ಕ್ರೈಂ ವೈಭವೀಕರಿಸಿದರೆ ದುಷ್ಪರಿಣಾಮ: ಪರಂ ಕಳವಳ

ಕನ್ನಡಪ್ರಭ ವಾರ್ತೆ ತುಮಕೂರು ಮಾಧ್ಯಮಗಳು ಕ್ರೈಂ ಅನ್ನು ಹೆಚ್ಚು ವೈಭವೀಕರಿಸಿದರೆ ಸಮಾಜದ ಮೇಲೆ ದುಷ್ಪರಿಣಾಮ ಬೀರಲಿದ್ದು, ಯುವಜನರು ಅಪ್ರಾಪ್ತರು ಅಪರಾಧ ಜಗತ್ತಿನ ಕಡೆ ವಾಲುವ ಆತಂಕವಿದೆ ಎಂದು ಗೃಹ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಜಿ.ಪರಮೇಶ್ವರ ಆತಂಕ ವ್ಯಕ್ತಪಡಿಸಿದರು.ಅವರು ನಗರದ ಜಿಪಂ ಸಭಾಂಗಣದಲ್ಲಿ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾ ಘಟಕದಿಂದ ಜರುಗಿದ ಪ್ರತಿಭಾನ್ವಿತ ಪತ್ರಕರ್ತರ ಮಕ್ಕಳಿಗೆ ಡಾ ಜಿ ಪರಮೇಶ್ವರ ಹಾಗೂ ಕನ್ನಿಕಾ ಪರಮೇಶ್ವರ ಉನ್ನತ ಶಿಕ್ಷಣ ಪ್ರೋತ್ಸಾಧನ ವಿತರಣೆ, ಪ್ರತಿಭಾ ಪುರಸ್ಕಾರ ಸಮಾರಂಭ ಉದ್ಘಾಟಿಸಿ ಹಾಗೂ ತುಮಕೂರು ಮಹಾನಗರ ಪಾಲಿಕೆ ವತಿಯಿಂದ ನಗರ ನಿವಾಸಿ ಪತ್ರಕರ್ತರಿಗೆ ಕ್ಯಾಶ್ ಲೆಸ್ ಆರೋಗ್ಯ ವಿಮೆ ಕಾರ್ಡ್ ವಿತರಣೆ ಮಾಡಿ ಮಾತನಾಡಿದರು.ಕ್ರೈಂಗಳನ್ನು ವೈಭವೀಕರಿಸಿದಷ್ಟು ಅಪರಾಧಿಗಳ ಸಂಖ್ಯೆ ಹೆಚ್ಚುತ್ತಲೇ ಇರುತ್ತದೆ. ಮಾಧ್ಯಮಗಳು ಮೌಲ್ಯಗಳನ್ನು ಎತ್ತಿಹಿಡಿಯುವ ಕಾರ್ಯಮಾಡಬೇಕು. ನಾವು ಮಾಡುವ ಸುದ್ದಿಗಳು ಸಮಾಜದ ಮೇಲೆ, ಯುವ ಮನಸ್ಸುಗಳ ಮೇಲೆ ಯಾವ ರೀತಿ ಪರಿಣಾಮ ಬೀರುತ್ತದೆಂಬ ಸೂಕ್ಷ್ಮತೆ ಪತ್ರಕರ್ತರಾದವರಿಗೆ ಇರಬೇಕು ಎಂದು ಕಿವಿಮಾತು ಹೇಳಿ, ಗ್ರಾಮೀಣ ಪತ್ರಕರ್ತರಿಗೆ ಉಚಿತ ಬಸ್ ಪಾಸ್ ವಿತರಿಸಲು ನಮ್ಮ ಸರ್ಕಾರ ಕ್ರಮವಹಿಸಿದ್ದು, ಪತ್ರಕರ್ತರ ಆರೋಗ್ಯ ಕಾಳಜಿಗೂ 10 ಕೋಟಿ ಹಣವನ್ನು ಬಜೆಟ್‌ನಲ್ಲಿ ಸಿಎಂ ಒದಗಿಸಿದ್ದಾರೆಂದರು.25 ಲಕ್ಷ ವಾಗ್ದಾನ ಪೂರೈಸಿದ ಪರಂ

