2ನೇ ದಿನ ಭರ್ಜರಿ ಮೈಸೂರು ಚಲೋ ಪಾದಯಾತ್ರೆ

ರಾಮನಗರ: ಕಾಂಗ್ರೆಸ್ ನೇತೃತ್ವದ ರಾಜ್ಯ ಸರ್ಕಾರದ ಭ್ರಷ್ಟಾಚಾರ ಖಂಡಿಸಿ ಎನ್ ಡಿಎ ಮಿತ್ರ ಪಕ್ಷಗಳಾದ ಬಿಜೆಪಿ ಮತ್ತು ಜೆಡಿಎಸ್ ಹಮ್ಮಿಕೊಂಡಿರುವ ಮೈಸೂರು ಚಲೋ ಪಾದಯಾತ್ರೆ 2ನೇ ದಿನವಾದ ಭಾನುವಾರ ಬಿಡದಿಯಿಂದ - ಚನ್ನಪಟ್ಟಣದ ಕೆಂಗಲ್ ವರೆಗೆ ಸುಮಾರು 22 ಕಿ.ಮೀ. ಭರ್ಜರಿಯಾಗಿ ಸಾಗಿತು.

ಬಿಡದಿಯ ಹಳೇ ಬೆಂಗಳೂರು - ಮೈಸೂರು ಹೆದ್ದಾರಿಯಿಂದ ಬೆಂಗಳೂರು - ಮೈಸೂರು ಎಕ್ಸ್ ಪ್ರೆಸ್ ವೇ ಸರ್ವಿಸ್ ರಸ್ತೆಗೆ ಆಗಮಿಸಿದ ಪಾದಯಾತ್ರೆ ಕಲ್ಲುಗೋಪಳ್ಳಿ ಮಾರ್ಗವಾಗಿ ಮಾಯಗಾನಹಳ್ಳಿ ತಲುಪಿತು. ಅಲ್ಲಿ ನಾಯಕರು ಹಾಗೂ ಕಾರ್ಯಕರ್ತರು ಟೀ , ಕಾಫಿ, ಬಿಸ್ಕೆಟ್, ತಂಪು ಪಾನೀಯ ಸವಿದರು. ತರುವಾಯ ಬಸವನಪುರ ಮಾರ್ಗವಾಗಿ ರಾಮನಗರದ ಪದ್ಮಾವತಿ ದೇವಸ್ಥಾನದ ಬಳಿಗೆ ಬಂದ ಪಾದಯಾತ್ರಿಗಳು ಮಧ್ಯಾಹ್ನದ ಭೋಜನ ಸ್ವೀಕರಿಸಿದರು.

ಹೆದ್ದಾರಿಯಲ್ಲಿ ಸಾಗಿ ಬಂದ ಪಾದಯಾತ್ರಿಗಳ ಮೇಲೆ ಕಾರ್ಯಕರ್ತರು ಹೂ ಮಳೆ ಸುರಿಸಿದರು. ಎಂ.ಜಿ.ರಸ್ತೆ ಮೂಲಕ ಕೆಂಗಲ್ ಹನುಮಂತಯ್ಯ ವೃತ್ತದಲ್ಲಿ ಬಹಿರಂಗ ಸಭೆಯಲ್ಲಿ ಸಮಾವೇಶಗೊಂಡರು. ನಂತರ ಹಳೇ ಮೈಸೂರು - ಬೆಂಗಳೂರು ಹೆದ್ದಾರಿ ಮೂಲಕ ಕೆಂಗಲ್ ತಲುಪಿತು. ಸುಮಾರು 22 ಕಿಲೋ ಮೀಟರ್ ವರೆಗೆ ಬಿಜೆಪಿ - ಜೆಡಿಎಸ್ ನಾಯಕರು, ಮುಖಂಡರು ಹಾಗೂ ಕಾರ್ಯಕರ್ತರು ಹೆಜ್ಜೆ ಹಾಕಿದರು.

ಸಂಸದ ಡಾ.ಸಿ.ಎನ್ .ಮಂಜುನಾಥ್ , ವಿಧಾನ ಪರಿಷತ್ ಪ್ರತಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿ, ಮಾಜಿ ಉಪಮುಖ್ಯಮಂತ್ರಿ ಅಶ್ವತ್ಥ ನಾರಾಯಣ, ಮಾಜಿ ಸಚಿವರಾದ ಶ್ರೀರಾಮುಲು, ರೇಣುಕಾಚಾರ್ಯ ಸೇರಿದಂತೆ ಅನೇಕರ ನಾಯಕರು ಪಾದಯಾತ್ರೆಯಲ್ಲಿ ಭಾಗಿಯಾಗಿದ್ದರು.

ವಿರೋಧ ಪಕ್ಷದ ನಾಯಕ ಆರ್.ಅಶೋಕ್ ಎರಡನೇ ದಿನದ ಪಾದಯಾತ್ರೆಗೆ ಗೈರಾಗಿದ್ದರು. ಯಾದಗಿರಿ ನಗರ ಠಾಣೆ ಪಿಎಸ್ ಐ ಪರುಶುರಾಮ್ ಸಾವಿನ ಪ್ರಕರಣದ ಹಿನ್ನೆಲೆಯಲ್ಲಿ ವಿಧಾನಸಭೆ ಪ್ರತಿಪಕ್ಷದ ನಾಯಕರಾದ ಆರ್.ಅಶೋಕ್ ಅವರು ಕೊಪ್ಪಳ ಜಿಲ್ಲೆಯ ಕಾರಟಗಿಗೆ ಭೇಟಿ ನೀಡಿ ಕುಟುಂಬದ ಸದಸ್ಯರಿಗೆ ಸಾಂತ್ವನ ಹೇಳಿ ಧೈರ್ಯ ತುಂಬಲಿದ್ದಾರೆ. ಈ ಕಾರಣದಿಂದಾಗಿ 2ನೇ ದಿನದ ಪಾದಯಾತ್ರೆಯಲ್ಲಿ ಭಾಗಿಯಾಗಲಿಲ್ಲ.

2ನೇ ದಿನದ ''''''''ಮೈಸೂರು ಚಲೋ'''''''' ಪಾದಯಾತ್ರೆ ಪ್ರಾರಂಭಕ್ಕೂ ಮುನ್ನ ಬಿಜೆಪಿ ರಾಜ್ಯಾಧ್ಯಕ್ಷ ವಿಜಯೇಂದ್ರ ಬಿಡದಿಯಲ್ಲಿ ತಟ್ಟೆ ಇಡ್ಲಿ ಸವಿದರು. ಬೆಂಗಳೂರನಿಂದ ಬಿಡದಿಗೆ ಬೆಳಗ್ಗೆ ಆಗಮಿಸಿದ ವಿಜಯೇಂದ್ರರವರು ಶಾಸಕ ಕೃಷ್ಣಪ್ಪ ಸೇರಿದಂತೆ ಪ್ರಮುಖ ನಾಯಕರೊಂದಿಗೆ ಹೋಟೆಲ್ ನಲ್ಲಿ ತಟ್ಟೆ ಇಡ್ಲಿ ಸೇವಿಸಿದರು.

ಮೈಸೂರು ಚಲೋ ಪಾದಯಾತ್ರೆಯಲ್ಲಿ ಬಿಜೆಪಿ - ಜೆಡಿಎಸ್ ನಾಯಕರು ನಡೆದು ಸುಸ್ತಾದರೆ ಮಾರ್ಗಮಧ್ಯೆ ಕೆಲಕಾಲ ರೆಸ್ಟ್ ಮಾಡಲು, ಹಾಸಿಗೆ, ಚೇರು, ಟಿವಿ, ಶೌಚಾಲಯ ವ್ಯವಸ್ಥೆ ಕ್ಯಾರವ್ಯಾನ್ ಗಳು ಹೊಂದಿವೆ. ಪಾದಯಾತ್ರೆ ಸಾಗುವ ಮಾರ್ಗಮಧ್ಯದಲ್ಲಿ 3 ಕ್ಯಾರವ್ಯಾನ್ ನಿಲುಗಡೆ ಮಾಡಿದ್ದು, ಪಾದಯಾತ್ರೆ ಉದ್ದಕ್ಕೂ ಮೈಸೂರಿನವರೆಗೂ ಸುಮಾರು 8-10 ಕ್ಯಾರವ್ಯಾನ್ ಗಳು ಸಾಗುತ್ತಿವೆ.ರಸ್ತೆ ಪಕ್ಕದ ಅಂಗಡೀಲಿ

