ಶಿರಸಿಯಲ್ಲಿ ನಿರ್ವಹಣೆಯಿಲ್ಲದೇ ಅವಸಾನ ಕಂಡ ಮಾರ್ಗಸೂಚಕ ಫಲಕಗಳು

ಪ್ರವೀಣ ಹೆಗಡೆ ಕರ್ಜಗಿಶಿರಸಿ: ನಗರ ವ್ಯಾಪ್ತಿಯಲ್ಲಿ ನಗರಸಭೆಯಿಂದ ಲಕ್ಷಾಂತರ ರು. ವೆಚ್ಚ ಮಾಡಿ ಅಳವಡಿಸಲಾದ ಮಾರ್ಗಸೂಚಕ ಮತ್ತು ಸ್ಥಳದ ಹೆಸರಿರುವ ನಾಮಫಲಕಗಳು ನಿರ್ವಹಣೆಯಿಲ್ಲದೇ ಹಾಳಾಗುತ್ತಿದ್ದು, ಕೆಲ ವಾರ್ಡ್‌ಗಳಲ್ಲಿರುವ ನಾಮಫಲಕಗಳು ಉದುರಿಬಿದ್ದರೂ ಸರಿಪಡಿಸಲು ನಗರಸಭೆ ಮುಂದಾಗುತ್ತಿಲ್ಲ ಎಂದು ಸಾರ್ವಜನಿಕರು ದೂರುತ್ತಿದ್ದಾರೆ.

ಕೆಲವೆಡೆ ನಾಮಫಲಕಗಳೇ ಮಾಯವಾದರೆ, ಇನ್ನೂ ಕೆಲವೆಡೆ ಪಾಚಿ ಹಿಡಿದು ಸಂಪೂರ್ಣ ಹೆಸರು ಮಸುಕಾಗಿವೆ. ರಸ್ತೆ, ಕಾಲುವೆ, ಪೈಪ್‌ಲೈನ್ ಮತ್ತಿತರ ಕಾಮಗಾರಿ ನಡೆದ ವೇಳೆ ನಾಮಫಲಕಗಳಿಗೆ ಹಾನಿಯಾಗಿ ಕೆಳಕ್ಕುರುಳಿವೆ. ಇದಕ್ಕೆಲ್ಲ ಸರಿಯಾದ ನಿರ್ವಹಣೆ ಇಲ್ಲದಿರುವುದು ಪ್ರಮುಖ ಕಾರಣವಾಗಿದೆ. ಜನರು ನೀಡಿದ ತೆರಿಗೆ ಹಣವನ್ನು ಬಳಸಿಕೊಂಡು ಈ ನಾಮಫಲಕ ಹಾಕಲಾಗಿತ್ತು. ಕೆಲ ವಾರ್ಡ್‌ಗಳಲ್ಲಿ ಸರಿಯಿದ್ದು, ಹಲವೆಡೆ ಪ್ರಯೋಜನಕ್ಕೆ ಬರದಂತಾಗಿದೆ.

ಆರಂಭದ ವರ್ಷಗಳಲ್ಲಿ ಇದರಿಂದ ಜನರಿಗೆ ಸಾಕಷ್ಟು ಅನುಕೂಲವಾಗಿತ್ತು. ಆದರೆ ಇತ್ತೀಚೆಗೆ ನಾಮಫಲಕಗಳಿದ್ದರೂ ಅದರಲ್ಲಿನ ಹೆಸರು ಕಾಣದ ಸ್ಥಿತಿಯಿದೆ. ಹಲವೆಡೆ ಬಿದ್ದು ಹೋಗಿವೆ. ಇವುಗಳನ್ನು ನಿರ್ವಹಿಸಬೇಕಾದ ಅಧಿಕಾರಿಗಳು ಇದರ ಬಗ್ಗೆ ಕ್ರಮವಹಿಸುತ್ತಿಲ್ಲ ಎನ್ನುತ್ತಾರೆ ನಗರಸಭೆ ಸದಸ್ಯರು.ನಿರ್ವಹಣೆಗೂ ನೀಡಲಿ ಅನುದಾನ

ಶೀಘ್ರ ಆರಂಭ: ನಗರ ವ್ಯಾಪ್ತಿಯಲ್ಲಿ ಕುಡಿಯುವ ನೀರಿನ ಪೈಪ್ ಜೋಡಣೆ ಕಾರ್ಯ ನಡೆಯುತ್ತಿದ್ದು, ಅದು ಮುಗಿದ ವಾರ್ಡ್‌ಗಳ ನಾಮಫಲಕಗಳನ್ನು ಸ್ವಚ್ಛಗೊಳಿಸುವ ಕೆಲಸ ಶೀಘ್ರ ಆರಂಭಿಸಲಾಗುತ್ತದೆ ಎಂದು ಶಿರಸಿ ನಗರಸಭೆ ಪೌರಾಯುಕ್ತ ಕಾಂತರಾಜು ತಿಳಿಸಿದರು.