ಅರ್ಹರಿಗೆ ಸರ್ಕಾರದ ಸೌಲಭ್ಯ ತಲುಪಿಸಿ: ದೇಶಪಾಂಡೆ

ಹಳಿಯಾಳ: ಅಧಿಕಾರಿಗಳಾಗಲಿ ಅಥವಾ ಸಿಬ್ಬಂದಿಗಳಾಗಲಿ ಬಡವರಿಗೆ ಅರ್ಹರಿಗೆ ಸಹಾಯ ಮಾಡಿದರೆ ಖಂಡಿತ ಪ್ರತಿಫಲ ದೊರೆಯಲಿದೆ, ನಿಮ್ಮ ಸಂಕಷ್ಟದ ಸಮಯದಲ್ಲಿ ದೇವರು ನಿಮಗೆ ನೆರವಿಗೆ ಬರುತ್ತಾರೆ. ಈ ಮಾತನ್ನು ಶಾಸಕನಾಗಿ ನಿಮಗೆ ಹೇಳುತ್ತಿಲ್ಲ. ವಯಸ್ಸಿನಲ್ಲಿ ಹಿರಿಯನಾಗಿ ನಿಮಗೆ ನನ್ನ ಅನುಭವದ ಮಾತನ್ನು ಹೇಳುತ್ತಿದ್ದೇನೆ ಎಂದು ರಾಜ್ಯ ಆಡಳಿತ ಸುಧಾರಣಾ ಆಯೋಗದ ಅಧ್ಯಕ್ಷ, ಹಿರಿಯ ಶಾಸಕ ಆರ್.ವಿ. ದೇಶಪಾಂಡೆ ತಿಳಿಸಿದರು.

ಯಾರಿಗೂ ಯಾರ ಭಯವಿಲ್ಲವಾಗಿದೆ. ಹೀಗಾದರೆ ಆಡಳಿತ ನಡೆಯದು. ಅತಿವೃಷ್ಟಿಯಿಂದಾದ ಬೆಳೆಹಾನಿ ಪರಿಹಾರ ಇನ್ನೂವರೆಗೂ ರೈತರಿಗೆ ದೊರೆಯಲಿಲ್ಲ ಎಂದರೆ ಹೇಗೆ ಎಂದು ಪ್ರಶ್ನಿಸಿದರು.

ಹಳಿಯಾಳ ತಹಸೀಲ್ದಾರ್ ಅವರು, ಮಳೆಯಿಂದ ತಾಲೂಕಿನಲ್ಲಿ 134 ಮನೆಗಳು ಭಾಗಶಃ ಕುಸಿದಿದ್ದು, 90 ಮನೆಗಳಿಗೆ ಪರಿಹಾರ ನೀಡಲಾಗಿದೆ. 2 ಜಾನುವಾರುಗಳು ಸಾವಿಗೀಡಾಗಿವೆ. ಪರಿಹಾರವನ್ನು ನೀಡಲಾಗಿದೆ ಎಂದರು.

ಹೆಸ್ಕಾಂ ಇಲಾಖೆಯ ಎಇಇ ರವೀಂದ್ರ ಮೆಟಗುಡ್ಡ ಮಾತನಾಡಿ, ಮಳೆಗೆ 168 ಕಂಬಗಳಗೆ ಹಾನಿಯಾಗಿದ್ದು, ಅದರಲ್ಲಿ 165 ಕಂಬಗಳನ್ನು ಹಾಗೂ 53 ಟ್ರಾನ್ಸ್‌ಫಾರ್ಮರ್‌ಗಳನ್ನು ಬದಲಾಯಿಸಲಾಗಿದೆ ಎಂದರು.

ಜೋಯಿಡಾ: ತಾಲೂಕಿನ ಗಣೇಶಗುಡಿಯಲ್ಲಿರುವ ಕಾಳಿ ನದಿಯ ಸುಪಾ ಜಲಾಶಯಕ್ಕೆ ಮಂಗಳವಾರ ರಾಜ್ಯ ಆಡಳಿತ ಸುಧಾರಣಾ ಸಮಿತಿ ಅಧ್ಯಕ್ಷ ಹಾಗೂ ಶಾಸಕ ಆರ್‌.ವಿ. ದೇಶಪಾಂಡೆ ಅವರು ಬಾಗಿನ ಸಲ್ಲಿಸಿದರು.ಬಳಿಕ ಮಾತನಾಡಿದ ಅವರು, ಸದ್ಯ ಜಲಾಶಯದ ನೀರಿನ ಮಟ್ಟ 558 ಮೀಟರ್ ದಾಟಿದೆ. ಗರಿಷ್ಠ ಮಿತಿ 564 ಮೀ. ಇದೆ. ಈ ಹಿಂದೆ ಕೂಡ ಕಾಳಿ ಜಲಾಶಯ ನಾಲ್ಕೈದು ಬಾರಿ ತುಂಬಿದೆ. ಇದರಿಂದ ವಿದ್ಯುತ್ ಉತ್ಪಾದನೆ ಆಗಿ ಉಚಿತ ವಿದ್ಯುತ್ ನೀಡಲು ಅನುಕೂಲವಾಗಿದೆ. ಸದ್ಯದಲ್ಲೇ ಜಲಾಶಯ ಪೂರ್ತಿಯಾಗಿ ತುಂಬುವ ಸಾಧ್ಯತೆ ಇದೆ ಎಂದರು.ಸುಪಾ ಜಲಾಶಯದ ಸುರಕ್ಷತೆ ಕುರಿತು ಅಭಿಯಂತರ ಕೃಷ್ಣ ಭಟ್ ಮಾಹಿತಿ ನೀಡಿ, ಸರ್ಕಾರದ ಆದೇಶದಂತೆ ತಜ್ಞರ ಸಮಿತಿ ಪರಿಶೀಲನೆ ನಡೆಸಿದೆ. ಮೂರು ಗೇಟ್‌ಗಳಲ್ಲೂ ಯಾವುದೇ ತೊಂದರೆ ಇಲ್ಲ ಎಂದರು.