ಪರಿಹಾರಕ್ಕೆ ಆಗ್ರಹ, ನೀರಾವರಿ ಕಚೇರಿ ಮುತ್ತಿಗೆ ಯತ್ನ

ಹೂವಿನಹಡಗಲಿ: ಇಲ್ಲಿನ ಸಿಂಗಟಾಲೂರು ಏತ ನೀರಾವರಿ ಯೋಜನೆಯ ವಿಶೇಷ ಭೂ ಸ್ವಾಧೀನಾಧಿಕಾರಿ ಕಚೇರಿ ಎದುರು ರೈತರು ಪರಿಹಾರಕ್ಕೆ ಒತ್ತಾಯಿಸಿ ಪ್ರತಿಭಟನೆ ಮಾಡಿದರು.

ಈ ವೇಳೆ ಮಾತನಾಡಿದ ಮುಂಡವಾಡದ ಎಂ.ಎಸ್‌. ಪಾಟೀಲ್‌, ನಮ್‌ ಜಮೀನು ನಿಮಗ ಕೊಟ್ಟು ಪರಿಹಾರಕ್ಕಾಗಿ ಕಚೇರಿಗೆ ಅಲೆದಾಡಲು ಇನ್ನೊಂದು ಭೂಮಿ ಮಾರಾಟ ಮಾಡ ಪರಿಸ್ಥಿತಿ ಬಂದೈತಿ, ರೈತರ ಕೆಲಸ ಮಾಡಿರೇನು ಬಿಟ್ಟರೇನು, ತಿಂಗಳ ಪಗಾರ ಬಂದು ನಿಮ್‌ ಖಾತೆಗೆ ಬಂದು ಬೀಳುತ್ತೈತಿ, ನಮಗ್ಯಾರು ಪಗಾರ ಕೊಡತಾರ? ನಾವು ಇಲ್ಲಿ ಪ್ರತಿಭಟನೆ ಮಾಡಕ ಬಂದಿರೋದು, ನಿಮ್ಮಿಂದ ಹಿಂಬರಹ ಪಡೆದು ಹಿಂದಕ್ಕೆ ಹೋಗಲಿಕ್ಕ ಬಂದಿಲ್ಲ. ನಮ್‌ ಜಮೀನು ಕೊಡ್ರಿ ಇಲ್ಲ ಪರಿಹಾರ ಕೊಡ್ರಿ, ನೀವು ರೈತರನ್ನು ಕಾಲ ಕಸ ಮಾಡಿದ್ದೀರಿ, ಎಷ್ಟು ಅಂತಾ ಅಲೆದಾಡೋದು? ಹುಡುಗಾಟ ಹಚ್ಚೀರಾ? ಎಂದು ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.

ಸಂಗನಗೌಡ ಪಾಟೀಲ್‌ ಮಾತನಾಡಿ, ಯೋಜನೆಯ ಕಾಲುವೆಗಾಗಿ ಮುಂಡವಾಡ, ಹಮ್ಮಿಗಿ ಮತ್ತು ಕೇರಳಿ ತಾಂಡಾದ 67 ಎಕ್ರೆ ಜಮೀನು ಭೂ ಸ್ವಾಧೀನವಾಗಿದೆ. ರೈತರಿಗೆ ಪರಿಹಾರ ವಿತರಣೆಯಲ್ಲಿ ಅಧಿಕಾರಿಗಳು ತಾರತಮ್ಯ ಮಾಡಿದ್ದಾರೆ. ಇನ್ನು 33 ಎಕರೆ ಪರಿಹಾರದ ಹಣ ಬಂದಿಲ್ಲ. ನಮ್ಮ ಭೂಮಿ ಪಡೆದು ಮಾಡಿರುವ ಕಾಲುವೆಗಳಲ್ಲಿ ನೀರು ಹರಿಯುತ್ತಿಲ್ಲ. ಇದರಿಂದ ನೀರಾವರಿ ಸೌಲಭ್ಯ ರೈತರಿಗೆ ಮರೀಚಿಕೆಯಾಗಿದೆ. ಕಳಪೆ ಕಾಮಗಾರಿ ಮಾಡಿರುವ ಗುತ್ತಿಗೆದಾರರ ವಿರುದ್ಧ ಕ್ರಮವಿಲ್ಲ, ಕಾಲುವೆ ತುಂಬೆಲ್ಲಾ ಗಿಡ-ಗಂಟಿಗಳು ಬೆಳೆದು ಹಾಳಾಗಿವೆ. ಪರಿಹಾರ ನೀಡುವ ಜತೆಗೆ ಕಾಲುವೆಗಳನ್ನು ನಿರ್ವಹಣೆ ಮಾಡಿ ರೈತರ ಜಮೀನುಗಳಿಗೆ ನೀರು ಒದಗಿಸಬೇಕು ಎಂದು ಒತ್ತಾಯಿಸಿದರು.

ರೈತರ ಸಮಸ್ಯೆ ಆಲಿಸಿದ ಮುಂಡರಗಿ ತಾಲೂಕಿನ ಸಿಂಗಟಾಲೂರು ಏತ ನೀರಾವರಿ ಯೋಜನೆಯ ಎಇಇ ರಮೇಶ ಹಾಗೂ ವಿಶೇಷ ಭೂಸ್ವಾಧೀನಾಧಿಕಾರಿ ಕಚೇರಿಯ ಬಾಷಾ ಸಾಹೇಬ್‌ ಮಾತನಾಡಿ, ಮುಂಡವಾಡ ಶಾಖಾ ಕಾಲುವೆ ನಿರ್ಮಾಣಕ್ಕಾಗಿ 33 ಎಕರೆ ಜಮೀನಿನ ಪರಿಹಾರ ಮಾತ್ರ ಬಾಕಿ ಇದೆ. ಈಗಾಗಲೇ ಅಂತಿಮ ಅಧಿಸೂಚನೆಗಾಗಿ ಬೆಂಗಳೂರು ಕಚೇರಿಗೆ ಕಡತಗಳನ್ನು ಸಲ್ಲಿಸಲಾಗಿದೆ. ಮುಂದಿನ 2 ತಿಂಗಳೊಳಗೆ ರೈತರ ಪರಿಹಾರ ವಿತರಿಸುತ್ತೇವೆ ಎಂದು ಭರವಸೆ ನೀಡಿದ ಬಳಿಕ ಪ್ರತಿಭಟನಾಕಾರರು ಹಿಂದೆ ಸರಿದರು.