ಅಯೋಧ್ಯೆಯಲ್ಲಿ ಸಂಪೂರ್ಣ ರಾಮಾಯಣ ನಾಟಕ ಪ್ರದರ್ಶನ

ಕನ್ನಡಪ್ರಭ ವಾರ್ತೆ ಚನ್ನರಾಯಪಟ್ಟಣ

ಅಯೋಧ್ಯೆಯಲ್ಲಿ ಪೌರಾಣಿಕ ನಾಟಕ ನೇತೃತ್ವ ವಹಿಸಿರುವ ಕಲಾವಿದ ನಿವೃತ್ತ ಎಂಜಿನಿಯರ್ ಜಯಲಿಂಗೇಗೌಡ ಮಾತನಾಡಿ, ಸಾಂಸ್ಕೃತಿಕ, ಆಧ್ಯಾತ್ಮಿಕತೆಯ ರಾಜಧಾನಿಯಂತಿರುವ ಉತ್ತರ ಪ್ರದೇಶದಲ್ಲಿ ಇದೀಗ ಅಯೋಧ್ಯೆಯೇ ದೇಶದ ಗಮನ ಸೆಳೆದು ಹಿಂದೂಗಳ ಆರಾಧ್ಯ ದೈವ, ಮಾರ್ಯದಾ ಪುರುಷೋತ್ತಮ ಶ್ರೀರಾಮನ ಜನಸ್ಥಳವಾದ ಅಯೋಧ್ಯೆಯಲ್ಲಿ ರಾಮಲಲ್ಲಾನ ಭವ್ಯಮಂದಿರ ಲೋಕಾರ್ಪಣೆಗೊಂಡು ಒಂದು ವರ್ಷ ಪೂರ್ಣಗೊಂಡಿದೆ. ಇಂತಹ ಪವಿತ್ರ ಕ್ಷೇತ್ರಕ್ಕೆ ಹೋಗುವುದೇ ಸೌಭಾಗ್ಯ. ಇಂತಹ ಸಂದರ್ಭದಲ್ಲಿ ನಮ್ಮ ಶ್ರೀ ಆನೆಗೋಳದಮ್ಮ ಹಾಗೂ ಶ್ರೀ ಆಂಜನೇಯ ಸ್ವಾಮಿ ಕೃಪಾ ಪೋಷಿತ ನಾಟಕ ಮಂಡಳಿ ವತಿಯಿಂದ ಸಂಪೂರ್ಣ ರಾಮಾಯಣ ಅಥವಾ ಶ್ರೀ ರಾಮ, ರಾವಣನ ಯುದ್ಧ ಎಂಬ ಸುಂದರ ಪೌರಾಣಿಕ ನಾಟಕವನ್ನು ರಾಮನ ಜನ್ಮಸ್ಥಳದಲ್ಲೆ ನಾಟಕ ಪ್ರದರ್ಶಿಸಲು ನಮಗೆ ಅವಕಾಶ ಸಿಕ್ಕಿರುವುದು ನಮ್ಮ ಪೂರ್ವ ಜನ್ಮದ ಪುಣ್ಯ ಹಾಗೂ ಪೌರಾಣಿಕ ನಾಟಕ ಕಲಾವಿದರಿಗೆ ಸಂದ ಗೌರವ ಎಂದು ಹರ್ಷ ವ್ಯಕ್ತಪಡಿಸಿದರು. ನಾವು ರಾಜ್ಯದಾದ್ಯಂತ ಹಲವು ಭಾಗಗಳಲ್ಲಿ ನಾಟಕಗಳನ್ನು ಪ್ರದರ್ಶನ ನೀಡಿದ್ದೇವೆ. ಜೊತೆಗೆ ನಮ್ಮ ಬೆನ್ನುಲುಬಾಗಿ ಕಲಾತಂಡದ ಸದಸ್ಯರು ಮತ್ತು ಕುಟುಂಬಸ್ಥರ ಜೊತೆ ಆನೆಗೊಳ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯ ಗ್ರಾಮಸ್ಥರು ನಮ್ಮ ಜೊತೆ ಅಯೋಧ್ಯೆ ನಗರಕ್ಕೆ ರೈಲು, ವಿಮಾನಗಳಲ್ಲಿ ಸುಮಾರು ೧೭೦ ಕಲಾಭಿಮಾನಿಗಳು ಬಂದು ನಮ್ಮ ನಾಟಕವನ್ನು ನೋಡುತ್ತಿರುವುದು ನಮ್ಮ ಪೂರ್ವ ಜನ್ಮದ ಪುಣ್ಯ ಎಂದು ತಿಳಿಸಿದರು.

ವಿಮಾ ಸಲಹೆಗಾರ ದಯಾನಂದ ಮಾತನಾಡುತ್ತಾ ಶ್ರೀ ರಾಮನ ತದ್ರೂಪವಾದ ಜೈಲಿಂಗೇಗೌಡರು ಇಷ್ಟೊಂದು ಜನರನ್ನ ಅಯೋಧ್ಯೆಗೆ ಕರೆದುಕೊಂಡು ಬಂದು ಕಾಶಿ ವಿಶ್ವನಾಥನ ದರ್ಶನ, ಅಯೋಧ್ಯ ರಾಮಲಲ್ಲ ದೇವಸ್ಥಾನ, ಪ್ರಯಾಗ್‌ರಾಜ್‌ನ ಕುಂಭಮೇಳಕು ಭೇಟಿ ಕೊಡಿಸಿರುವುದು ಸಾಹಸದ ವಿಚಾರ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಡ್ರಾಮಾ ಮಾಸ್ಟರ್‌ ಪ್ರಜ್ವಲ್ ಜಗದೀಶ್, ದಶರಥ, ಸಂತೋಷ, ನಿಂಗರಾಜು, ಕೃಷ್ಣಮೂರ್ತಿ, ರಮೇಶ್, ಶ್ರೀನಿವಾಸ್, ಮೂರ್ತಿ, ಪುಟ್ಟರಾಜು, ಸೋಮಾಚಾರ, ಹರೀಶ್, ಚೈತ್ರ, ಶೋಭಾ, ಸೇರಿದಂತೆ ಆನೆಗೊಳ ಸರ್ವೆ ಮಂಜುನಾಥ್, ಅಂಚೇಬೀರನಹಳ್ಳಿ ಮಂಜುನಾಥ್, ಶೀಳನೆರೆ ಮಂಜೇಗೌಡ, ಕಡಹೆಮ್ಮಿಗೆ ಮೀಸೆ ರಾಮೇಗೌಡ, ಲೋಕೇಶ್ ಹಡೇನಹಳ್ಳಿ, ವಿಮಾ ಸಲಹೆಗಾರ ದಯಾನಂದ ಶೆಟ್ಟಿಹಳ್ಳಿ, ಹೇಮಂತ್, ವೈದ್ಯ ನಸಿಂಗ್ ಅಂಡ್ ಪ್ಯಾರಾ ಮೆಡಿಕಲ್ ಶಾಲೆಯ ಪ್ರಾಂಶುಪಾಲ, ಅರುಣ್ ಕುಮಾರ್ ಸೇರಿದಂತೆ ಸುಮಾರು ೧೭೦ಕ್ಕೂ ಹೆಚ್ಚಿನ ಕೆ.ಆರ್‌.ಪೇಟೆ ತಾಲೂಕಿನ ಗ್ರಾಮಸ್ಥರು ಹಾಜರಿದ್ದು, ನಾಟಕವನ್ನು ವೀಕ್ಷಣೆ ಮಾಡಿದ್ದು, ವಿಶೇಷವಾಗಿತ್ತು.