ಮುಖ್ಯ ಅತಿಥಿಯಾಗಿ ಮಾತನಾಡಿದ ಜಿಲ್ಲಾಧಿಕಾರಿ ಶುಭಕಲ್ಯಾಣ್, ಜಿಲ್ಲಾಡಳಿತ ಅನೇಕ ಕೆಲಸ ಕಾರ್ಯಗಳಿಗೆ ಪತ್ರಕರ್ತರು, ವರದಿಗಳು ದಿಕ್ಸೂಚಿಯಾಗಿವೆ. ಪತ್ರಕರ್ತರ ಸಮಯ, ಸಂಯಮ ಕೆಲಸದ ಒತ್ತಡ ನಿಭಾವಣೆ ಶ್ಲಾಘನೀಯವಾಗಿದ್ದು, ಸಚಿವರಾದ ಡಾ. ಜಿ. ಪರಮೇಶ್ವರ ದಂಪತಿಗಳು ಪತ್ರಕರ್ತರ ಮಕ್ಕಳಿಗೆ ನೀಡಿರುವ ಪ್ರೋತ್ಸಾಹ ಧನ ಅತ್ಯಂತ ಅಮೂಲ್ಯವಾದದು. ನಾವು ಸಹ ಸ್ಕಾಲರ್‌ಶಿಪ್ ಹಣದಲ್ಲೇ ಓದಿ ರ್ಯಾಂಕ್ ಪಡೆದಾಗ ಬಹುಮಾನವಾಗಿ ಬಂದ ಹತ್ತು ಸಾವಿರ ರೂಪಾಯಿಗಳನ್ನು ಇನ್ನೂ ಕಾಪಿಟ್ಟುಕೊಂಡಿದ್ದೇನೆ ಎಂದರು.ಸತ್ಕಾರ್ಯಕ್ಕೆ ವೇದಿಕೆ

ಭಾರತೀಯ ಕಾರ್ಯನಿರತ ಪತ್ರಕರ್ತರ ಸಂಘದ ಒಕ್ಕೂಟದ ಅಧ್ಯಕ್ಷ ಬಿ.ವಿ. ಮಲ್ಲಿಕಾರ್ಜುನಯ್ಯ ಅವರು ಮಾತನಾಡಿ ಪತ್ರಕರ್ತರ ಸಂಕಷ್ಟಕ್ಕೆ ಡಾ.ಜಿ.ಪರಮೇಶ್ವರ ಅವರು ಮೊದಲಿನಿಂದಲೂ ಸ್ಪಂದಿಸುತ್ತಾ ಬಂದಿದ್ದು, ಪತ್ರಕರ್ತರ ಮಕ್ಕಳ ಶೈಕ್ಷಣಿಕ ಪ್ರಗತಿಗೆ ೨೫ ಲಕ್ಷ ಕೊಡುಗೆ ಸುಲಭ ಸಂಗತಿಯಲ್ಲ. ತುಮಕೂರಲ್ಲಿ ಜರುಗಿದ ರಾಷ್ಟ್ರೀಯ ಅಧಿವೇಶನದ ಯಶಸ್ಸಿಗೂ ಇದೇ ರೀತಿ ಸಹಕರಿಸಿದ್ದಾರೆ. ಮಹಾನಗರಪಾಲಿಕೆಯವರು ನಗರವಾಸಿ ಪತ್ರಕರ್ತರಿಗೂ ನೀಡಿರುವ ಆರೋಗ್ಯ ವಿಮೆಯನ್ನು ಗ್ರಾಮೀಣ ಪತ್ರಕರ್ತರಿಗೂ ವಿಸ್ತರಿಸಬೇಕು ಎಂದರು.ಕೆಯುಡಬ್ಲ್ಯೂಜೆ ಜಿಲ್ಲಾಧ್ಯಕ್ಷ ಚಿ.