ನರಗುಂದ ತಾಲೂಕಲ್ಲಿ ಮಳೆ ಕೊರತೆಯಿಂದ ಒಣಗುತ್ತಿರುವ ಬೆಳೆಗಳು

ಎಸ್.ಜಿ. ತೆಗ್ಗಿನಮನಿ

ಪ್ರಸಕ್ತ ವರ್ಷ ಕೃತಿಕಾ ಹಾಗೂ ಮೃಗಶಿರಾ ಮಳೆ ಉತ್ತಮವಾಗಿದ್ದರಿಂದ ತಾಲೂಕಿನ ರೈತರು ಹೆಸರು, ಗೋವಿನ ಜೋಳ, ಬಿ.ಟಿ.ಹತ್ತಿ, ಸೇರಿದಂತೆ ವಿವಿಧ ಬೆಳೆಗಳನ್ನು ಬಿತ್ತನೆ ಮಾಡಿದ್ದರು. ಪೈರು ನೆಲ ಬಿಟ್ಟು ಮೇಲೇಳುತ್ತಿರುವಾಗಲೇ ವರುಣದೇವ ಮೋಡದಿಂದಲೇ ಮರೆಯಾಗಿದ್ದು, ಉತ್ತಮ ಮಳೆ ಸುರಿಯುತ್ತದೆ ಎಂಬ ಬಲವಾದ ನಂಬಿಕೆಯಿಂದ ಬೀಜ ಹಾಕಿರುವ ರೈತರು ಮುಗಿಲು ಕಡೆ ಮುಖ ಮಾಡಿದ್ದಾರೆ.

ಹೆಚ್ಚು ಹೆಸರು ಬಿತ್ತನೆ: ತಾಲೂಕಿನಲ್ಲಿ ವ್ಯಾಪಕವಾಗಿ ಹೆಸರು ಬಿತ್ತನೆ ಆಗಿದ್ದು, ನಿರೀಕ್ಷೆಯಂತೆ ಬೆಳೆಯುತ್ತಿದೆ. ತಾಲೂಕಿನಲ್ಲಿ ನೀರಾವರಿಗೆ ಒಳಪಡುವ ಜಮೀನುಗಳಲ್ಲಿ ಸಹ ಹೆಸರು ಬಿತ್ತನೆ ಮಾಡಲಾಗಿದೆ. ಇದು ರೈತನಿಗೆ ವರದಾನವಾಗಬಹುದು ಎಂಬ ಮಹದಾಸೆ ಇದೆ. ಈ ಭಾಗದ ರೈತ ಸಮುದಾಯ ನೆಚ್ಚಿಕೊಂಡ ಮಲಪ್ರಭಾ ಜಲಾಶಯ ನಿರೀಕ್ಷಿತ ಮಟ್ಟದಲ್ಲಿ ಭರ್ತಿಯಾಗುತ್ತಿಲ್ಲ. ರೈತ ಸಾಲದ ಬಲೆಯಲ್ಲಿ ಸಿಲುಕಿ ನರಳುತ್ತಿದ್ದಾನೆ.

ಬಿತ್ತನೆ ವಿವರ: ಪ್ರಸಕ್ತ ವರ್ಷ ಮುಂಗಾರು ಹಂಗಾಮಿನಲ್ಲಿ ಹೆಸರು 16700 ಹೆಕ್ಟೇರ್‌, ಗೋವಿನ ಜೋಳ 13000 ಹೆ, ಬಿ.ಟಿ. ಹತ್ತಿ 4680 ಹೆ, ತೊಗರಿ 250 ಹೆ, ಸೂರ್ಯಕಾಂತಿ 240 ಹೆ ಸೇರಿ ಒಟ್ಟು 34870 ಹೆಕ್ಟೇರ್‌ ಪ್ರದೇಶದಲ್ಲಿ ರೈತರು ಬಿತ್ತನೆ ಮಾಡಿದ್ದಾರೆ.