ಶೇಂಗಾ ಬೆಳೆಗೆ ಹನಿ ನೀರಾವರಿ ಪದ್ಧತಿ ಅಳವಡಿಕೆ

ಪಾಲಾಕ್ಷ ಬಿ.ತಿಪ್ಪಳ್ಳಿ ಯಲಬುರ್ಗಾ

ಯಲಬುರ್ಗಾ ಹಾಗೂ ಕುಕನೂರು ತಾಲೂಕಿನಲ್ಲಿ ಈ ಬಾರಿ ಶೇಂಗಾ ಹೆಚ್ಚು ಬಿತ್ತನೆಗೊಂಡಿದೆ. ಯಲಬುರ್ಗಾ ಹೋಬಳಿ-೨೬೫೦ ಹೆಕ್ಟೇರ್, ಹಿರೇವಂಕಲ ಕುಂಟಾ-೩೫೬೦ ಹೆಕ್ಟೇರ್, ಮಂಗಳೂರು-೧೭೫೦ ಹೆಕ್ಟೇರ್ ಸೇರಿ ಒಟ್ಟು ೭೮೬೦ ಹೆಕ್ಟೇರ್ ಪ್ರದೇಶದಲ್ಲಿ ಶೇಂಗಾ ಬಿತ್ತನೆಗೊಂಡಿದೆ. ಕಳೆದ ಬಾರಿಗಿಂತ ಈ ಸಲ ಶೇಂಗಾ ಬೆಳೆಗೆ ರೋಗ, ಕೀಟಬಾಧೆ ಕಡಿಮೆ ಇದೆ.

ಸ್ಪ್ರಿಂಕ್ಲರ್‌ಗೆ ಹೆಚ್ಚು ಬೇಡಿಕೆ: ತಾಲೂಕಿನಲ್ಲಿ ರೈತರು ನಾನಾ ಬೆಳೆಗೆ ಸರ್ಕಾರವು ಸಹಾಯಧನದ ಮೂಲಕ ಕೊಡುವ ಸ್ಪ್ರಿಂಕ್ಲರ್ (ಹನಿ ನೀರಾವರಿ ಪದ್ಧತಿ) ಘಟಕಕ್ಕೆ ರೈತರಿಂದ ಹೆಚ್ಚು ಬೇಡಿಕೆ ಇದೆ.

ಕ್ಷೇತ್ರದಲ್ಲಿ ಕೆರೆ ತುಂಬಿಸುವ ಯೋಜನೆಯಡಿ ಕೆರೆಗಳು ತುಂಬಿದ್ದು, ರೈತರ ಕೊಳವೆಬಾವಿ ನೀರು ಮರುಪೂರಣಗೊಂಡಿವೆ. ರೈತರು ಶೇಂಗಾ ಬೆಳೆಯಲು ಹೆಚ್ಚಾಗಿ ಹನಿ ನೀರಾವರಿ ಪದ್ಧತಿ ಅಳವಡಿಸಿಕೊಂಡಿದ್ದಾರೆ. ಇದರಿಂದ ಹೆಚ್ಚು ಇಳುವರಿ ಪಡೆಯಲು ಸಹಕಾರಿಯಾಗಲಿದೆ ಎನ್ನುತ್ತಾರೆ ಕೃಷಿ ಅಧಿಕಾರಿಗಳು.

ಕಳೆದ ವರ್ಷ ಶೇಂಗಾ ಬಿತ್ತನೆ ಮಾಡಿ ರೈತರು ಸಾಕಷ್ಟು ನಷ್ಟ ಅನುಭವಿಸಿದ್ದರು. ಈ ಸಲ ಶೇಂಗಾ ಸಮೃದ್ಧವಾಗಿ ಬೆಳೆದಿದೆ. ಬೆಳೆಗೆ ರೋಗಬಾಧೆ ತಗುಲದಂತೆ ಮುಂಜಾಗ್ರತಾ ಕ್ರಮವಾಗಿ ಔಷಧಿ ಸಿಂಪಡಿಸಲಾಗುತ್ತಿದೆ ಎಂದು ಹಿರೇವಂಕಲಕುಂಟಾ ರೈತ ಹನುಮೇಶ ತಿಳಿಸಿದ್ದಾರೆ.