ನಿ. ಪುರುಷೋತ್ತಮ್ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಪತ್ರಕರ್ತರ ಹಿತೈಷಿಗಳಾಗಿರುವ ಸಚಿವರಾದ ಡಾ. ಜಿ ಪರಮೇಶ್ವರ ಅವರು ಕಳೆದ ವರ್ಷ ಘೋಷಿಸಿದಂತೆ 25 ಲಕ್ಷ ಚೆಕ್ ಅನ್ನು ಪತ್ರಕರ್ತರ ಮಕ್ಕಳ ಶೈಕ್ಷಣಿಕ ಪ್ರಗತಿಗೆ ಉದಾರ ಮನಸ್ಸಿನಿಂದ ನೀಡಿದ್ದು, ಇಡೀ ದೇಶಕ್ಕೆ ಮಾದರಿಯೆನಿಸಿದೆ ಎಂದರು.ಕಾರ್ಯಕ್ರಮದಲ್ಲಿ ಎಸ್‌ಎಸ್‌ಎಲ್‌ಸಿ ಹಾಗೂ ಪಿಯುಸಿ, ಪದವಿಯಲ್ಲಿ ಟಾಪರ್‌ಗಳಾದ ಕೆ.ಪಿ. ಪ್ರಿಯತೋಷ್, ಡಿ. ಗುಣಸಾಗರ್ ಅವರಿಗೆ ತಲಾ ಒಂದು ಲಕ್ಷ ನಗದು ಪ್ರೋತ್ಸಾಹಧನ ಸೇರಿದಂತೆ ಒಟ್ಟು 36 ಪ್ರತಿಭಾವಂತ ಮಕ್ಕಳಿಗೆ ಪ್ರತಿಭಾ ಪುರಸ್ಕಾರ ನೀಡಿ ಗೌರವಿಸಲಾಯಿತು.ಕಲಾವಿದ ಡಾ.ರಾಜ್ ವಾಯ್ಸ್ ಖ್ಯಾತಿಯ ದಿಬ್ಬೂರು ಮಂಜುನಾಥ್ ಅವರ ತಂಡದಿಂದ ಗೀತಗಾಯನ ನಡೆಯಿತು. ಕಲಾಶ್ರೀ ಡಾ.ಲಕ್ಷ್ಮಣದಾಸ್ ರಂಗಕೀರ್ತನೆ ಹಾಡಿದರು. ವೇದಿಕೆಯಲ್ಲಿ ರಾಷ್ಟ್ರೀಯ ಸಂ.ಕಾರ್ಯದರ್ಶಿ ಡಿ.ಎಂ.ಸತೀಶ್, ರಾಷ್ಟ್ರೀಯ ಮಂಡಳಿ ಸದಸ್ಯರಾದ ಅನು ಶಾಂತರಾಜು, ಟಿ.ಎನ್.ಮಧುಕರ್ , ಉಪಾಧ್ಯಕ್ಷರಾದ ಎಲ್.ಚಿಕ್ಕಿರಪ್ಪ, ತಿಪಟೂರು ಕೃಷ್ಣ, ಪ್ರಧಾನ ಕಾರ್ಯದರ್ಶಿ ಟಿ.ಇ. ರಘುರಾಮ್, ಕಾರ್ಯದರ್ಶಿಗಳಾದ ದಶರಥ, ಸತೀಶ್ ಹಾರೋಗೆರೆ, ರಂಗಧಾಮಯ್ಯ, ಮಹಿಳಾ ನಿರ್ದೇಶಕಿ ನಾಗರತ್ನ ಶಿವಣ್ಣ ಹಾಗೂ ನಿರ್ದೇಶಕರು ಹಾಜರಿದ್ದರು. ದವಳಶ್ರೀ ಪ್ರಾರ್ಥಿಸಿದರು. ಹರೀಶ್ ಆಚಾರ್ಯ ನಿರೂಪಿಸಿದರು. ರಘುರಾಮ್ ಸ್ವಾಗತಿಸಿದರು. ನಿರ್ದೇಶಕರಾದ ಪರಮೇಶ್, ಜಯಣ್ಣ ಪ್ರತಿಭಾ ಪುರಸ್ಕಾರ ಪಟ್ಟಿ ವಾಚಿಸಿದರು. ಕೋಟ್‌ 2