ಸಂಸ್ಕಾರ, ಸಂಸ್ಕೃತಿ, ಸಂಬಂಧ ಕಣ್ಮರೆ

ದಾಂಡೇಲಿ: ನೆರೆ ಹೊರೆಯವರನ್ನು ಪ್ರೀತಿಸುವುದನ್ನು ನಾವು ನಮ್ಮ ಮಕ್ಕಳಿಗೆ ಕಲಿಸುತ್ತಿಲ್ಲ. ಪರಸ್ಪರ ಸಂಬಂಧಗಳನ್ನು ಬೆಸೆಯುವ ಕೆಲಸ ಮಾಡುತ್ತಿಲ್ಲ. ಮನುಷ್ಯ ಸಂಬಂಧಗಳಿಗೆ ಕೈಯಾರೇ ನಾವೇ ಕದವಿಟ್ಟುಕೊಂಡಿದ್ದೇವೆ. ಪರಿಣಾಮ ಸಂಸ್ಕಾರ, ಸಂಸ್ಕೃತಿ, ಸಂಬಂಧ ಮಾಯವಾಗುತ್ತಿವೆ ಎಂದು ಸಾಹಿತಿ ಡಾ.ಪ್ರಜ್ಞಾ ಮತ್ತಿಹಳ್ಳಿ ನುಡಿದರು.ಅವರು ದಾಂಡೇಲಿ ತಾಲೂಕು ಸಮೀಪದ ಆಲೂರ ಗ್ರಾಮದಲ್ಲಿ ಹಮ್ಮಿಕೊಂಡಿದ್ದ ಕನ್ನಡ ಸಾಹಿತ್ಯ ಸಮ್ಮೇಳನವನ್ನು ಸಸಿಗೆ ನೀರು ಹಾಕಿ, ಡೊಳ್ಳು ಬಾರಿಸುವ ಮೂಲಕ ಉದ್ಘಾಟಿಸಿ ಮಾತನಾಡಿದರು.

ಸಮ್ಮೇಳನಾಧ್ಯಕ್ಷ ಯು.ಎಸ್. ಪಾಟೀಲ ಮಾತನಾಡಿ, ಮನುಷ್ಯನಿಗೆ ಬಾಹ್ಯ ಸೌಂದರ್ಯಕ್ಕಿಂತ ಅಂತರಂಗದ ಸೌಂದರ್ಯವೇ ಮುಖ್ಯ. ಜೀವನದಲ್ಲಿ ನಾವು ಏನು ಸತ್ಕಾರ್ಯಗಳ ಬಗ್ಗೆ ಜನರು ಆಡಿಕೊಳ್ಳುವ ಹಾಗೆ ಒಳ್ಳೆಯ ಕೆಲಸಗಳನ್ನು ಮಾಡಬೇಕು. ಗ್ರಾಮೀಣ ಭಾಗದ ರಸ್ತೆ ಹಾಗೂ ಇತರ ಸೌಕರ್ಯಗಳಿಗೆ ಹೆಚ್ಚಿನ ಆದ್ಯತೆ ನೀಬೇಕು. ಕೆಲಸ ನೀಡುವ ಉದ್ಯಮಗಳನ್ನು ಪುನರಾರಂಭಿಸಬೇಕು ಎಂದು ಒತ್ತಾಯಿಸಿದರು.

ತಹಶೀಲ್ದಾರ ಶೈಲೇಶ ಪರಮಾನಂದ, ಪೌರಾಯುಕ್ತ ವಿವೇಕ ಬನ್ನೆ, ತಾಪಂ ಮಾಜಿ ಸದಸ್ಯ ಗಿರೀಶ ಠೋಸೂರ, ಸಾಹಿತಿ ದುಂಡಪ್ಪ ಗೂಳೂರು, ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷ ಸುರೇಶ ನಾಯಕ, ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ಅಧ್ಯಕ್ಷ ಸತೀಶ ನಾಯಕ ಬಾವಿಕೇರಿ, ಗ್ರಾಪಂ ಉಪಾಧ್ಯಕ್ಷೆ ನಾಗರತ್ನಾ ನಾಯ್ಕ ಇದ್ದರು.

ಕಾರ್ಯಕ್ರಮದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಸಾಧಕರಾದ ಡಾ.ಶೇಖರ ಹಂಚಿನಾಳಮಠ, ಸುರೇಶ ನಾಯಕ, ಸೀಮಾಕಿಣಿ, ಜಾನು ಸಗ್ಗು ಪಾವಣೆ, ಹನುಮಂತ ಕಾರ್ಗಿ, ಶಿವರಾಜ ಗೋಣಿ, ದೀಪಾಲಿ ಸಾಮಂತ, ಮಹಾಂತೇಶ ಅಂದಾಕರ, ಅರ್ಜುನ ಕಾಂಬ್ರೇಕರ, ಭರಮಣ್ಣಾ ಹನುಮಂತ ಕದಂ, ಪ್ರಕಾಶ ಪಿಶಾಳೆ ಮತ್ತು ರಾಮಪ್ಪ ಎಚ್ ಸಿದ್ದರ ಅವರನ್ನು ಗೌರವಪೂರ್ವಕವಾಗಿ ಸನ್ಮಾನಿಸಲಾಯಿತು.