ಕಾವೇರಿ ಪ್ರವಾಹ: ದ್ವೀಪಸದೃಶ ನಾಪೋಕ್ಲು

ಕನ್ನಡಪ್ರಭ ವಾರ್ತೆ ನಾಪೋಕ್ಲು

ಮಂಗಳವಾರ ಮಧ್ಯಾಹ್ನ ನಂತರ ನಾಪೋಕ್ಲು - ಬೆಟಗೇರಿ ಸಂಪರ್ಕ ರಸ್ತೆಯ ಕೊಟ್ಟಮಡಿಯಲ್ಲಿ ಕಾವೇರಿ ಪ್ರವಾಹ ರಸ್ತೆಯ ಮೇಲೆ ಹರಿಯುತ್ತಿದ್ದು ಸಂಪರ್ಕ ಕಡಿದುಕೊಳ್ಳುವ ಸಾಧ್ಯತೆ ದಟ್ಟವಾಗಿದ್ದು, ನಾಪೋಕ್ಲು ಎಲ್ಲ ಸಂಪರ್ಕ ಕಡಿದುಕೊಂಡು ದ್ವೀಪವಾಗುವ ಸಂಭವ ಕಂಡುಬರುತ್ತಿದೆದೆ.

ಪಾಲೂರು ಗ್ರಾಮದ ಹರಿಶ್ಚಂದ್ರ ದೇವಾಲಯ ಜಲಾವೃತವಾಗಿ ಎರಡು ವಾರಗಳೇ ಕಳೆದಿದೆ. ಕಡಂಗ ಹಾಗೂ ಎಡಪಾಲ ಹೊಳೆಯ ಸೇತುವೆ ಮೇಲೆ ಅಂದಾಜು ಎರಡು ಅಡಿ ನೀರು ಇದ್ದು ರಸ್ತೆ ಸಂಚಾರ ಸ್ಥಗಿತಗೊಂಡಿದ್ದು ವಾಹನಗಳು ಕುಂಜಿಲ ಮಾರ್ಗವಾಗಿ ಸಂಚರಿಸುತ್ತಿವೆ. ಕೊಳಕೇರಿ-ಕೋಕೇರಿ ಸಂಪರ್ಕ ಕಲ್ಪಿಸುವ ಕುಪ್ಪೋಟು ಹೊಳೆ ಸೇತುವೆ ಜಲಾವೃತವಾಗಿದ್ದು ಸಮೀಪದ ಕುಡಿಯುವ ನೀರಿನ ಘಟಕ ಮುಳುಗಡೆಯಾಗಿದೆ. ಅಯ್ಯಂಗೇರಿಯ ಬಿದ್ದಿಯಂಡ ರವಿ ಎಂಬವವರ ತೋಟದಲ್ಲಿ ಭೂಕುಸಿತವಾಗಿ ನಷ್ಟ ಸಂಭವಿಸಿದೆ.

ಮರಂದೋಡ ಗ್ರಾಮದ ರೈತ ಚೋಯಮಾಡಂಡ ಅಚ್ಚಪ್ಪ ತಮ್ಮ ಗದ್ದೆಯಲ್ಲಿ ಭತ್ತದ ನಾಟಿ ಪೂರೈಸಿದ್ದರು. ಸೋಮವಾರ ರಾತ್ರಿ ಸುರಿದ ಭಾರಿ ಮಳೆಯಿಂದ ತೋಡಿನಲ್ಲಿ ನೀರು ಉಕ್ಕಿ ಹರಿದಿದ್ದು ನಾಟಿ ಗದ್ದೆ ಮುಳುಗಡೆಯಾಗಿ ನಷ್ಟ ಸಂಭವಿಸಿದೆ.

ಬಿರುಸಿನ ಮಳೆಯಿಂದಾಗಿ ಎಮ್ಮೆಮಾಡು ಗ್ರಾಮದ ಅಭಿದ್ ತಂಙಳ್ ಅವರ ವಾಸದ ಮನೆ ಮತ್ತು ನಾಲಡಿ ಗ್ರಾಮದ ಪೂವಣ್ಣ ಅವರ ವಾಸದ ಮನೆ ಹಾನಿ ಯಾಗಿದ್ದು ಸ್ಥಳಕ್ಕೆ ಕಂದಾಯ ಪರಿವೀಕ್ಷಕ ರವಿಕುಮಾರ್ ಮತ್ತು ಸಿಬ್ಬಂ ತೆರಳಿ ಪರಿಶೀಲನೆ ನಡೆಸಿದರು.