ಪಾದಯಾತ್ರೆಯಲ್ಲಿ ನಡೆದು ಸುಸ್ತಾದ ಬಿಜೆಪಿ - ಜೆಡಿಎಸ್ ನಾಯಕರು ರಸ್ತೆ ಬದಿ ಅಂಗಡಿಯಲ್ಲಿ ಟೀ ಕಾಫಿ ಸವಿದರು.

ವಿಜಯೇಂದ್ರಗೆ ಶುಭ

ಮೈಸೂರು ಚಲೋ ಪಾದಯಾತ್ರೆಯಲ್ಲಿ ಹೆಜ್ಜೆ ಹಾಕುತ್ತಿರುವ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರರಿಗೆ ಅವರ ಕುಟುಂಬಸ್ಥರು ಆಗಮಿಸಿ ಶುಭ ಹಾರೈಸಿದರು. ಬಿಡದಿ ಪಟ್ಟಣದಿಂದ 2ನೇ ದಿನದ ಪಾದಯಾತ್ರೆ ವಿಜಯೇಂದ್ರ ಸೇರಿದಂತೆ ಬಿಜೆಪಿ - ಜೆಡಿಎಸ್ ನಾಯಕರೊಂದಿಗೆ ಪ್ರಾರಂಭಗೊಂಡು ಬೆಂಗಳೂರು - ಮೈಸೂರು ಎಕ್ಸ್ ಪ್ರೆಸ್ ವೇನ ಸರ್ವಿಸ್ ರಸ್ತೆಗೆ ಆಗಮಿಸಿತು. ಈ ವೇಳೆ ಎಕ್ಸ್ ಪ್ರೆಸ್ ವೇಗೆ ಆಗಮಿಸಿದ ವಿಜಯೇಂದ್ರರ ಪತ್ನಿ, ಮಕ್ಕಳು ಪಾದಯಾತ್ರೆ ವೀಕ್ಷಿಸಿದರು.

4.ಪಾದಯಾತ್ರೆಯಲ್ಲಿ ಸಂಸದ ಡಾ.ಸಿ.ಎನ್ .ಮಂಜುನಾಥ್ ಅವರೊಂದಿಗೆ ಮಹಿಳೆಯರು ಫೋಟೋ ತೆಗೆಸಿಕೊಳ್ಳುತ್ತಿರುವುದು

6.ಬಿಜೆಪಿ ರಾಜ್ಯಾಧ್ಯಕ್ಷ ವಿಜಯೇಂದ್ರ ಬಿಡದಿ ಹೋಟೆಲ್ ನಲ್ಲಿ ತಟ್ಟೆ ಇಡ್ಲಿ ಸೇವಿಸಿದರು.

9.ರಾಮನಗರದಲ್ಲಿ ವಿಜಯೇಂದ್ರ ಮತ್ತು ನಿಖಿಲ್ ಕುಮಾರಸ್ವಾಮಿ ಅವರಿಗೆ ಬೃಹತ್ ಗಾತ್ರದ ಸೇಬಿನ ಹಾರ ಹಾಕಿ ಕಾರ್ಯಕರ್ತರು ಸ್ವಾಗತಿಸಿದರು.

11.ಪಾದಯಾತ್ರೆ ವೇಳೆ ನಿಖಿಲ್ ಕುಮಾರಸ್ವಾಮಿ ಕಾರ್ಯಕರ್ತರೊಂದಿಗೆ ರನ್ನಿಂಗ್ ಮಾಡಿದರು.