ಶೋಷಿತರ ಅಭಿವೃದ್ಧಿಗೆ ಟೂಲ್ ಕಿಟ್ ವಿತರಣೆ: ನಗರಸಭೆ ಅಧ್ಯಕ್ಷ ಕೆ.ಶೇಷಾದ್ರಿ

ಕನ್ನಡಪ್ರಭ ವಾರ್ತೆ ರಾಮನಗರ

ನಗರಸಭೆ ಸಭಾಂಗಣದಲ್ಲಿ ಮಡಿವಾಳ ಸಮುದಾಯದವರಿಗೆ ಕಿಟ್ ಗಳನ್ನು ವಿತರಿಸುವುದಕ್ಕೂ ಮುನ್ನ ಮಾತನಾಡಿದ ಅವರು, ಬೀದಿ ಬದಿ ವ್ಯಾಪಾರಿಗಳಿಗೆ ಛತ್ರಿಗಳು, ಸವಿತಾ ಸಮಾಜದ ವೃತ್ತಿನಿರತರು, ಮಡಿವಾಳರು ಸೇರಿದಂತೆ ಎಲ್ಲ ಸಮುದಾಯಗಳ ವೃತ್ತಿ ನಿರತರಿಗೆ ಅವರ ವೃತ್ತಿಗೆ ಅನುಗುಣವಾಗಿ ಪರಿಕರಗಳ ಕಿಟ್ ಗಳನ್ನು ನಗರಸಭೆ ವತಿಯಿಂದ ವಿತರಣೆ ಮಾಡಿ ಆರ್ಥಿಕವಾಗಿ ಶಕ್ತಿ ತುಂಬುವ ಕೆಲಸ ಮಾಡುತ್ತಿದ್ದೇವೆ ಎಂದರು.

ಆಯವ್ಯಯ ಮಂಡಿಸಿದ ಮೂರು ತಿಂಗಳಿನಲ್ಲೇ ವೃತ್ತಿನಿರತರಿಗೆ ಕಿಟ್ಗಳನ್ನು ವಿತರಿಸಲಾರಂಭಿಸಿದ್ದೇವೆ. ಇದಕ್ಕೆ ನಗರಸಭಾ ಸದಸ್ಯರು ಹಾಗೂ ಅಧಿಕಾರಿಗಳ ಸಹಕಾರ ದೊರಕಿದೆ ಎಂದು ತಿಳಿಸಿದರು.

ಸಮಾಜದಲ್ಲಿನ ಶ್ರಮಿಕರಿಗೆ ಸ್ಪಂದಿಸಬೇಕು ಎಂಬುದು ಡಾ.ಬಿ.ಆರ್.ಅಂಬೇಡ್ಕರ್, ಬಸವಣ್ಣ ಮುಂತಾದ ದಾರ್ಶನಿಕರ ಹಿತೋಕ್ತಿಗಳು. ಇದಕ್ಕೆ ಅನುಗುಣವಾಗಿ ನಗರಸಭೆ ಮೂಲಕ ಈ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ. ಭವಿಷ್ಯದಲ್ಲಿಯೂ ಇಂತಹ ಕಾರ್ಯಕ್ರಮಗಳು ಮುಂದುವರೆಯಲಿವೆ ಎಂದು ತಿಳಿಸಿದರು.

ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ರವರ ಆಶಯ ಹಾಗೂ ಮಾಜಿ ಸಂಸದ ಡಿ.ಕೆ.ಸುರೇಶ್ ರವರ ಕಾಳಜಿಯಿಂದಾಗಿ ರಾಮನಗರದಲ್ಲಿ ವಿದ್ಯುತ್ ಚಿತಾಗಾರ ಕಟ್ಟಡ ನಿರ್ಮಾಣಗೊಂಡಿದೆ. ಪರಿಸರ ಉಳಿಸುವುದು ಅವರ ಉದ್ದೇಶ. ಚಿತಾಗಾರಕ್ಕೆ ಅಗತ್ಯವಿರುವ ಎಲ್ಲ ಸಿದ್ದತೆಗಳನ್ನು ಮಾಡಿಕೊಳ್ಳಲಾಗುತ್ತಿದೆ. ಇನ್ನು ಕೆಲವೇ ದಿನಗಳಲ್ಲಿ ಇದು ನಾಗರೀಕರ ಸೇವೆಗೆ ಲಭ್ಯವಾಗಲಿದೆ ಎಂದು ಕೆ.ಶೇಷಾದ್ರಿ ಹೇಳಿದರು.