ಪಶ್ಚಿಮ ಬಂಗಾಳದ ಕಾಳಿ ಮಾತಾ ಮಂದಿರದವರೆಗೆ ದಂಪತಿ ಪಾದಯಾತ್ರೆ

ಮಲ್ಲಯ್ಯ ಪೋಲಂಪಲ್ಲಿ

ದೇಶದಲ್ಲಿ ಶಾಂತಿ-ಸೌಹಾರ್ದತೆ ನೆಲೆಸಲಿ. ಪ್ರತಿಯೊಬ್ಬರೂ ಜಾತಿ, ಕೋಮು ಸಂಘರ್ಷಗಳಿಗೆ ಆಸ್ಪದ ನೀಡದೇ ಸೌಹಾರ್ದತೆಯಿಂದ ಜೀವನ ನಡೆಸುವಂತಾಗಲಿ ಎನ್ನುವ ಉದ್ದೇಶದಿಂದ ವೃದ್ಧ ದಂಪತಿ ಸುರಪುರ ತಾಲೂಕಿನ ಏವೂರ ಗ್ರಾಮದಿಂದ ಪಶ್ಚಿಮ ಬಂಗಾಳದ ಕಾಳಿ ಮಾತಾ ಮಂದಿರದ ವರೆಗೆ 2 ಸಾವಿರ ಕಿ.ಮೀ. ಪಾದಯಾತ್ರೆ ಕೈಗೊಂಡು ಎಲ್ಲರ ಗಮನ ಸೆಳೆದಿದ್ದಾರೆ.

ಶಹಾಪುರ ಮೂಲಕ ಯಾದಗಿರಿ, ನಾರಾಯಣ ಪೇಟೆ, ವಿಜಯವಾಡ, ವಿಶಾಖಪಟ್ಟಣ, ಒಡಿಶಾ ಮೂಲಕ ಪಶ್ಚಿಮ ಬಂಗಾಳದ ದಕ್ಷಿಣೇಶ್ವರದ ಕಾಳಿ ಮಾತಾ ಮಂದಿರ ತಲುಪಲಿದ್ದಾರೆ. ಪ್ರತಿನಿತ್ಯ 30 ರಿಂದ 35 ಕಿ.ಮೀ. ನಡೆಯುವ ಗುರಿ ಇಟ್ಟುಕೊಂಡಿದ್ದು, ಮಂದಿರ ತಲುಪಲು 70 ರಿಂದ 80 ದಿನಗಳು ಬೇಕಾಗುತ್ತದೆ ಎನ್ನುತ್ತಾರೆ ಪಾದಯಾತ್ರಿಗಳು. ಈ ಪಾದಯಾತ್ರೆ ಮೊದಲಲ್ಲ, ಕಳೆದ 13 ವರ್ಷಗಳಿಂದಲೂ ಪ್ರತಿ ವರ್ಷ ಶಿವರಾತ್ರಿಯ ದಿನದಂದು ಏವೂರ ಗ್ರಾಮದಿಂದ ಸಿಂಧನೂರು ತಾಲೂಕಿನ ಅಂಭಾಮಠಕ್ಕೆ ಪಾದಯಾತ್ರೆ ಮಾಡಿರುವುದಾಗಿ ಶಾಂತಗೌಡ ತಿಳಿಸಿದ್ದಾರೆ.