ಅಂಧರಿಗೆ ಆಶಾಕಿರಣವಾದ ಚನ್ನವೀರಸ್ವಾಮಿ ಹಿಡ್ಕಿಮಠ

ಗದಗ: ಅಕ್ಷರ- ಅರಿವು-ಅನ್ನ ದಾನ ನೀಡಿ ಅಂಧರ ಬಾಳಿಗೆ ಆಶಾಕಿರಣವಾಗಿ ನೊಂದ ತಂದೆ-ತಾಯಿಗಳ ಮನಕ್ಕೆ ಮುದ ನೀಡುವ ಆಶ್ರಮ ಹುಟ್ಟು ಹಾಕಿ ತಮ್ಮ ಜೋಳಿಗೆಗೆ ಮಕ್ಕಳನ್ನು ತಂದು ಹಾಕುವಂತೆ ಬೇಡಿಕೊಂಡ ಕರುಣೆಯೇ ಮೂರ್ತಿವೆತ್ತಂತೆ ಎಲ್ಲರನ್ನು ಸಲುಹಿದ ಆಶ್ರಮವೇ ಗದುಗಿನ ವೀರೇಶ್ವರ ಪುಣ್ಯಾಶ್ರಮವಾಗಿದೆ ಎಂದು ಕೀರ್ತನಕಾರ ಪಂ.ಎಂ. ಕಲ್ಲಿನಾಥಶಾಸ್ತ್ರಿ ಅಡ್ನೂರ ಹೇಳಿದರು.

ಗದುಗಿನ ವೀರೇಶ್ವರ ಪುಣ್ಯಾಶ್ರಮ ಕಳೆದ ಆರೂವರೆ ದಶಕದಿಂದ ಅಂಧ-ಅನಾಥರಿಗೆ ಅಭಯ ನೀಡುತ್ತ ಸಾಗಿರುವ ದಾರಿಯಲ್ಲಿ ಸ್ಮರಿಸಬೇಕಾದ ಪ್ರಾಥಸ್ಮರಣೀಯರೆಂದರೆ ದಿ. ಚನ್ನವೀರಶಾಸ್ತ್ರಿ ಹಿಡ್ಕಿಮಠರವರಾಗಿದ್ದಾರೆ.

ಅಧ್ಯಕ್ಷತೆ ವಹಿಸಿ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ವಿವೇಕಾನಂದಗೌಡ ಪಾಟೀಲ ಮಾತನಾಡಿ, ಶಿಕ್ಷಕ ವೃತ್ತಿಯಲ್ಲಿ ಭವಿಷ್ಯ ಕಟ್ಟಿಕೊಳ್ಳುತ್ತಿರುವ ಪ್ರಶಿಕ್ಷಣಾರ್ಥಿಗಳಿಗೆ ಸಾಧಕರ ಪರಿಚಯ ಗೊತ್ತಿರಬೇಕು. ಹೀಗಾಗಿ ವೀರೇಶ್ವರ ಪುಣ್ಯಾಶ್ರಮದ ಪದಾಧಿಕಾರಿಗಳಲ್ಲಿ ನಿವೇದನೆ ಎಂದರೆ ಪ್ರತಿವರ್ಷ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನಿಂದ ಪಂ.ಪುಟ್ಟರಾಜ ಗವಾಯಿಗಳವರ ಸ್ಮರಣೋತ್ಸವದಂದು ಇವರ ಹೆಸರಿನಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದ ಸಾಧಕರಿಗೆ ಪ್ರಶಸ್ತಿ ನೀಡಿ ಗೌರವಿಸುವ ಸಲುವಾಗಿ ರಾಜ್ಯ ಪರಿಷತ್ತಿನಲ್ಲಿ ಕನಿಷ್ಟ ಮೂರರಿಂದ ಐದು ಲಕ್ಷ ಹಣ ಠೇವಣಿ ಇರಿಸಿ ಇದರಿಂದ ಬರುವ ಬಡ್ಡಿ ಹಣದಲ್ಲಿ ಸಾಧಕರನ್ನು ಗೌರವಿಸುವ ಕಾರ್ಯವಾಗಬೇಕು. ಈಗಾಗಲೇ ಅನೇಕ ಶಿಕ್ಷಣ ಸಂಸ್ಥೆಗಳು ಠೇವಣಿ ಇರಿಸಲು ಮುಂದೆ ಬಂದಿವೆ. ಇದರಿಂದ ಕಲಾವಿದರು, ಸಂಗೀತಗಾರರು, ಕೀರ್ತನಕಾರರಿಗೆ ಪ್ರೋತ್ಸಾಹಿಸಿದಂತಾಗುತ್ತದೆಂದರು.

ಪ್ರಾಚಾರ್ಯ ಡಾ. ವೀರೇಶ ಹಿತ್ತಲಮನಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಡಾ. ಎ.ಎಸ್.ಜಂಬಣ್ಣವರ ಡಾ.ಪಿ.ಎಚ್. ಜೋಗಿ, ಡಾ. ಶುಭಾ ಎಸ್ ಜೆ. ಎಸ್.ಎನ್. ಹೊಸಮನಿ, ಜಿ.ಬಿ.ಹೂಗಾರ, ಗೀತಾ ಕಬಾಡಿ, ಸಿ.ಎಂ. ಮಾರನಬಸರಿ, ಆರ್.ಡಿ. ಕಪ್ಪಲಿ ಉಪಸ್ಥಿತರಿದ್ದರು.