ಕಬ್ಬು ಬಾಕಿ ಬಿಲ್‌ ಪಾವತಿಸುವಲ್ಲಿ ತಾರತಮ್ಯ, ಕ್ರಮ ಕೈಗೊಳ್ಳಲು ರೈತರಿಂದ ಜಿಲ್ಲಾಧಿಕಾರಿಗೆ ಮನವಿ

ಹಾವೇರಿ: ಮೈಲಾರ ಶುಗರ್ಸ್ ಲಿಮಿಟೆಡ್ ಸಕ್ಕರೆ ಕಾರ್ಖಾನೆಯವರು 2024- 25ನೇ ಸಾಲಿನಲ್ಲಿ ರೈತರಿಗೆ ಬಾಕಿ ಬಿಲ್ ಪಾವತಿಸುವುದರಲ್ಲಿ ವ್ಯತ್ಯಾಸ ಹಾಗೂ ಕಬ್ಬಿನ ವೇಸ್ಟೇಜ್ ಕಟಿಂಗ್‌ನಲ್ಲಿ ರೈತರಿಗೆ ಮೋಸ ಮಾಡಿದ್ದು, ರೈತರಿಗೆ ನ್ಯಾಯ ಒದಗಿಸಿಕೊಡಬೇಕು ಎಂದು ಒತ್ತಾಯಿಸಿ ಹೊಸರಿತ್ತಿ ಭಾಗದ ಕಬ್ಬು ಬೆಳೆಗಾರರು ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದರು.ತಾಲೂಕಿನ ಸುತ್ತಮುತ್ತಲಿನ ಕಬ್ಬು ಬೆಳೆಯುವ ಹೊಸರಿತ್ತಿ, ಕೊರಡೂರು ಚನ್ನೂರು, ಮಣ್ಣೂರು, ಕೆಸರಹಳ್ಳಿ, ಕಿತ್ತೂರು ಗ್ರಾಮ ಸೇರಿದಂತೆ ಈ ಭಾಗದಲ್ಲಿ ಬೆಳೆದ ಕಬ್ಬು ಹೆಚ್ಚಿನ ಪಾಲು ಮೈಲಾರ ಶುಗರ್ಸ್ ಕಾರ್ಖಾನೆಗೆ ಪೂರೈಸಲಾಗಿದೆ.

ಮಿಷನ್ ಕಟಿಂಗ್‌ಗೆ ಯಾವುದೇ ಕಬ್ಬು ವೆಸ್ಟೆಜ್ ಕಟಿಂಗ್ ಮಾಡಬಾರದು ಎಂದು ಸರ್ಕಾರದ ಆದೇಶವಿದ್ದರೂ ಶೇ. 8ರಷ್ಟು ನೇಸ್ಟೇಜ್ ಮುರಿದು ರೈತರಿಗೆ ಮೋಸ ಮಾಡುತ್ತಿದ್ದಾರೆ. ರಾಜ್ಯದ ಇನ್ನುಳಿದ ಫ್ಯಾಕ್ಟರಿಗಳಲ್ಲಿ ಶೇ. 4ರಷ್ಟು ವೇಸ್ಟೇಜ್ ಮುರಿಯುತ್ತಿದ್ದಾರೆ. ಅದು ಲೇಬರ್ ಕಟಿಂಗ್‌ಗೆ ಮಾತ್ರ.

ಕಾರ್ಖಾನೆಯವರು ಆರ್ಥಿಕ ಇಲಾಖೆಗೆ, ಸರ್ಕಾರದ ಬೊಕ್ಕಸಕ್ಕೆ ಮೋಸಗೊಳಿಸುವ ಜತೆಗೆ ರೈತರಿಗೂ ಮೋಸ ಮಾಡುತ್ತಿದ್ದಾರೆ. ಉಳಿದ ಫ್ಯಾಕ್ಟರಿಯವರು ಡಿ. 1ರಿಂದ ಹೆಚ್ಚುವರಿ ₹100 ಪಾವತಿ ಮಾಡಿ ಸುಮಾರು ಎರಡರಿಂದ ಮೂರು ತಿಂಗಳಾಗಿವೆ. ನಮ್ಮ ಭಾಗದಲ್ಲಿ ಏಳು ತಿಂಗಳ ನಂತರ ₹100 ಪಾವತಿ ಮಾಡಲು ಬಂದು ಕೆಲವು ರೈತರಿಗೆ ಕೊಟ್ಟು ಮೋಸ ಮಾಡುತ್ತಿದ್ದಾರೆ. ಕೂಡಲೇ ಸೂಕ್ತ ಕ್ರಮ ಕೈಗೊಂಡು ರೈತರಿಗೆ ಆಗುತ್ತಿರುವ ಅನ್ಯಾಯ ಸರಿಪಡಿಸಬೇಕು ಎಂದು ಒತ್ತಾಯಸಿ ಮನವಿ ಸಲ್ಲಿಸಲಾಯಿತು.ಈ ವೇಳೆ ಸಿದ್ದರಾಜ ಕಲಕೋಟಿ, ಪ್ರಭು ಗೌರಿಮನಿ, ಸಿದ್ದಲಿಂಗಪ್ಪ ಕಲಕೋಟಿ, ವಿರುಪಾಕ್ಷಪ್ಪ ಕಲಕೋಟಿ, ಮಂಜುನಾಥ ಗಾಣಗೇರ, ನಿಂಗಪ್ಪ ಕಂಟೆಣ್ಣನವರ, ವೆಂಕಟೇಶ ಆವಿನ್, ಮೌನೇಶ ಕಮ್ಮಾರ, ಶಿವಕುಮಾರ ತೊರಗಲ್ಲ, ಎಂ.ಎಂ. ಅಂಗಡಿ, ಸಿದ್ದಲಿಂಗಪ್ಪ ಗೌರಿಮನಿ, ಸುರೇಶ ಕಲ್ಲೆದೇವರ, ರವಿಕುಮಾರ ಸವಣೂರ ಇತರರು ಇದ್ದರು.