ತಾಯಿಯಿಂದ ಮಾತ್ರ ನಾಗರಿಕತೆ ಮುಂದುವರಿಯಲು ಸಾಧ್ಯ: ಸದಾಶಿವ ಶ್ರೀಗಳು

ಬ್ಯಾಡಗಿ: ತಾಯಿಯಿಂದ ಮಾತ್ರ ಸಮಾಜದಲ್ಲಿ ನಾಗರಿಕತೆ ಮುಂದುವರಿಯಲು ಸಾಧ್ಯ ಎಂದು ಹಾವೇರಿ ಹುಕ್ಕೇರಿಮಠದ ಸದಾಶಿವಶ್ರೀಗಳು ಅಭಿಪ್ರಾಯ ವ್ಯಕ್ತಪಡಿಸಿದರು.

ವ್ಯಕ್ತಿಯ ಬದುಕಿನಲ್ಲಿ ತಾಯಿ ಸ್ಥಾನ ತುಂಬಲು ಸಾಧ್ಯವಿಲ್ಲ, ವ್ಯಕ್ತಿ ಎಷ್ಟೇ ಎತ್ತರಕ್ಕೆ ಬೆಳೆದರೂ ತಾಯಿಯ ಋಣ ತೀರಿಸಲು ಸಾಧ್ಯವಿಲ್ಲ. ಹೀಗಾಗಿ ಮಾತೃ ದೇವೋಭಯ ಎಂದು ಉಲ್ಲೇಖಿಸಲಾಗಿದ್ದು, ಆಕೆಯನ್ನು ದೇವರಿಗೆ ಹೋಲಿಸಲಾಗುತ್ತದೆ ಎಂದು ಹೇಳಿದರು.

ಶರಣರ ನುಡಿ ಸಾರ್ವಕಾಲಿಕ: ಮಾಜಿ ಸಂಸದ ಪ್ರೊ. ಐ.ಜಿ. ಸನದಿ ಮಾತನಾಡಿ, ‘ಇವನಾರವ ಇವನಾರವ ಎನ್ನದೇ ಇವ ನಮ್ಮವ ಇವ ನಮ್ಮವ’ ಎಂದಾಗ ಜೀವನ ಸಾರ್ಥಕವಾಗಲಿದೆ. ಹೀಗೆ ಎಂಟನೂರು ವರ್ಷಗಳ ಹಿಂದೆಯೇ ಶರಣರ ಅನುಭವದ ತಮ್ಮ ಮಾತುಗಳನ್ನು ಸಾದರಪಡಿಸಿದ್ದಾರೆ. ಅವರಾಡಿದ ಎಲ್ಲ ಮಾತುಗಳು ಸಾರ್ವಕಾಲಿಕ ಸತ್ಯವಾಗಿದ್ದು ಬದುಕಿನ ಪ್ರತಿಯೊಂದು ಹಂತದಲ್ಲಿ ಅಳವಡಿಸಿಕೊಂಡಲ್ಲಿ ನಮ್ಮ ಹುಟ್ಟಿಗೂ ಒಂದು ಅರ್ಥ ಬರಲಿದೆ ಎಂದರು.

ಹೂವಿನಹಡಗಲಿ ಶಾಂತಲಿಂಗಶ್ರೀಗಳು, ಲಿಂಗನಾಯಕನಹಳ್ಳಿ ಚೆನ್ನವೀರಶ್ರೀಗಳು, ತಿಪ್ಪಾಯಿಕೊಪ್ಪದ ಮಹಾಂತಶ್ರೀಗಳು, ಮಾಜಿ ಶಾಸಕ ಸುರೇಶಗೌಡ ಪಾಟೀಲ, ಗಡಿ ಪ್ರಾಧಿಕಾರ ಅಧ್ಯಕ್ಷ ಸೋಮಣ್ಣ ಬೇವಿನಮರದ, ವರ್ತಕ ಶಂಭಣ್ಣ ಶಿರೂರ, ಪುರಸಭೆ ಸದಸ್ಯ ಬಸವರಾಜ ಛತ್ರದ ರಾಚಯ್ಯಸ್ವಾಮಿ ಓದಿಸೋಮಠ, ಜಿ. ಶಿವನಗೌಡ್ರ, ಡಾ. ಸಿ.ಬಿ. ಪಾಟೀಲ, ಡಾ. ಗಿರೀಶ ಬಾಳಿಕಾಯಿ, ಗಂಗಾಧರಶಾಸ್ತ್ರೀ ಹಿರೇಮಠ ಇದ್ದರು.