿ ಆ ಬಗ್ಗೆ ಅನುಮೋದನೆ ಪಡೆದುಕೊಳ್ಳುವುದೇ ಇಲ್ಲ. ಹೀಗಾಗಿ ಇದರಲ್ಲಿ ಕೋಟ್ಯಂತರ ರು. ಲೂಟಿಯಾಗಿರುವ ಸಂಶಯವಿದೆ. ಈ ಬಗ್ಗೆ ಮಾಹಿತಿ ಕೇಳಿದರೂ ಅಧಿಕಾರಿಗಳು ಮಾಹಿತಿ ನೀಡಿಲ್ಲ. ಇದರ ಸಂಪೂರ್ಣ ಮಾಹಿತಿ ಕೊಟ್ಟು ಸಭೆ ಮುಂದುವರಿಸುವಂತೆ ಸದಸ್ಯ ಐ.ಯು. ಪಠಾಣ ಆಗ್ರಹಿಸಿದರು.