ಕಲುಷಿತ ಕೇಕ್ ತಿಂದು ಮಗು ಅಸ್ವಸ್ಥ: ಪೋಷಕರ ದೂರು

ಕನ್ನಡಪ್ರಭ ವಾರ್ತೆ ನಾಗಮಂಗಲ

ಪಟ್ಟಣದ ಆನಂದ್ ಎಂಬುವರು ಭಾನುವಾರ ಸಂಜೆ ಕಾವೇರಿ ಬೇಕರಿಯಲ್ಲಿ ಐಸ್ ಕೇಕ್ ತಂದು ಮಗುವಿಗೆ ತಿನ್ನಿಸಿದ್ದರು. ಕೇಕ್ ತಿಂದ ಕೆಲವೇ ಕ್ಷಣದಲ್ಲಿ ಮಗು ಅಸ್ವಸ್ಥಗೊಂಡ ಹಿನ್ನೆಲೆಯಲ್ಲಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿದರು. ಮಗುವನ್ನು ಪರೀಕ್ಷಿಸಿದ ವೈದ್ಯರು ಫುಡ್‌ ಪಾಯಿಸನ್‌ನಿಂದ ಈ ರೀತಿ ಆಗಿದೆ ಎಂದು ತಿಳಿಸಿದ್ದರು.

ಪುರಸಭೆ ಮುಖ್ಯಾಧಿಕಾರಿ ಶ್ರೀನಿವಾಸ್ ಅವರ ನಿರ್ದೇಶನದ ಮೇರೆಗೆ ಕಾವೇರಿ ಬೇಕರಿಗೆ ಭೇಟಿಕೊಟ್ಟ ಆರೋಗ್ಯ ನಿರೀಕ್ಷಕರಾದ ವೆಂಕಟೇಶ್, ನಿಂಗೇಗೌಡ ಮತ್ತು ಮಹೇಶ್ ಅವರು ಅವ್ಯವಸ್ಥೆಯಿಂದ ಕೂಡಿದ್ದ ಪದಾರ್ಥಗಳನ್ನು ತಯಾರಿಸುವ ಕೊಠಡಿ, ಎಲ್ಲೆಂದರಲ್ಲಿ ಬಿದ್ದು ಚೆಲ್ಲಾಡುತ್ತಿದ್ದ ಆಹಾರ ಪದಾರ್ಥಗಳು, ಕೊಳೆತು ನಾರುತ್ತಿದ್ದ ಕೇಕ್ ಮೇಲೆ ಸಿಂಪಡಿಸುವ ಕಲರ್ ಮತ್ತು ಕ್ರೀಮ್, ತಿಂಡಿ-ತಿನಿಸು ತಯಾರಿಸುವ ಕಿಚನ್ ಕೊಠಡಿಯನ್ನು ಕಂಡು ದಂಗಾಗದರು.

ಬೇಕರಿ ತಿಂಡಿ-ತಿನಿಸುಗಳನ್ನು ತಯಾರಿಸುವ ಕೊಠಡಿ ಅಶುಚಿತ್ವದಿಂದ ಕೂಡಿದ್ದ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಕಾವೇರಿ ಬೇಕರಿಗೆ ಬೀಗ ಮುದ್ರೆ ಹಾಕಿದರು.

ಮಂಗಳವಾರ ಬೆಳಗ್ಗೆ ಸ್ಥಳಕ್ಕಾಗಮಿಸಿದ ಆಹಾರ ಸುರಕ್ಷತಾ ಅಧಿಕಾರಿ ಬಸವರಾಜು ಎರಡೂ ಕಾವೇರಿ ಬೇಕರಿಗಳನ್ನು ಪರಿಶೀಲನೆ ನಡೆಸಿದರು. ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣ ಪಕ್ಕದ ಕಾವೇರಿ ಬೇಕರಿಯಲ್ಲಿದ್ದ ಕೇಕ್ ಮತ್ತು ಇನ್ನಿತರೆ ಪದಾರ್ಥಗಳನ್ನು ಪ್ರಯೋಗಾಲಯಕ್ಕೆ ಕಳುಹಿಸಿ ಪರೀಕ್ಷೆಗೊಳಪಡಿಸಿ ಕಾವೇರಿ ಬೇಕರಿ ಮಾಲೀಕ ಕೆ.ಪಿ.ರವಿ ವಿರುದ್ಧ ದೂರು ದಾಖಲಿಸಿದ್ದಾರೆ.