ಕಡಲೆ ಬೆಳೆಗೆ ಸಿಡಿ ರೋಗ, ಆತಂಕದಲ್ಲಿ ರೈತ ಸಮೂಹ

ಅಶೋಕ ಸೊರಟೂರ ಲಕ್ಷ್ಮೇಶ್ವರ

ಈಗಾಗಲೆ ಹೂವಾಡಿಸುವ ಹಂತದಲ್ಲಿರುವ ಕಡಲೆ ಬೆಳೆಗೆ ಕೀಟನಾಶಕ ಸಿಂಪರಣೆ ಮಾಡಿ ಕೀಟ ನಿಯಂತ್ರಣ ಮಾಡಿದ್ದರೂ ಕಾಣಿಸಿಕೊಂಡಿರುವ ಸಿಡಿ ರೋಗಕ್ಕೆ ಮದ್ದಿಲ್ಲವಾಗಿದೆ ಎಂದು ರೈತರು ಅಳಲು ತೋಡಿಕೊಳ್ಳುತ್ತಿದ್ದಾರೆ.

ಮುಂಗಾರಿನ ಹೆಸರು, ಗೋವಿನ ಜೋಳ, ಕಂಠಿ ಶೇಂಗಾ ಬೆಳೆದ ರೈತರು, ಈಗ ಆ ಜಮೀನುಗಳಲ್ಲಿ ಕಡಲೆ, ಜೋಳ, ಗೋಧಿ, ಕುಸುಬಿ ಮತ್ತು ಸೂರ್ಯಕಾಂತಿ ಬಿತ್ತನೆ ಮಾಡಿದ್ದಾರೆ. ಆದರೆ ಬಹುತೇಕ ರೈತರು ಲಾಭದಾಯಕವಾದ ಕಡಲೆ ಬಿತ್ತನೆ ಮಾಡಿದ್ದಾರೆ. ಈಗ ಉಂಟಾಗಿರುವ ಕಡಲೆ ಬೆಳೆಗೆ ಕಾಣಿಸಿಕೊಂಡಿರುವ ಸಿಡಿ ರೋಗ ಬಾಧೆಯಿಂದ ಬೆಳೆ ಕಾಪಾಡುವ ಕಾರ್ಯ ಕೃಷಿ ಸಂಶೋಧನಾ ಕೇಂದ್ರದ ಅಧಿಕಾರಿಗಳು ರೈತರಿಗೆ ತಿಳಿಸಿ ಕೊಟ್ಟಲ್ಲಿ ರೈತರು ನೆಮ್ಮದಿಯ ನಿಟ್ಟುಸಿರು ಬಿಡಬಹುದು ಎಂದು ಬಹುತೇಕ ರೈತರ ಅಭಿಪ್ರಾಯವಾಗಿದೆ.

ಅಣ್ಣಿಗೇರಿಯಲ್ಲಿನ ಕಡಲೆ ಸಂಶೋಧನಾ ಕೇಂದ್ರದ ಅಧಿಕಾರಿಗಳ ಜತೆ ಕಡಲೆ ಬೆಳೆಗೆ ಉಂಟಾಗಿರುವ ಸಿಡಿ ರೋಗದ ಬಗ್ಗೆ ಮಾತಾಡಿದ್ದು, ಕಡಲೆ ಬೆಳೆಯ ಬೇರು ಕಡಿಯುವ ಕೀಟವು ಭೂಮಿ ಒಳಗಡೆ ಅವಿತುಕೊಂಡಿರುತ್ತದೆ. ಕಡಲೆ ಬೆಳೆಯಲ್ಲಿನ ಬೇರು ಕಡಿದು ರಸ ಹೀರುವುದರಿಂದ ಬೆಳೆ ಸಂಪೂರ್ಣವಾಗಿ ನಾಶವಾಗುತ್ತದೆ. ಇದರಿಂದ ಭೂಮಿಯಲ್ಲಿ ಅವಿತುಕೊಂಡಿರುವ ಕೀಟ ಕೊಲ್ಲುವುದು ಅಸಾಧ್ಯದ ಮಾತಾಗಿದೆ. ಅಲ್ಲದೆ ಬಿತ್ತನೆಗೂ ಮೊದಲೆ ಬೀಜೋಪಚಾರ ಮಾಡಿರುವ ಹೊಲಗಳಲ್ಲಿಯೂ ಸಿಡಿ ರೋಗ ಕಾಣಿಸಿಕೊಂಡಿರುವುದು ಸವಾಲಿನ ಕೆಲಸವಾಗಿದೆ. ಇದೇ ರೀತಿ ಇನ್ನೊಂದು ವಾರ ಮೋಡ ಕವಿದ ವಾತಾವರಣ ಮತ್ತು ಮಳೆ ಮುಂದುವರಿದರೆ ಕಡ್ಲೆ ಬೆಳೆ ನಾಶವಾಗುತ್ತದೆ ಎಂದು ಗೊಜನೂರ ಗ್ರಾಮದ ರೈತರಾದ ವೀರನಗೌಡ ಪಾಟೀಲ, ಚೆನ್ನಪ್ಪ ಷಣ್ಮುಖಿ ಹೇಳುತ್ತಾರೆ.