ಅನಧಿಕೃತ ಬಾರ್‌, ರೆಸ್ಟೋರೆಂಟ್‌ ಸ್ಥಗಿತಕ್ಕೆ ಆಗ್ರಹ

ಯಲ್ಲಾಪುರ: ಪಪಂ ವ್ಯಾಪ್ತಿಯ ರಾಷ್ಟ್ರೀಯ ಹೆದ್ದಾರಿ ೬೩ರ ಪಕ್ಕದ ಗಾಂಧಿ ಚೌಕದ ಸಮೀಪ ಸ.ನಂ. ೪೭೭ ೧ಅ ಜಿ.ಆರ್. ೨ಗೆ ಸುಳ್ಳು ದಾಖಲೆ ನೀಡಿದ್ದನ್ನು ಆಧರಿಸಿ ನಮೂನೆ ೩ನ್ನು ರದ್ದುಪಡಿಸಿ, ಅನಧಿಕೃತವಾಗಿ ನಡೆಯುತ್ತಿರುವ ಸೆವೆನ್(೭) ಬಾರ್ ಮತ್ತು ರೆಸ್ಟೊರೆಂಟ್‌ಅನ್ನು ಸ್ಥಗಿತಗೊಳಿಸಬೇಕು ಎಂದು ಸಾರ್ವಜನಿಕ ಸೇವಾ ಕೇಂದ್ರದ ಮುಖ್ಯಸ್ಥ ಎಂ.ಜಿ. ಭಟ್ಟ ಆಗ್ರಹಿಸಿದರು.

ಪಪಂ ವ್ಯಾಪ್ತಿ ಇರುವುದರಿಂದ ಪಹಣಿ ಪತ್ರಿಕೆ ಇಲ್ಲದ ಸ.ನಂ. ೪೭೭ ೧ಅ ಜಿ.ಆರ್.೨ಗೆ ನಮೂನೆ ೩ ನೀಡಲಾಗಿದೆ. ಈ ದಾಖಲೆಯನ್ನೇ ಆಧರಿಸಿ ಕಟ್ಟಡ ನವೀಕರಿಸಿ, ಬಾರ್ ಮತ್ತು ರೆಸ್ಟೋರೆಂಟ್‌ಗೆ ಅನುಮತಿ ಪಡೆದು ನಡೆಸಲಾಗುತ್ತಿದೆ. ಪಹಣಿ ಪತ್ರಿಕೆಯೇ ಇಲ್ಲದ ಜಾಗಕ್ಕೆ ನಮೂನೆ ೩ ನೀಡಿರುವ ಕುರಿತು ಮಾಹಿತಿ ಹಕ್ಕಿನಲ್ಲಿ ಕೇಳಿದಾಗ, ಮುಖ್ಯಾಧಿಕಾರಿಗಳು ಇದಕ್ಕೆ ಪಹಣಿ, ಮ್ಯುಟೇಶನ್ ಎಂಟ್ರಿ, ಹಾತ್ ನಕಾಶೆ ನೀಡಿಲ್ಲ ಎಂದು ಹಿಂಬರಹ ನೀಡಿದರೂ ನಮೂನೆ ೩ನ್ನು ಮಾತ್ರ ರದ್ದುಪಡಿಸಿಲ್ಲ ಎಂದರು.

ಕಂದಾಯ ಇಲಾಖೆಯ ಅಧಿಕಾರಿಗಳು ಸುಳ್ಳು ದಾಖಲೆಗೆ ಅನುಮತಿ ನೀಡಿದ್ದಾರೆ. ಪಹಣಿ ಇಲ್ಲದ ಸ್ಥಳಕ್ಕೆ ವಾಣಿಜ್ಯ ಉದ್ದೇಶದ ಕಟ್ಟಡ ನಿರ್ಮಾಣಕ್ಕೆ ಪಟ್ಟಣ ಪಂಚಾಯಿತಿಯವರು ಅನುಮತಿ ನೀಡಿದ್ದಾರೆ ಎಂದು ದೂರಿದರು. ಈ ಕುರಿತು ಕ್ರಮ ಕೈಗೊಳ್ಳುವಂತೆ ಕಾರವಾರದ ಯೋಜನಾ ನಿರ್ದೇಶಕರಿಗೆ ದೂರಿದ್ದು, ಅವರು ಜಿಲ್ಲಾಧಿಕಾರಿಗಳಿಂದ ಸೂಚನೆ ಬಂದರೂ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದರು.