ನಿವೇಶನ ರಹಿತರಿಂದ ತಹಸೀಲ್ದಾರ ಕಚೇರಿ ಎದುರು ಧರಣಿ

ನಿವೇಶನ ಮತ್ತು ಮನೆ ನೀಡಲು ಒತ್ತಾಯ । ಜಿಲ್ಲಾಧಿಕಾರಿಗೆ ಮನವಿ

ಜಿಲ್ಲೆಯ ಬಡವರಿಗೆ ನಿವೇಶನ ಮತ್ತು ಮನೆಗಳನ್ನು ನೀಡಲು ಒತ್ತಾಯಿಸಿ ತಹಸೀಲ್ದಾರ್‌ ಕಚೇರಿ ಮುಂದೆ ಸೋಮವಾರ ನಿವೇಶನ ಮತ್ತು ವಸತಿ ರಹಿತರ ಹೋರಾಟ ಸಮಿತಿ ನೇತೃತ್ವದಲ್ಲಿ ಧರಣಿ ನಡೆಸಿ, ಮನವಿ ಸಲ್ಲಿಸಲಾಯಿತು.

ರಾಜೀವ್ ಗಾಂಧಿ ವಸತಿ ನಿಗಮದ ವೆಬ್‌ಸೈಟ್ ಲಾಕ್ ಆಗಿದೆ ಎಂದು ಸಂಬಂಧಪಟ್ಟ ಸ್ಥಳೀಯ ಸಂಸ್ಥೆಗಳ ಅಧಿಕಾರಿಗಳು ಮಾಹಿತಿ ನೀಡುತ್ತಿದ್ದಾರೆ. ಆದ್ದರಿಂದ ತಾವು ಈ ಕೂಡಲೇ ರಾಜೀವ್ ಗಾಂಧಿ ವಸತಿ ನಿಗಮದ ವ್ಯವಸ್ಥಾಪಕ ನಿರ್ದೇಶಕರಿಗೆ ಜಿಲ್ಲೆಯಲ್ಲಿ ನಿವೇಶನ ಮತ್ತು ವಸತಿ ರಹಿತರಿಗೆ ಅರ್ಜಿ ಸಲ್ಲಿಸಲು ಅನುಕೂಲ ವಾಗುವಂತೆ ವೆಬ್‌ಸೈಟ್ ಲಾಕ್ ಅನ್ನು ತೆಗೆದು ಅರ್ಜಿ ಸ್ವೀಕರಿಸಲು ಕ್ರಮ ಕೈಗೊಳ್ಳಬೇಕು. ಜಿಲ್ಲೆಯಲ್ಲಿ ಒಟ್ಟು 73,967 ಕುಟುಂಬಗಳು ವಸತಿ ಹೀನವಾಗಿವೆ ಎಂಬ ಅಂಕಿ-ಅಂಶಗಳು ರಾಜೀವ್ ಗಾಂಧಿ ವಸತಿ ನಿಗಮದ ನಿವೇಶನ ಮತ್ತು ವಸತಿ ರಹಿತರ ಸಮೀಕ್ಷಾ ವರದಿಯಿಂದ ಕಂಡುಬಂದಿದೆ. ಆದ್ದರಿಂದ ಕೂಡಲೇ ನಿವೇಶನ ನೀಡುವಂತೆ ಆಗ್ರಹಿಸಿದರು.

ನಿವೇಶನ ಮತ್ತು ವಸತಿ ರಹಿತರ ಹೋರಾಟ ಸಮಿತಿಯ ತಾಲೂಕಾ ಅಧ್ಯಕ್ಷ ಎಸ್.ಎ. ಗಫಾರ್, ತಾಲೂಕಾ ಉಪಾಧ್ಯಕ್ಷ ನೂರಸಾಬ ಹೊಸಮನಿ, ತಾಲೂಕಾ ಕಾರ್ಯದರ್ಶಿ ತುಕಾರಾಮ್ ಬಿ. ಪಾತ್ರೋಟಿ, ಭಾರತ ಕಮ್ಯುನಿಸ್ಟ್ ಪಕ್ಷದ ಜಿಲ್ಲಾ ಉಸ್ತುವಾರಿ ಡಾ. ಕೆ.ಎಸ್. ಜನಾರ್ದನ, ಹಿರಿಯ ಮುಖಂಡರಾದ ಜಾಫರ್ ಕುರಿ, ರಾಜಪ್ಪ ಚವ್ಹಾಣ್, ಬೆಟದಯ್ಯ ಹಾದಿಮನಿ, ಶೋಭಾ ವಡ್ಡರ, ಮಲ್ಲಿಕಾರ್ಜುನ್ ಕಾಸನಕಂಡಿ, ಮಂಜುನಾಥ್ ವಡ್ಡರ, ರೇಷ್ಮಾ ಭಾವಿಮನಿ, ಗೀತಾ ಇಂಗಳಗಿ, ರೇಣುಕಾ ನವನಗರ, ಹನುಮಂತ ವಡ್ಡರ, ಜಗದೀಶ್ ಕಟ್ಟಿಮನಿ ಮುಂತಾದವರಿದ್ದರು.