ಬ್ಯಾಡಗಿಯಲ್ಲಿ ಹಳೆಯ ಅರ್ಜಿದಾರರಿಗೆ ಆಶ್ರಯ ನಿವೇಶನ ಹಂಚಿಕೆಗೆ ಆಗ್ರಹ

ಬ್ಯಾಡಗಿ: ಕಳೆದ 2017ರಲ್ಲಿ ನಿರ್ಧರಿಸಿದ 833 ಫಲಾನುಭವಿಗಳ ಪಟ್ಟಿಯಲ್ಲೇ 416 ಜನರನ್ನು ಆಯ್ಕೆ ಮಾಡಬೇಕು ಹಾಗೂ ನಿವೇಶನಕ್ಕಾಗಿ ₹30 ಸಾವಿರ ಹಣ ತುಂಬಿದ ಎಲ್ಲ ಫಲಾನುಭವಿಗಳಿಗೆ ಬಡ್ಡಿಸಹಿತ ಹಣ ಮರಳಿಸುವಂತೆ ಆಶ್ರಯ ನಿವೇಶನ ಹೋರಾಟ ಸಮಿತಿ ಸದಸ್ಯರು ನಗರ ಆಶ್ರಯ ಸಮಿತಿ ಅಧ್ಯಕ್ಷ ಮುನಾಫ್ ಎರೆಶೀಮಿ ಅವರಿಗೆ ಆಗ್ರಹಿಸಿದರು.

ಏಜೆಂಟರುಗಳಿಗೆ ಬ್ರೇಕ್ ಹಾಕಿ: ತಾವು ಆಶ್ರಯ ನಿವೇಶನಗಳನ್ನು ಉಚಿತವಾಗಿ ಒದಗಿಸುತ್ತಿದ್ದಿರಿ. ಆದರೆ ನಿವೇಶನ ಕೊಡಿಸುವುದಾಗಿ ಊರ ತುಂಬೆಲ್ಲ ಏಜೆಂಟರು ಹುಟ್ಟಿಕೊಂಡಿದ್ದಾರೆ. ಪುರಸಭೆಯಲ್ಲಿನ ನೌಕರರು ಸಹ ಇದರಲ್ಲಿ ಸೇರ್ಪಡೆಗೊಂಡಿದ್ದಾರೆ. ಹಣ ಕೊಡಿಸುವ ವಿಚಾರದಲ್ಲಿ ಯಾರನ್ನು ಹಿಡಿಯಬೇಕು, ಯಾರಿಂದ ಕೆಲಸವಾಗುತ್ತದೆ ಎಂಬುದರ ಕುರಿತು ಪ್ರಶ್ನೆಗಳು ಫಲಾನುಭವಿಗಳಲ್ಲಿ ಮೂಡುತ್ತಿದೆ. ನಿಮ್ಮ ಹೆಸರನ್ನು ಹೇಳಿಕೊಂಡು ₹50 ಸಾವಿರದಿಂದ ₹1 ಲಕ್ಷದವರೆಗೆ ಬಡವರಿಂದ ಹಣ ಪೀಕುತ್ತಿದ್ದು, ಇದಕ್ಕೆ ನಿಮ್ಮ ಸಹಕಾರವಿದೆಯೇ ಎಂದು ಪ್ರಶ್ನಿಸಿದರು.

ಫರೀದಾಬಾನು ನದೀಮುಲ್ಲಾ ಮಾತನಾಡಿ, ಕಾಣದ ಕೈಗಳು ಬೆಟ್ಟದ ಮಲ್ಲೇಶ್ವರ ಬಡಾವಣೆಯಲ್ಲಿ ಅನಧಿಕೃತವಾಗಿ ನಿವೇಶನಗಳನ್ನು ಇಟ್ಟುಕೊಂಡಿದ್ದಾರೆ. ಕೂಡಲೇ ಸಮಗ್ರ ತನಿಖೆ ನಡೆಸುವ ಮೂಲಕ ಅಲ್ಲಿರುವ ಎಲ್ಲ ನಿವೇಶನಗಳನ್ನು ಹುಡುಕಿಸಿದಲ್ಲಿ ಸುಮಾರು 80ರಿಂದ 100 ಜನರಿಗೆ ಉಚಿತವಾಗಿ ನಿವೇಶನಗಳು ಸಿಗಲಿವೆ ಎಂದರು.ನಮ್ಮನ್ನು ಎಚ್ಚರಿಸಿದ್ದಕ್ಕೆ ಧನ್ಯವಾದ: ಅಧ್ಯಕ್ಷ ಮುನಾಫ್ ಎರೆಶೀಮಿ ಮಾತನಾಡಿ, ನಿವೇಶನಕ್ಕಾಗಿ ಹಣ ಕೊಟ್ಟಿರುವ ದಾಖಲೆಗಳಿದ್ದರೆ ಅಂಥವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗುವುದು. ಯಾರಿಂದಲೂ ಬಿಡಿಗಾಸು ಪಡೆಯದೇ ಉಚಿತವಾಗಿ ನಿವೇಶನ ನೀಡುವುದು ನಮ್ಮೆಲ್ಲರ ಜವಾಬ್ದಾರಿ. ನಮ್ಮ ಹಿಂದೆ ನಡೆಯುತ್ತಿರುವ ಅನಧಿಕೃತ ವಹಿವಾಟುಗಳಿಗೆ ನಾವು ಜವಾಬ್ದಾರರಲ್ಲ. ಯಾವುದೇ ಕಾರಣಕ್ಕೂ ಯಾರಿಗೂ ಹಣ ನೀಡದಂತೆ ಫಲಾನುಭವಿಗಳಲ್ಲಿ ಮನವಿ ಮಾಡಿದ ಅವರು, ಈ ಕುರಿತು ನಮ್ಮನ್ನು ಎಚ್ಚರಿಸಿದ ತಮಗೆ ಧನ್ಯವಾದ ಎಂದರು.

ಈ ಸಂದರ್ಭದಲ್ಲಿ ಆಶ್ರಯ ಸಮಿತಿ ಸದಸ್ಯರಾದ ಗಿರೀಶ ಇಂಡಿಮಠ, ಮಜೀದ್ ಮುಲ್ಲಾ, ಲಕ್ಷ್ಮೀ ಬೊಮ್ಮಲಾಪುರ ಸೇರಿದಂತೆ ಇತರರಿದ್ದರು.