ದೇವರ ಭಕ್ತಿ ಶ್ರೇಷ್ಠವಾದ ಧರ್ಮ: ಸ್ವರ್ಣವಲ್ಲೀ ಶ್ರೀ

ಶಿರಸಿ: ಜೀವನದಲ್ಲಿ ದೇವರ ಭಕ್ತಿ ಮುಖ್ಯವಾದ ಧರ್ಮ. ಧರ್ಮಕ್ಕೆ ಅನೇಕ ವಿವರಗಳು ಇದ್ದಾವೆ. ಅದರಲ್ಲಿ ದೇವರ ಭಕ್ತಿ ಶ್ರೇಷ್ಠವಾದ್ದು ಎಂದು ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನದ ಮಠಾಧೀಶ ಗಂಗಾಧರೇಂದ್ರ ಸರಸ್ವತೀ ಶ್ರೀ ನುಡಿದರು.ಅವರು ಚಾತುರ್ಮಾಸ ವ್ರತಾಚರಣೆಯಲ್ಲಿ ಶ್ರದ್ಧೆಯಿಂದ ಸೇವೆ ಮಾಡುತ್ತಿರುವ ಭಂಡಾರಿ ಸಮಾಜದ ಶಿಷ್ಯರ ಸೇವೆ ಸ್ವೀಕರಿಸಿ ಆಶೀರ್ವಚನ ನುಡಿದರು.

ಮಹಾಭಾರತದಲ್ಲಿ ಭೀಷ್ಮಾಚಾರ್ಯರು ಯುಧಿಷ್ಠಿರನಿಗೆ ಹೇಳುವ ಒಂದು ಭಗವಂತನನ್ನು ನಾಮಸ್ಮರಣೆಗಳ, ಸ್ತೋತ್ರಗಳ ಮೂಲಕ ಯಾರು ನಿತ್ಯವೂ ಭಜಿಸುತ್ತಾನೆಯೋ ಅದೇ ಶ್ರೇಷ್ಠವಾದ ಧರ್ಮ. ಭಗವಂತನನ್ನು ಸ್ತುತಿಯ ಮೂಲಕ ಭಕ್ತಿ ಮಾಡುವುದೇ ಅತ್ಯಂತ ಶ್ರೇಷ್ಠವಾದ ಧರ್ಮ ಎಂಬ ಮಾತು ಮಹಾಭಾರತದಲ್ಲಿ ಬಂದಿದೆ ಎಂದರು.

ಮನಸ್ಸಿನಲ್ಲಿ ಭಗವಂತನ ಮೇಲೆ ಹಾರ್ದಿಕವಾದ ಪ್ರೀತಿ ಬರುವಂತೆ ಇಂತಹ ಭಜನೆಗಳು ಮಾಡುತ್ತವೆ. ದೇವರ ಮೇಲೆ ಈ ರೀತಿಯಾದ ಭಕ್ತಿ, ಪ್ರೀತಿಗಳು ಬರುವ ಹಾಗೆ ಸಂಗೀತಗಳು ಮಾಡುತ್ತವೆ. ಸಂಗೀತದ ಅನೇಕ ರಾಗಗಳಿಗೆ ಈ ರೀತಿಯಾದ ಸಾಮರ್ಥ್ಯವಿದೆ. ಅಂತಹ ಸಂಗೀತದ ಸೇವೆಯನ್ನು ಅನೇಕ ವರ್ಷಗಳಿಂದ ಮಾಡಿಕೊಂಡು ಬರುತ್ತಿರುವ ಭಂಡಾರಿ ಸಮಾಜದ ಸಮಸ್ತ ಭಕ್ತರನ್ನು ಉದ್ದೇಶಿಸಿ ಆಶೀರ್ವದಿಸಿದರು.

ಮುಂದಿನ ಪೀಳಿಗೆಯು ಇದನ್ನು ಕಲಿಯುವುದರಲ್ಲಿ ಮುಂದೆ ಬರಬೇಕು. ಈ ಮನೆತನದ ಒಳ್ಳೆಯ ಕಸುಬನ್ನು ಬಿಡಬಾರದು. ಈ ಪಂಚವಾದ್ಯದ ಸೇವೆಯನ್ನು ಭಂಡಾರಿ ಸಮಾಜದವರು ನಡೆಸಿಕೊಂಡು ಬಂದಿರುವುದು ನಮಗೆ ಸಂತೋಷವನ್ನು ಉಂಟುಮಾಡಿದೆ ಎಂದೂ ಹೇಳಿದರು‌.

ಸಂಗೀತದ ರಾಗಗಳಿಗೆ ಭಕ್ತಿಯನ್ನು ಹೆಚ್ಚಿಸುವ ಸಾಮರ್ಥ್ಯ ಇದೆ. ತಲೆ ತಲಾಂತರಗಳಿಂದ ಮಠದಲ್ಲಿ ಸಂಗೀತದ ವಾದ್ಯಗಳ ಸೇವೆಯನ್ನು ಮಾಡುತ್ತಾ ಬಂದವರು ಭಂಡಾರಿ ಸಮಾಜದವರು. ಪಂಚ ವಾದ್ಯಗಳ ಸಂಪ್ರದಾಯ ಕಡಿಮೆಯಾಗಿದೆ. ಇದನ್ನು ಬೆಳಸಬೇಕು.

ಸ್ವರ್ಣವಲ್ಲೀ ಶ್ರೀ